კრიშტიანო რონალდო: ვეცდები მსახიობი გავხდე

ოქროს ბურთის" 5-გზის გამარჯვებული კრიაშტიანო რონალდო ვრცლად ესაუბრა "ფრანს ფუტბოლს". მსოფლიო ფეხბურთის ვარსკვლავის ინტერვიუ "ლელოს" მკითხველსაც დააინტერესებს...

იცინის ის, ვინც  ბოლოს იცინის

- ეს თქვენი მეხუთე "ოქროს ბურთია". უკვე მიეჩვიეთ?

- ეს ისეთი რამეა, ვერ მიეჩვევი. როცა ფეხბურთის თამაშს ვიწყებდი, სწორედ ამ ჯილდოს მოგება მქონდა მიზნად. მას შემდეგ, რაც "მანჩესტერ იუნაიტედში" გადავედი, ჩემი კარიერა აღმავალი გზით წავიდა და მივხვდი, რომ ყველაფერი შესაძლებელი იყო.

პირველად რომ მოვიგე "ოქროს ბურთი", საკუთარ თავს ვუთხარი, რომ ეს საკმარისი არ იქნებოდა, მერე მეორე მოვიდა, მესამე... პატივს ვცემ ყველა იმ ფეხბურთელს, ვისაც სხვადასხვა დროს "ოქროს ბურთი" მოუგია, მაგრამ ისინი ჩემი დონისანი არ არიან. აქ ისეთივე დიდია სხვაობა, როგორც ერთსა და ხუთს შორის.

- 2017 წელს იყო მომენტი, როცა უკვე დარწმუნებული იყავით, რომ მეხუთედაც მოიგებდით "ოქროს ბურთს"?

- ეს ბევრად არის დამოკიდებული იმაზე, მოიგებ თუ არა ჩემპიონთა ლიგას. სწორედ ჩვენ მოვიგეთ ლიგა და მე გავიტანე ყველაზე მეტი გოლი, თან ფინალში სულაც დუბლი შევასრულე. ეს იყო სწორედ საკვანძო მომენტი.

- 5 წლის წინ მესისთან "ოქროს ბურთების" რაოდენობით 1:4-ს აგებდით. იფიქრებდით იმ მომენტში, რომ ერთ დღესაც თქვენს შორის ანგარიში გათანაბრდებოდა?

- დამეთანხმებით, საინტერესო ისტორიაა. ჩვენს შორის ხომ პირველმა მე მივიღე "ოქროს ბურთი". მერე მესის ჯერი დადგა. რა დასამალია და, გული მწყდებოდა, მეტიც - საშინლად გაღიზიანებული ვიყავი. წარმოიდგინეთ, მიდიხარ დაჯილდოებაზე და ბრუნდები არაფრით.

სიმართლე გითხრათ, ერთი პერიოდი ვიფიქრე კიდეც, აღარ მივსულიყავი ცერემონიალზე. ანდა რისთვის იყო საჭირო? რომ კიდევ ერთი ფოტო გადამეღო? მერე ამ გრძნობებმა გადაიარა. ცხოვრებაშიც ასეა და ფეხბურთშიც - იცინის ის, ვინც ბოლოს იცინის. დავარწმუნე საკუთარი თავი, რომ უნდა მომეთმინა და ჩემი დროც დადგებოდა. როგორც ხედავთ, მართალი აღმოვჩნდი.

მე ყველაზე  ჰარმონიული ვარ...

- "ოქროს ბურთი" პირველად 2008 წელს მოიგეთ. მაშინ თუ წარმოიდგენდით, რომ თვით ზიდანს, რონალდოს, პლატინის, ვან ბასტენსა და კრუიფს გადაასწრებდით?

- ერთხელ მაინც რომ მოვიგებდი "ოქროს ბურთს", ამაში ადრევე ვიყავი დარწმუნებული. მაგრამ, რატომ არა - ორი? ან თუნდაც სამი? ხუთს კი, გამოგიტყდებით, ნამდვილად ვერ წარმოვიდგენდი.

- ახლა უკვე შეგიძლიათ, თქვათ, რომ მსოფლიოში ყველაზე სახელგანთქმული ფეხბურთელი ხართ?

- ყველა ჩემს კონკურენტს თავისი ღირსება აქვს და, როგორც გითხარით, ყველა მათგანს პატივს ვცემ, მაგრამ ჩემზე უკეთესი დღეს არავინ არის. არ არსებობს, რომელიმე ფეხბურთელმა გააკეთოს რაღაც განსაკუთრებული და მე ვერ შევძლო მისი გამეორება, მაგრამ ჩემ გაკეთებულს ვერავინ გაიმეორებს.

