'კუპატაძის დაბრუნებასა და რამდენიმე ქართველის დამატებაზე ვმუშაობთ - გიორგი ჭიაბრიშვილი საბურთალოზე, ტრანსფერებსა და სიახლეებზე

ეროვნული ლიგის მეორე წრე, საქართველოს თასის მერვედფინალური შეხვედრა (სადაც მოქმედმა ჩემპიონმა “სამტრედია” გასვლაზე 2:1 დაამარცხა) და მომავალი ევროტურნირები - ამ და სხვა საინტერესო საკითხებზე “საბურთალოს” მთავარმა მწვრთნელმა, გიორგი ჭიაბრიშვილმა ილაპარაკა - მწვრთნელმა, რომლის ხელმძღვანელობითაც 2018 წლიდან მოყოლებული, “საბურთალომ” ზედიზედ ექვსი წრე პირველ ადგილზე დაასრულა და გუნდის ისტორიას წერს:


“განვლილ ორ წრეს დადებითად შევაფასებ - ორივე წრე პირველ ადგილზე დავასრულეთ. ასევე, არსებობის განმავლობაში თასის გათამაშების მეოთხედფინალში პირველად გავედით. ბოლო პერიოდს თუ გადავავლებთ თვალს, ჩვენთვის ახალი არ არის პირველი ადგილი. მახარებს ის ფაქტი, რომ პირველობას ვინარჩუნებთ.

დარჩენილ ორ წრესაც ოპტიმიზმით ვუყურებ და მჯერა, სასურველ მიზანს კვლავ მივაღწევთ. ეს არის მთლიანად “საბურთალოს” დამსახურება. მხოლოდ ფეხბურთელებს არ ვგულისხმობ, - ხელმძღვანელებიდან დაწყებული, პერსონალით დამთავრებული. ჩვენ ერთი დიდი გუნდი ვართ”, - ამბობს გიორგი ჭიაბრიშვილი.

“საბურთალოს” მთავარმა მწვრთნელმა ეროვნული ლიგის მიმდინარე სეზონზეც ილაპარაკა. “ბოლო წლებში ეროვნულმა ლიგამ დიდი პროგრესი განიცადა. წლეულს, კიდევ უფრო ძლიერი და საინტერესო ჩემპიონატია - უკეთესი მინდვრებია, მსაჯობის დონეც ამაღლებულია, მეტოქეებიც გაძლიერდნენ.

ფეხბურთის განვითარების ფონდი ფეხბურთის ფედერაციასთან ერთად, აქტიურად არის ჩართული ეროვნული ჩემპიონატის გაუმჯობესების პროცესში. მჯერა, მომავალში ჩემპიონატის დონე კიდევ უფრო მოიმატებს”.

“საბურთალო” მალე ჩემპიონთა ლიგის საკვალიფიკაციო ეტაპზე ითამაშებს და გუნდის მიმართ ინტერესი მატულობს. ჭიაბრიშვილმა თავის მოლოდინებზე ილაპარაკა: “მთავარი საფიქრალი ამ ეტაპზე ეროვნული ჩემპიონატის დარჩენილი მატჩებია. ამის შემდეგ, უკვე გადავერთვებით ევროტურნირებზე. კენჭისყრას სხვადასხვანაირი გამოხმაურება მოჰყვა, თუმცა ერთს ვიტყვი - არცერთი ქვეყნის ჩემპიონი არ იქნება იოლი მეტოქე, ისევე, როგორც “საბურთალო” არ იქნება”.

“საბურთალომ” ბოლო დღეებში საინტერესო ტრანსფერები განახორციელა - დაიბრუნა გიორგი რეხვიაშვილი და თავდამსხმელი გიორგი გაბედავა დაიმატა. ჭიაბრიშვილმა ტრანსფერები შეაფასა: 

“მოხარული ვარ, რომ რეხვიაშვილი დაგვიბრუნდა. გასული სეზონის დასრულების შემდეგ, დიდი სურვილი მქონდა, რომ გიორგი ჩვენთან დარჩენილიყო, თუმცა არ გამოვიდა. იგი დაცვით ხაზში ძალიან გაგვაძლიერებს. რაც შეეხება გაბედავას - მასთან გარკვეული დრო “გაგრაში” მაქვს ნამუშევარი, ვიცი მისი შესაძლებლობები. ამავდროულად, გადავხედოთ მის განვლილ კარიერას, ასევე გასულ წელს - გიორგი გაბედავამ 2018 წლის ფაქტობრივად ყველა ნომინაციაში გაიმარჯვა”.

