კოსტა ილიევი: 3X3 კალათბურთი ქართველებისთვისაა მოგონილი!

- ეს დღე უნდა დავიმახსოვროთ, რადგან მომავალში ვთქვათ - სწორედ 4 აპრილს დაარსდა ფედერაცია, რომელმაც საქართველოს დიდი წარმატება მოუტანა, - განაცხადა კულტურისა და სპორტის მინისტრის მოადგილე შალვა გოგოლაძემ სამინისტროში გამართულ შეხვედრაზე.
დაარსდა 3X3 კალათბურთის ფედერაცია. ეს ლოგიკურიც იყო, რადგან სპორტის ეს სახეობა ოლიმპიური თამაშების პროგრამაშია შეტანილი, განსაკუთრებული ყურადღება სჭირდება.

- ცალკე ფედერაციის არსებობა უაღრესად მნიშვნელოვანია. თუ სწორად წარიმართა მუშაობა, არც ის იქნება შორი პერსპექტივა, რომ ჯერ ახალგაზრდულ, შემდეგ კი ოლიმპიადაზე საქართველოს ნაკრები სხვა მონაწილეთა შორის ვიხილოთ. ჩვენი ფედერაცია 3X3 კალათბურთის ფედერაციას ყოველმხრივ გვერდში დაუდგება, - ეს უკვე კალათბურთის ფედერაციის პაატა გურასპაულის სიტყვებია.

ახალი ფედერაციის პრეზიდენტმა გიგა გურგენიძემ დამფუძნებლები გაგვაცნო: მიხეილ ამაშუკელი, ნიკოლოზ გოგოლაშვილი, სანდრო ჟღენტი, ბექა გოლეთიანი და მიხეილ ვართანოვი, რომელიც ფიბა-ს ლიცენზიის მქონე პირველი ქართველი მსაჯია 3X3 კალათბურთში.

საპატიო პრეზიდენტად აირჩიეს და სიგელი გადასცეს გიორგი ზაბახიძეს, რომელმაც ხაზი გაუსვა ფედერაციის მუშაობას და წარმატებებს:

- თავიდან ზოგისთვის სასაცილოც იყო 3X3 კალათბურთის ფედერაციის დაარსება, მაგრამ სპორტის ამ სახეობამ უკვე დიდი პოპულარობა მოიპოვა და მთელი მსოფლიო თამაშობს. რაც მთავარია: საქართველოს ახალგაზრდული ნაკრებები დიდ წარმატებებს აღწევენ. გაგახსენებთ: 18-წლამდელთა ნაკრებმა მსოფლიოს ჩემპიონატზე 1/4 ფინალი ითამაშა.

- 3X3 კალათბურთის ფედერაციის ამჟამინდელ დამფუძნებლებთან ერთად, 12 წლის წინ, 2006 წელს მინი კალათბურთის ფედერაცია ჩამოვაყალიბეთ, - მოგვითხრობს გიგა გურგენიძე, - ვატარებდით სხვადასხვა შეჯიბრებებს. ერთი წლის შემდეგ კი ფიბა-მ ოფიციალურად განაცხადა, რომ იწყებდა 3X3 კალათბურთის პოპულარიზაციას. ბოლო წლებში უკვე ფიბა-ს სტანდარტების შესაბამისად ვმართავთ საქართველოს ჩემპიონატებს და გამარჯვებულებს ფინალურ ეტაპებზე უცხოეთში ვაგზავნით.

შეხვედრას ესწრებოდა თბილისის კალათბურთის ფედერაციის პრეზიდენტი ვახტანგ ნაცვლიშვილი, რომელიც ასევე აქტიურად ატარებს 3X3-ზე კალათბურთის შეჯიბრებებს და სწორედ მის მიერ ორგანიზებულ შეჯიბრებებში ითამაშეს პირველად პროფესიონალმა კალათბურთელებმა.

- 2010 წელს დამირეკა კოსტა ილიევმა, ამჟამად ფიბა-ში ფედერაციებთან ურთიერთობის განყოფილების ხელმძღვანელმა და მითხრა - 3X3 კალათბურთს დიდი ყურადღება სჭირდება, რადგან იგი მალე ოლიმპიური სახეობა გახდებაო. ასეც მოხდა: 3X3 კალათბურთი 2020 წლის ოლიმპიადის პროგრამაშია შეტანილი, - აღნიშნა ვახტანგ ნაცვლიშვილმა.

შეხვედრას სპეციალური სტუმრის სტატუსით სწორედ კოსტა ილიევი ესწრებოდა:

- მოგილოცავთ ახალი ფედერაციის დაარსებას. დარწმუნებული ვარ, წარმატებები გექნებათ, რადგან 3X3 კალათბურთი სწორედ ქართველებისთვისაა. ჯერ ერთი იმიტომ, რომ ინდივიდუალურად ყველასგან გამოირჩევით და სპორტის ეს სახეობა სწორედ ინდივიდუალიზმს მოითხოვს. მეორეც: საქართველო პატარა ქვეყანაა და იოლი არ არის უმაღლესი დონის 12 კალათბურთელის პოვნა. 3-4 ექსტრა-კლასის მოთამაშე კი, უკვე გყავთ.

საინტერესოა, რომ წესების თანახმად სპორტის ამ სახეობაში ოლიმპიადაზე თამაშის უფლება პროფესიონალ კალათბურთელებსაც აქვთ. წარმოვიდგინოთ საქართველოს ნაკრები... თუმცა, სჯობს, ამ თემაზე შემდეგში ვრცლად ვიმსჯელოთ.

1067
მკითხველის კომენტარები / 0 /
მსგავსი ამბები
რუბრიკის სხვა სიახლეები
;