დედამიწაზე სწორედ მე ვარ ყველაზე ჰარმონიული ფეხბურთელი. კარგად ვურტყამ ორივე ფეხით, მაქვს სისწრაფე, ვარ ათლეტური, გოლები გამაქვს, მათ შორის - თავითაც... თავით პასებიც მშვენივრად გამომდის... ვიღაც იტყვის, რომ საუკეთესო მესია ან ნეიმარი, მაგრამ მე ვიცი, რომ მსოფლიოს საუკეთესო მოთამაშე ვარ მე - კრიშტიანო რონალდო!

თუ ვინმე მაკრიტიკებს, ამის მოსასმენადაც მზად ვარ, რადგან, როცა მთელი მსოფლიო გიცნობს, რა თქმა უნდა, ბევრი არის ისეთიც, ვისაც არ უყვარხარ. ეს თქვენც გეხებათ, ჟურნალისტებს.

- ანუ, გინდათ, თქვათ, რომ არა მარტო თანამედროვეობის, არამედ ყველა დროის საუკეთესო ფეხბურთელი ხართ?

- სწორედ ასეა! მიუხედავად იმისა, კარგი პერიოდი მაქვს კარიერაში, თუ ნეგატიური. როცა რაღაც არ გამოგდის, უნდა ბევრი იშრომო და აუცილებლად გამოგივა. თუ ასე არ აკეთებ, მაშინ პროფესიონალიც არ ხარ.

ასეთი ამნეზია მაცოფებს

- ზუსტად ერთი წლის წინ თქვენ "ფრანს ფუტბოლს" უთხარით, რომ, როგორც ფეხბურთელი, შეიცვალეთ. ახლა რას იტყვით? თავი და სხეული ერთნაირ მდგომარეობაშია?

- ვფიქრობ, ორგანიზმი უკეთესად არის. დღეს შარშანდელზე უფრო ძლიერი ვარ.

- რამ შეიძლება დაგაკარგვინოთ ეს კონდიციები?

- როცა ვიგრძნობ, რომ კლუბი და გულშემატკივრები აღარ მიჭერენ მხარს, აღარ მენდობიან... იცით, ხალხს მოკლე მეხსიერება აქვს. ერთხელ, აეროპორტში, მე, კარვახალს და რამოსს მოგვიახლოვდა ერთი ახალგაზრდა და ფოტოს გვიღებს - ეი, ბიჭებო, რა განავლებივით თამაშობთო, - მოგვაძახა.

მე შევახსენე, რომ ჩვენ სამი თვის წინ ევროპისა და ესპანეთის სუპერთასები მოვიგეთ. აი, ასეთი მოკლე მეხსიერება აქვს ზოგიერთს. ეს ამნეზია მაცოფებს! როცა რაღაც გვიჭირს და არ გამოგვდის, სწორედ მაშინ გვინდა მხარდაჭერა, და არა - ლანძღვა. სამწუხაროდ, ეს ბევრს არ ესმის.

- მოგვიყევით თქვენს ერთ ჩვეულებრივ დღეზე. როგორ ინარჩუნებთ ასეთ ბრწყინვალე ფორმას?

- ფიზმომზადება ისეთივეა, როგორც ადრე. შესაძლოა, მიდგომა შეიცვალა, უფრო მეცნიერული გახდა. მაგალითს გეტყვით - რამდენიმე წლის წინ სატრენაჟორო დარბაზში 40 წუთს ვატარებდი, ახლა იქ 20 წუთზე მეტს არ ვჩერდები.

- ერთხელ, კარლო ანჩელოტი ჰყვებოდა, ჩემპიონთა ლიგის მატჩიდან დაბრუნებული, ღამის ორ საათზე, როგორც გადახტით თითქმის გაყინულ წყალში...

- ეს ჩემი ერთ-ერთი მეთოდია და გეტყვით, რატომაც ვაკეთებ ასე. როცა ორი საათი თვითმფრინავში ხარ, ფეხები გისივდება ატმოსფერულ წნევებს შორის სხვაობის გამო და ასეთ დროს ცივი წყალი საუკეთესო საშუალებაა, რომ ყველაფერი ნორმაში იყოს.

