კორონაკრიზისი, ეროვნული ლიგის პერსპექტივა და გეგმა B. დავუბრუნდეთ შემოდგომა-გაზაფხულის მოდელს!..

კორონავირუსმა არც საქართველოს აუარა გვერდი. მართალია, ჩვენთან მდგომარეობა მსუბუქია და ამ მომენტისთვის პანიკის საფუძველი არ გვაქვს, მაგრამ დაავადება ვერაგია, თან კიდევ ბევრი ობიექტურ-სუბიექტური ნიუანსია და დაზღვეულები არ ვართ სიტუციის დამძიმებისგან.

ზოგადად, მსოფლიოში ახლა ისეთი ვითარებაა, პანდემიის ჩაცხრომისა და თუნდაც მკვეთრი გაუმჯობესების შემდეგაც ვერ დადგება ბედნიერი დროება - კიდევ დიდხანს მოგვიწევს გამკლავება კორონავირუსის მიერ დატოვებულ პრობლემებთან, ეკონომიკური იქნება ის, ფსიქოლოგიური თუ რაც გნებავთ...

დავუბრუნდეთ საქართველოს, კერძოდ, ჩვენს ფეხბურთს. ეროვნული ლიგა, პირობითად, აპრილის დასაწყისამდეა გაჩერებული. თითქმის 100 პროცენტით შეიძლება იმის თქმა, რომ არ შედგება ბელარუსთან მატჩიც. მოკლედ, ისე დაგვიდგა ახალი საფეხბურთო არდადეგები, წინა ხეირიანად არც გვქონდა მოთავებული.

ყველაფერთან ერთად, ძალიან მნიშვნელოვანია ქართული კლუბების ბედი, პირველ რიგში, დაფინანსების კუთხით. არსებული რეალობიდან გამომდინარე, ექნება კი სახელმწიფო ბიუჯეტს იმის საშუალება, ფონდის საშუალებით გააგრძელოს ქართული ფეხბურთის დაფინანსება.

ცხადია, მდგომარეობა ურთულდებათ იმ თითზე ჩამოსათვლელ კერძო ინვესტორებსაც, ვინც ჩვენს ფეხბურთში ფულს დებს, თუნდაც "ტორპედოს" ახალ მეპატრონეზე - გასაგები მიზეზების გამო, იტალიელ ბიზნესმენს ვერ აუვლიდა გვერდს ეს უბედურება...

საფიქრალი გვაქვს სპორტული კუთხითაც - სეზონის შეწყვეტა ნიშნავს ქარს გატანებულ საწვრთნელ შეკრებებს (ფულზე აღარ ვამბობთ). გამოდის, რომ ეს პროცესი თავიდან არის დასაგეგმი, მით უმეტეს, თუ აპრილის დასაწყისისთვის ვერ მოვახერხეთ სეზონის განახლება. ამას არ ვამბობთ პანიკის დასათესად, მაგრამ აუცილებლად უნდა ვიფიქროთ უარეს სცენარზე, მით უფრო, რომ სპეციალისტებიც ვერ აკეთებენ მიახლოებით პროგნოზსაც კი, როდის დაგვეხსნება ეგრეთ წოდებული COVID-19. "დათბება და ვირუსი წავა" - ამით თავს ვერ დავიმშვიდებთ!..

გრაფიკის მიხედვით, ივლისიდან ახალი ევროტურნირები უნდა დაიწყოს. თუმცა ყველამ იცის, რომ უეფა ამ გრაფიკს ვერ დაიცავს და სერიოზული კორექტირება მოუწევს. მაგრამ ახალი ევროთასები რომ დაიგეგმოს, ამისთვის მიმდინარე სეზონის დასრულებაა აუცილებელი, რაც ევროპის უმრავლეს ქვეყნებში ძალიან დიდი კითხვის ნიშნის ქვეშაა, განსაკუთრებით TOP 5-ში, რომლის გარეშეც ევროთასები უბრალოდ წარმოუდგენელია.

აქ აუცილებელი იქნება ვადების ან ფორმატის შეცვლა. გამორიცხული არ არის, საკვალიფიკაციო და პლეი ოფის ეტაპებზე, ორრაუნდიანი მატჩების ნაცვლად, გამარჯვებული თითო თამაშით გაირკვეს. ეს ბევრს არ მოეწონება, თუმცა გარკვეული შვება კი იქნება გრაფიკის შესამსუბუქებლად.

რა უნდა ქნას საქართველომ? და კვლავ ყოველგვარი პანიკის გარეშე - ჩვენ არ ვიცით ზუსტად, როდის განახლდება ეროვნული ლიგა. ამიტომ საქართველოს ფეხბურთის ფედერაციამ აუცილებლად უნდა შეიმუშაოს ეგრეთ წოდებული გეგმა B, რაც გულისხმობს... ჩემი აზრით, ძველ სისტემაზე დაბრუნებას.

უფრო კონკრეტულად: თუ კორონაკრიზისი გაგრძელდა და მაისის ბოლომდე ვერ განვაახლეთ ჩემპიონატი, ფეხბურთის ფედერაციის აღმასოკმმა 2020 წლის სეზონი ჩაშლიდან უნდა გამოაცხადოს, შეცვალოს რეგლამენტი და დაუბრუნდეს "შემოდგომა-გაზაფხულის" მოდელს. შეიქმნას საქართველოს XXXII ჩემპიონატის ახალი რეგლამენტი 2020/21 წლების სეზონისთვის.

ეს შეიძლება კიდევ უფრო აქტუალური იყოს უკვე აწეწილი საერთაშორისო კალენდრის ფონზე. ასეთ დროს, უბრალოდ, აუცილებელი იქნება ჩავჯდეთ ახალ გრაფიკში და გვერდით გადავდოთ ექსპერიმენტი, რომელიც რამდენიმე წლის დავიწყეთ და რომელმაც დივიდენდები ვერ მოგვიტანა - გინდა სპორტული, გინდა ფინანსური კუთხით.

პაატა გელაშვილი
გაზეთი "ლელო"

2252
მკითხველის კომენტარები / 1 /
ზურა
0
რატომ ართულებთ? 4-ის მაგივრად ჩატარდება 3 წრე ან 2 და მოგვარდება ყველაფერი რა პრობლემაა? თანაც საქართველოდან ევროტურნირების მონაწილეები უკვე გარკვეულია და არც მაგ მხრივ გვექნება პრობლემა...
მსგავსი ამბები
რუბრიკის სხვა სიახლეები
;