კუნგფუ. მსოფლიოს VII ჩემპიონატი: მონაწილე ხუთი, მედალი ექვსი

ფოტოზე: დავით გულისაშვილი, მარიამ თურმანიძე, ლაშა სუმბულაშვილი, რაულ მამედოვი, ნინო ჩიხლაძე

საქართველოს ხუთი წარმომადგენელი (უშუს ეროვნული ფედერაციის პრეზიდენტი გიორგი ვერულიძე) მონაწილეობდა ჩინურ ემეიშანში გამართულ კუნგფუს (ტრადიციული უშუ) მსოფლიოს მე-7 ჩემპიონატში. მათგან ოთხმა სხვადასხვა სინჯის ექვსი მედალი მოიპოვა. სულ ჯილდოებისთვის 57 ქვეყნის 900-ზე მეტი სპორტსმენი იბრძოდა.

უშუ ტაოლუში (საჩვენებელ გამოსვლაში), დიდი კონკურენციის მიუხედავად, ჩვენმა გოგო-ბიჭებმა იყოჩაღეს. ჩა ჩუანის სტილში თბილისელმა მარიამ თურმანიძემ (მწვრთნელი გიორგი ვერულიძე) ყველას აჯობა - 8,80 ქულით მსოფლიოს ჩემპიონატის კვარცხლბეკის უმაღლეს საფეხურზე ავიდა, რაც ქართული უშუს ისტორიაში პირველი შემთხვევაა. მარიამმა სპორტული კოლექცია ვერცხლის მედლითაც გაიმდიდრა - გუნშუში (ჯოხი) მან 8.75 ქულით მეორე ადგილი დაიკავა - ჩინელი წარმოშობის ამერიკელ მია შუეს 0.06 ქულით ჩამორჩა.

საქართველოს დელეგაციას ორი ვერცხლის მედალი შესძინა გიორგი ვერულიძის კიდევ ერთმა შეგირდმა დავით გულისაშვილმა: თბილისელმა სპორტსმენმა ჯერ ფანძი ჩუანში დაიკავა მეორე ადგილი 8,91 ქულით - ჩვენებურს 0.05 ქულით ჩინური წარმოშობის ამერიკელმა ფილიპ დანგმა აჯობა. დავითს მეორე ვერცხლი და დაოში (გრძელი ხმალი) ერგო 8,90 ქულით. გულისაშვილს აქაც დანგმა (8,98 ქულა) გაუსწრო.

თაიძი ჩუანის სტილში 9.05 ქულით ჩემპიონობა რუსმა ტატიანა შურმისტოვამ მოიპოვა. მეორე ადგილზე გავიდა ქუთაისელი ნინო ჩიხლაძე (მწვრთნელი ზურაბ კაპანაძე), რომელმაც გამარჯვებულზე 0,01 ქულით ნაკლები შეფასება მიიღო.

საქართველოს ნაკრების წევრი დედაქალაქელი ლაშა სუმბულაშვილი თაიძი ჩუანის სტილში 8,99 ქულით მესამე იყო. პირველობა არავის დაუთმო ჩინელმა ზუ ქსიანჩუამ (9,35 ქულა). თანაბარი ქულებით ვერცხლის მედლები ავსტრალიელ შერმან შუ ჰანგ მაკსა და იაპონელ იასუიოში კამიუოშის ხვდათ.

- ძალიან გაგვახარა ჩვენი სპორტსმენების წარმატებამ, - გვითხრა გიორგი ვერულიძემ. - ორი თვის წინათ უშუ სტანდას (კონტაქტური უშუ) მსოფლიოს ჩემპიონატში მანუჩარ კვაშილავამ 56 კილოგრამ წონით კატეგორიაში ბრინჯაოს მედალი მოიპოვა, რაც უფროსებში პირველი ჯილდო იყო. და აი, ჩინეთში ერთბაშად ოთხმა სპორტსმენმა გვასახელა (უმედლოდ მხოლოდ თბილისელი რაულ მამედოვი დარჩა) - ჩვენებმა მსოფლიოს ჩემპიონატის ერთბაშად ექვსი ჯილდო დაიმსახურეს. მარიამ თურმანიძემ კი პირველი ოქროს მედალი მოგვიტანა.

ყოველდღიური სპორტული გაზეთი "ლელო"
3996
მკითხველის კომენტარები / 0 /
რუბრიკის სხვა სიახლეები