ისე, ხანდახან ცხელ წყალში დიდხანს დგომაც სასარგებლოა. იცით, რატომ ვერ იძინებენ ფეხბურთელები დიდხანს თამაშის შემდეგ? ისინი ჯერ კიდევ ადრენალინის ქვეშ არიან. მე კი ვცდილობ, სხვადასხვა ხერხს მივმართო და თითქმის ყოველთვის შესანიშნავად მძინავს. საერთოდ, ბევრს არ ესმის ძილის მნიშვნელობა. ასეთივე მიდგომა მაქვს კვებასთან, დატვირთვებთან...

...ამიტომაც  არასოდეს მიქრება შრომის სურვილი

- სანამ "ოქროს ბურთს" არავის უთმობთ, შეიძლება, არც ფიქრობთ კარიერის დასრულებაზე...

- ფსიქოლოგიური კუთხით წარმატება ყოველთვის პლუსია, ჯილდოა. ხომ რაღაცისთვის შრომობ ცხოვრებაში? თუ მთელი წელი თავი მოიკალი და ვერაფერი მიიღე, შეიძლება, დეპრესიაში ჩავარდე. პირადად მე არც ერთი სეზონი არ მქონია უშედეგო. ყოველთვის რაღაცას ვიგებდი. ამიტომაც არასოდეს მიქრება შრომის სურვილი.

- უკვე ოთხი შვილის მამა ხართ. ეს როგორღაც ახდენს გავლენას თქვენს საფეხბურთო კონდიციებზე?

- არანაირად! თუმცა ცხოვრება გარკვეულწილად შეიცვალა. ერთადერთი პრობლემა ის არის, როგორ გადაანაწილო თანაბრად ყურადღება და სიყვარული ოთხ შვილზე. ცხადია, ოთხივე ძალიან მიყვარს, მაგრამ პროფესია - უპირველეს ყოვლისა!

- ნუთუ არასოდეს იწევს წინა პლანზე მამის ფუნქცია?

- არა, არასოდეს! უბრალოდ, ახლა მეტ პასუხისმგებლობას გრძნობ. ადრეც მითქვამს, რომ ყოველთვის ვოცნებობდი ბევრ შვილზე და აი, როგორც ხედავთ, ვქმნით კიდეც დიდ ოჯახს.

- ხანდახან ხომ საჭიროა განმარტოება, წინასამატჩო განწყობა რომ შეიქმნათ? ამას როგორღა ახერხებთ?

- განწყობის შექმნა არ მჭირდება, მაგრამ ესეც რომ არა, ყოველთვის შემიძლია, მოვნახო ჩემთვის ცარიელი კუთხე...

მინდა, რაც  შეიძლება  დიდხანს  ვითამაშო...

- შეგიძლიათ წარმოიდგინოთ საკუთარი თავი 5 წლის შემდეგ? რა შეიცვლება რონალდოს ცხოვრებაში?

- თითქმის არაფერი. მინდა, რაც შეიძლება დიდხანს ვითამაშო ფეხბურთი. მაგრამ იმის გარანტიას ვერავის მივცემ, რომ ჩემს თავში არაფერი შეიცვლება. არ უნდა დაგეგმო მომავალი გრძელ პერიოდზე. ჯობია, დღევანდელი დღით იცხოვრო.

ვინ იცის, იქნებ 5 წლის შემდეგ დავასრულო კიდეც კარიერა. მხოლოდ ამის მერე დავიწყებ ცხოვრების ახალ პროექტზე ფიქრს. მაქვს ტანსაცმლის ბიზნესი, სასტუმროები, გიმნაზია... უმუშევარი არ დავრჩები.

- მწვრთნელად მუშაობაზე არ გიფიქრიათ?

- მსგავსი რამ თავში აზრად ჯერ არ მომსვლია. ამასაც სპეციალური კურსები და განათლება სჭირდება. ძალიან მაინტერესებს კინოც...

- მსახიობობა გსურთ?

- ყოველ შემთხვევაში, მინდა ვცადო. ხშირად მთავაზობენ ხან ერთ, ხან მეორე ფილმში სხვადასხვა როლს, მაგრამ ახლა ამის დრო არ მაქვს. დღეს მხოლოდ ფეხბურთია ჩემი ცხოვრება და სიყვარული.

ეს დიდი ბედნიერებაა და დარწმუნებული ვარ, ვერაფერი შემიშლის ხელს, ფეხბურთის შემდეგაც ბედნიერ ადამიანად დავრჩე.

ყოველდღიური სპორტული გაზეთი "ლელო"
858
მკითხველის კომენტარები / 0 /
მსგავსი ამბები
რუბრიკის სხვა სიახლეები