კოუტინიოს პირველი დღე ბარსელონაში

როგორც გამოცხადებული იყო, გუშინ "ბარსელონამ" ახალწვეული ფილიპე კოუტინიო ოფიციალურად წარადგინა. ყველაფერი ჯერ კიდევ 7 იანვარს დაიწყო, როცა "ლევანტესთან" თამაშის დასრულების შემდეგ "კამპ ნოუს" ერთ-ერთ დარბაზში 25 წლის ბრაზილიელის ფოტოსესია გაიმართა.

* ფილიპე კოუტინიო ოფიციალურად გახდა "ბარსას" ფეხბურთელი.
* მან კლუბთან 2023 წლის 30 ივნისამდე გააფორმა ხელშეკრულება.
* რა ნომრით ითამაშებს კოუტინიო, ჯერ საიდუმლოა.

გუშინ "ლივერპულიდან" 160 მილიონ ევროდ შეძენილმა ბრაზილიელმა შემტევმა ნახევარმცველმა ფილიპე კოუტინიომ კატალონიურ გრანდთან კონტრაქტი 2023 წლამდე გააფორმა, რის შემდეგაც " კამპ ნოუზე" გულშემატკივრების წინაშე წარსდგა, მერე კი ჟურნალისტების კითხვებს უპასუხა.

კოუტინიოს პრეზენტაციამ საკმაოდ დიდი ინტერესი გამოიწვია. "კამპ ნოუზე" მის სანახავად 7 436 მაყურებელი მივიდა (მაშინ, როცა "ლევანტესთან" მატჩში 60 ათასი მაყურებელიც ვერ შეივსო).

როდის შედგება მისი დებიუტი ახალ კლუბში? როგორც ჩანს, "ბარსას" ფანებს დალოდება მოუწევთ - კოუტინიო ტრავმირებულია და დაახლოებით 3 კვირა ვერ ითამაშებს.

ესპანურმა მედია ფეხბურთელისგან, პირველ რიგში, კოუტინიოს არჩევანით დაინტერესდა:

"ამ კითხვაზე პასუხის გაცემა ყველაზე ადვილია - იმიტომ, რომ ეს "ბარსაა"! მსოფლიოში საუკეთესო და უძლიერეს გუნდში თამაშზე უკეთესი რა უნდა იყოს და როგორ შეიძლება, რომ ფეხბურთელი ამაზე არ ოცნებობდეს? ჩემთვის დიდი პატივია, რომ ლიონელ მესის თანაგუნდელი ვიქნები.

მოკლედ, ოცნება ამისრულდა და იმედი მაქვს, "ბარსასთან" ერთად ბევრ ტიტულს მოვიგებ. დიახ, ახლა ჩემპიონთა ლიგაზე თამაში ჩემთვის არ შეიძლება, მაგრამ წინ კიდევ 5 წელი მაქვს კლუბში და ლიგაზეც აუცილებლად ვითამაშებ. იმედი მაქვს, ეს ხუთივე სეზონში მოხდება".

ბრაზილიელმა ფეხბურთელმა მის საყვარელ პოზიციაზე და მესის გარდა კლუბში დახვედრილ სხვა ფეხბურთელებზეც ილაპარაკა:

"ბედნიერი ვარ, რომ ანდრეს ინიესტას თანაგუნდელი ვიქნები. ის გენიოსია. რაც შეეხება ჩემს საყვარელ პოზიციას: როგორც იცით, რამდენიმე პოზიციაზე შემიძლია თამაში.

მინდა, რომ "ბარსასთვის" ყველაფერი გავაკეთო და გუნდს ტიტულების მოპოვებაში დავეხმარო. ბარსელონაში თამაშზე დიდხანს ვოცნებობდი და უბედნიერესი ვარ, რომ ეს ოცნება ამიხდა. დანარჩენი მწვრთნელის გადასაწყვეტია!"

კოუტინიოს არც ყოფილი გუნდი დავიწყებია:
"ლივერპულის" გულშემატკივრებს და ხელმძღვანელებს ყველაფრისთვის დიდ მადლობას ვუხდი. მართალია, "ენფილდზე" ვერც ერთი დიდი ტიტული ვერ მოვიგე, მაგრამ ეს იყო გუნდი და ქალაქი, სადაც მე და ჩემი ოჯახი ბედნიერები ვიყავით.

იმედი მაქვს, რომ ბარსელონაში აკლიმატიზაცია დიდხანს არ გამიგრძელდება. ბარსელონაში ჩამოსვლამდე არაერთხელ ვესაუბრე ჩემს ყოფილ თანაგუნდელ ლუის სუარესს და თანამემამულე პაულინიოს. მათ კარგის მეტი არაფერი უთქვამთ."

ჟოსეპ მარია ბარტომეუ ("ბარსელონას" პრეზიდენტი): "ბარსამ" მსოფლიოში ერთ-ერთი საუკეთესო ფეხბურთელის გადაბირება შეძლო. დღეს "ბარსელონას" გულშემატკივრებისთვის მნიშვნელოვანი დღეა. ამ ტრანსფერზე ძალიან დიდხანს ვმუშაობდით.

კოუტინიოს გადაბირება სხვა გრანდებსაც სურდათ და მიხარია, რომ მან არჩევანი "ბარსელონას" სასარგებლოდ გააკეთა. მინდა, "ლივერპულის" ხელმძღვანელებს მადლობა გადავუხადო. "ლივერპული" ევროპის ერთ-ერთი საუკეთესო კლუბია. საბედნიეროდ, ყველაფერზე შევთანხმდით და კოუტინიო "ბარსას" ფეხბურთელი გახდა".

რომელინომრით ითამაშებს კოუტინიო?

სხვათა შორის, ჯერჯერობით უცნობია, რომელი ნომრით ითამაშებს კოუტინიო "ბარსელონაში". იშვიათი შემთხვევაა, მაგრამ ფაქტია, ახალწვეული წარდგენაზე ნომრის გარეშე მაისურით გამოცხადდა.

თუმცა "სქაი სპორტსის" მიხედვით ამ საიდუმლოს ფარდა თითქოს აეხადა. კოუტინიოს 14-ნომრიანი მაისურა ელის. ამ ნომრით ახლა "ბარსაში" ხავიერ მასკერანო თამაშობს, რომელსაც ჩინეთში გადასვლას უწინასწარმეტყველებენ.

გამოთავისუფლებულ მაისურს კი ბრაზილიელს გადასცემენ. დღეების წინ სხვა წყაროები 7 ნომერზე საუბრობდნენ. "შვიდიანი" არდა თურანის საკუთრებაა და იანვარში არც მისი წასვლაა გამორიცხული.

თავად კოუტინიოს, როგორც "ლივერპულში", აქაც "ათიანით" თამაში სურდა, მაგრამ თავადაც კარგად ხვდება რამხელა უტოპიაა ეს...

ყოველდღიური სპორტული გაზეთი "ლელო"
1030
მკითხველის კომენტარები / 0 /
მსგავსი ამბები
რუბრიკის სხვა სიახლეები
;