კორტებს შაფათავა, გორგოძე და ქარდავა შემორჩნენ

ჩინურ შენჟენში გრძელდება ჩოგბურთელ ქალთა 100.000-იანი ტურნირი, რომელშიც ორმა  ქართველმა აიღო სტარტი. სოფიო შაფათავამ საკვალიფიკაციო ეტაპი წარმატებით განვლო, მაგრამ ძირითადი ბადის პირველ წრეში ტურნირზე „ველური ბარათით“ მიწვეულ მასპინძელ ჩან ლიუსთან დამარცხდა - 1:6, 1:6.  მარიამ ბოლქვაძე ერთეულთა ასპარეზობას წინა დღეს გამოეთიშა დალილა იაკუპოვიჩთან (სლოვენია) წაგებით.

ბოლქვაძემ ვერც წყვილებში იყოჩაღა - ნატალია კოსტიჩთან (სერბეთი) ერთად ჩინელებს - ქსინიუ ვანსა და ლინ ჩჟუს ვერ გაუმკლავდა - 3:6, 1:6. სამაგიეროდ, შაფათავამ და მისმა ბრიტანელმა მეწყვილე ემილი ვებლი-სმითმა ითამაშეს კარგად - ასპარეზობის მესამე ნომრებს - მიიუ კატოსა (იაპონია) და დანკა კოვინიჩს (მონტენეგრო) აჯობეს ორ სეტში - 7:5, 6:2. მეოთხედფინალში ქართულ-ბრიტანული ტანდემი მასპინძლებს - მეიძი გუოს და მეილინ ვანს შეხვდება, რომლებმაც ტაივანელები - ჰეი-ჰსუნ ჩენი და იუ ჩიჰ ჰსიეჰი გაისტუმრეს მაყურებლებში - 6:3, 6:4. 

ფრანგული სენტ-ეტიენის 25.000-იან ტურნირში ეკატერინე გორგოძე, რომელიც მე-7 ნომრადაა განთესილი, გუშინ მასპინძელ სალმა დიუბრის დაუპირისპირდა. პირველ სეტში, როცა ქართველი 5:2 დაწინაურდა, ფრანგმა ჩოგბურთელმა ტრავმა მიიღო და პაექრობის გაგრძელება ვერ შეძლო. მეორე წრეში გორგოძე კვალიფიკაციიდან აღზევებეულ ფრანგ ესტელა კასკინოს გაუწევს მეტოქეობას. ამ უკანასკნელმა სტარტზე თანამემამულე მატილდა არმიტანო ჩამოიშორა გზიდან - 6:3, 6:3.

ბერძნულ ჰერაკლიონში ზოზია ქარდავა 15.000-იანი ტურნირის პირველ წრეში მე-5 ნომრად განთესილ ნოელია ზებალოსთან (ბოლივია) ვერაფერს გახდა - 4:6, 4:6. წყვილებში კი ჩვენებურმა ირინა შჩეტინინასთან (რუსეთი) ერთად ასპარეზობის ჩეხ მე-4 ნომრებს - ბარბორა მიკლოვასა და ანა შიშკოვას  ორ სეტში იოლად აჯობა - 6:0, 6:4. მეოთხედფინალში ქართულ-რუსულ დუეტს გაბრიელა დუკას (რუმინეთი) და ლაურა სვატიკოვას (სლოვაკეთი) ტანდემი გამოცდის, რომელმაც ლიზა მატვიენკოსა და ივა პრიმორაცს (ხორვატია) მოუგო - 6:4, 6:4.

126
მკითხველის კომენტარები / 0 /
მსგავსი ამბები
რუბრიკის სხვა სიახლეები
;