მისი თქმით, უახლოეს მომავალში ტრანსფერებს კიდევ უნდა ველოდოთ: “ხელმძღვანელობისგან ყოველთვის დიდ მხარდაჭერას ვგრძნობ. მაქსიმალურად გვერდში მიდგანან, რათა ძლიერი კლუბი ჩამოვაყალიბოთ. ვცდილობთ, დავიბრუნოთ ლაზარე კუპატაძე, ამ საკითხზე მოლაპარაკება მიმდინარეობს. ასევე, რამდენიმე ქართველი ფეხბურთელის დამატებაზე ვმუშაობთ, ყველაფერი კი მალე გახდება ცნობილი. რაც შეეხება ლეგიონერებს - ძალიან რთულია კვალიფიციური ლეგიონერების დამატება, რადგან მათ უფრო მაღალი დონის ჩემპიონატში სურთ თამაში”.

“საბურთალოს” ერთბაშად სამ ტურნირზე უწევს ბრძოლა. ცხადია, საინტერესოა, არის თუ არა გუნდში საკმარისი რესურსი: “ჩვენი გუნდის ცხოვრებაში პირველად ხდება, რომ გუნდს დასვენების საშუალება არ ექნება. სხვა ქართულ კლუბებსაც უწევს ასეთ რეჟიმში მუშაობა, თუმცა ჩვენთვის პირველი იქნება. მჯერა ჩემი ფეხბურთელებისა და სტაფის. იმედი მაქვს, სასურველი მიზნის მიღწევას შევძლებთ”.

ჭიაბრიშვილმა კენჭისყრის შედეგებზე კიდევ ერთხელ ილაპარაკა, სადაც “საბურთალო” მოლდოვურ “შერიფს” შეხვდება: “სტატისტიკა ყველაფერზე მეტყველებს - ფაქტობრივად, ყოველ წელს ევროტურნირებზე დამაჯერებლად თამაშობენ. ამავდროულად, ჯგუფურ ეტაპზე თამაშების გამოცდილებაც აქვთ. ძლიერი და წარმატებული კლუბია, როგორც ევროასპარეზზე, ასევე შინაურ ჩემპიონატზე. მაღალკვალიფიციური ფეხბურთელების დიდი რესურსი აქვთ, ფინანსურად საკმაოდ გამართული გუნდია. თუმცა, ფინანსურ მხარეს ნაკლებად ვუყურებ, რადგან ფეხბურთი მხოლოდ ფული არ არის”.

ყოველდღიური სპორტული გაზეთი "ლელო"
1227
მკითხველის კომენტარები / 3 /
rodi
0
ვფიქრობ ჭიაბრიშვილის დონის მწვრთნელი შერიფს ვერ გაცდება...
ასევე
0
(ძალიან რთულია კვალიფიციური ლეგიონერების დამატება, რადგან მათ უფრო მაღალი დონის ჩემპიონატში სურთ თამაში)... არ მესმის ეს ფრაზა,რადგან აზერბაიჯანი და კაზახური ჩემპიონატი უფრო დაბალი დონის იყო და აბა იქ რატო ჩავიდნენ ძლიერი ლეგიონერები? მარტივად გეტყვი ჭიაბრ არა დაბალი დონის ჩემპია მიზეზი არამედ ფულის გადახდა რომელსაც მაღალი დონისანი ითხოვენ...აბა მიეცი იმდენი რასაც კაზახეთში უხდიან თუ არ ჩამოვლენ......
მსგავსი ამბები
რუბრიკის სხვა სიახლეები
;