'კრასნოდარში' მთავარი მწვრთნელის პოსტზე შოთაც განიხილებაო...

რუსეთის პრემიერლიგის 24-ე ტურში ერთ-ერთ აუტსაიდერ მახაჩყალის "ანჟისთან" საშინაო ფრის შემდეგ "კრასნოდარის" მთავარი მწვრთნელი იგორ შალიმოვი თანამდებობიდან გადადგა.

მის ერთ-ერთ სავარაუდო შემცვლელად კი ტაშკენტის "ფახთაქორის" მთავარი მწვრთნელი შოთა არველაძე განიხილებაო, - ამ ინფორაციას ახალი ამბების ფედერალური სააგენტო რიაფან.რუ ავრცელებს.

მანამდე, მეორე რუსული სააგენტო SPORTS FM ამტკიცებდა, რომ ამ პოსტზე მუშაობა მოსკოვის ცსკა-ს ახალგაზრდული გუნდისა და რუსეთის 21-წლამდელთა ყოფილ დამრიგებელ ალექსანდრ გრიშინს შესთავაზეს.

Riafan.ru-ის ინფორმაციით, "კრასნოდარი" დიდხანს იმედოვნებდა, რომ რუსეთის ნაკრებისა და მოსკოვის ცსკა-ს ყოფილ მწვრთნელ ლეონიდ სლუცკის არნემის "ვიტესში" წასვლას გადააფიქრებინებდა, მაგრამ ცნობილია, რომ სლუცკიმ გადაწყვეტილება უკვე მიიღო...

"ახლა მთავარი მწვრთნელის ვაკანტურ თანამდებობაზე სულ სამი კანდიდატი განიხილება - "ფახთაქორის" მწვრთნელი შოთა არველაძე, ტულის "არსენალის" დამრიგებელი მიოდრაგ ბოჟოვიჩი და ოლეგ კონონოვი, რომელიც "კრასნოდარს" ადრეც წვრთნიდა", - იუწყება რუსული სააგენტო.

საინტერესოა, რომ "კრასნოდარში" შოთას შესაძლო დანიშვნაზე ინფორმაცია რუსულმა ინტერნეტპორტალმა Only Vision-მა 2016 წლის 25 ნოემბერსაც გაავრცელა, როცა ქართველი სპეციალისტი თელ-ავივის "მაკაბიში" მუშაობდა.

გუშინ გვიან გავრცელებელი ინფორმაციით, "კრასნოდარს" დროებით შალიმოვის ასისტენტი ოლეგ ფომენკო გაუძღვება.

ყოველდღიური სპორტული გაზეთი "ლელო"
965
მკითხველის კომენტარები / 0 /
მსგავსი ამბები
რუბრიკის სხვა სიახლეები
;