კუტალიამ ირტიში გააფრთხილა!.. როგორ გაჰქონდა თავი უხელფასოდ დარჩენილ ქართველ ბომბარდირს?

გადაწყვეტილება მიღებულია - ყაზახეთის საფეხბურთო ჩემპიონატი 1 ივლისს განახლდება. პროფესიული ლიგის პრეზიდენტმა ოლჟას აბრაევმა ამის შესახებ გამოცემა "ვესტისთან" ილაპარაკა.

ყაზახეთის ჩემპიონატი თავისთავად არ დაგვაინტერესებდა, რომ არა იქაური სოლიდური ქართული დიასპორა. ბარემ შეგახსენებთ - შიმკენტის "ორდაბასის" კახა ცხადაძე და გიორგი ჩიხრაძე ავარჯიშებენ, კოსტანაის "ტობოლში" საქართველოს ნაკრების სამი ფეხბურთელი - ჯაბა კანკავა, ნიკა კვეკვესკირი და ლუკა ზარანდია თამაშობს, ყიზილორდის "ქაისარში" - "ჯვაროსნების" თავდამსხმელი გუჯა ლობჟანიძე ერთ-ერთი ლიდერია, პეტროპავლოვსკის "ყიზილ-ჟარში" ირიცხებიან შოთა გრიგალაშვილი და თამაზ ცეცხლაძე, ხოლო პავლოდარის "ირტიშში" - ლევან კუტალია. თუმცა, ამ უკანასკნელის გუნდი დაიშალა და ჯერ უცნობია, კარიერას სად გააგრძელებს...

ამაზე ცოტა ქვემოთ, მანამდე კი გეტყვით, რომ ყაზახეთის პრემიერლიგა უმაყურებლოდ განახლდება. კლუბებს უფლება აქვთ, თამაში სამჯერ შეაჩერონ და 5-5 მოთამაშე შეცვალონ, ხოლო სათადარიგოებში 12 მოთამაშე შეიყვანონ (სულ ოქმში - 23 ფეხბურთელი).

რაც შეეხება კუტალიას, გასაგები მიზეზების გამო ის საქართველოში ვერ ბრუნდება. მისი კლუბი, პავლოდარის "ირტიში", დაშლილად გამოაცხადეს და ახალ კლუბში ჩარიცხვამდე, პავლოდარელებთან ურთიერთობას ფიფაში გაარკვევს.

30 წლის თავდამსხმელს "ირტიშთან" ფინანსური დავა აქვს, განთავისუფლების ფურცელი უნდა აიღოს და მხოლოდ ამის შემდგე გამოაცხადებს, სად ითამაშებს. კუტალიას რამდენიმე გუნდში გადასვლის ვარიანტი ჰქონდა. თბილისის "დინამოდან" 2020 წლის იანვარში წავიდა, სადაც საქართველოს ჩემპიონი და ეროვნული ლიგის საუკეთესო ბომბარდირი გახდა და ინტერესიც ბუნებრივია. ლევანს ბუდუ ზივზივაძეს "მეზოკოვეშდიც" (უნგრეთი) იწვევდა, მაგრამ ყაზახეთში გადასვლა არჩია. ცხადია, იქ უკეთესი პირობების იმედად წავიდა, თუმცა დიდი ხელში შერჩა დიდი იმედგაცრუება.

კლუბს ვინ ჩივის, ქართველი თავდამსხმელი პავლოდარშია და საქართველოში გამომგზავრებას ვერ ახერხებს, რადგან ყაზახეთის საზღვრები ჯერ კიდევ ჩაკეტილია. "ლელო" კუტალიას დაუკავშირდა და ინტერვიუ ჩაწერა.

- ცნობილია, რომ "ირტიში" ფეხბურთელებს ხელფასს იანვრიდან ვეღარ უხდის...

 - სამწუხაროდ, "ირტიშში" მართლაც სერიოზული ფინანსური პრობლემები იყო. პრემიერლიგაში გამოსვლას გუნდი ამის გამო ვეღარ აგრძელებს. ჩემპიონატიდან გუნდი უკვე მოიხსნა. კლუბის ხელმძღვანელობამ გვითხრა - აღარც სპონსორები არიან, ბიუჯეტი აღარ გვაქვს და ლეგიონერებს ფულს ვეღარ გადავუხდითო. პირადად მე, ხელფასი მხოლოდ ჩასვლის დროს ავიღე, მეტი აღარაფერი მიმიღია. 4 თვე უხელფასოდ გვამყოფეს.

- პანდემიის გამო ყაზახურ ფეხბურთს სხვებზე მეტი პრობლემა გაუჩნდა?

- ხელფასები ყველა კლუბში დააკლეს - ზოგან 20 პროცენტი, ზოგან - 30... მაგრამ ისეთი რამ, რაც ჩვენთან მოხდა, არ გამიგია. პირველად უნდოდათ, 60 პროცენტით დაეკლოთ, მაგრამ უარზე რომ წავედით, ამის შემდეგ უკვე თქვეს, ფული აღარ არის და კლუბი უმაღლეს ლიგაში აღარ იქნებაო.

- ყაზახური გამოცემების ცნობით, გუნდს 9 ლეგიონერი უჩივის. ფიფაში სარჩელი უკვე შეიტანე?

- ადვოკატს ველაპარაკე და უკვე ყველა საბუთი გამზადებული აქვს და სარჩელს მალე შეიტანს. მანამდე ფიფას წესი დავიცავი და კლუბს 1 ივნისს გამაფრთხილებელი წერილი გავუგზავნე. თუ 14 დღის განმავლობაში პასუხი არ იქნება, ამის მერე თავისუფალი აგენტი გავხდები და ფიფაში სარჩელს შევიტან.

- ფიფაში სარჩელის შეტანისას ფულია გადასახდელი?

- მე მხოლოდ ის ვიცი, რომ თანხის დარიცხვისას 10 პროცენტს ადვოკატი მიიღებს.

- ასეთ დროს ყველაზე მეტად უცხოელებს გაგიჭირდებოდათ - ამ პერიოდში რითი ცხოვრობდი და ამ რთულ პერიოდი როგორ გაიტანეთ თავი?

- რა თქმა უნდა, პრობლემაა, როცა გუნდი არაფერს გიხდის, არადა, კლუბს როგორც ხელფასი ასევე ბინის ქირაც უნდა გადაეხადა და ამასაც არ აკეთებდა.

- ბინის ქირას თავად იხდიდი?!

- დიახ, მე ვიხდიდი და საერთოდაც ჩემი ხარჯებით ვცხოვრობდი. მოკლედ, თავი გავიტანე და ამ რთულ ვითარებას გავუძელი. ამას ისიც დაემატა, რომ პავლოდარში ვიყავი და საქართველოში ვერ ჩამოვდიოდი. საზღვრები უცებ ჩაკეტეს და წამოსვლა ვერ მოვახერხე.

- საზღვრებს როდის გახსნიან?

- როგორც გვითხრეს, 15 ივნისიდან.

- ფულს თუ არ გიხდიან, ჩამოსვლას როგორ მოახერხებთ? ახლა ავიარეისების ფასი კატასტროფულად გაიზარდა. კლუბი ამის ფულს მაინც გადაიხდის?

- ჯერ არაფერი არ ვიცი. ბევრი რამ მაქ გასარკვევი...

- გავრცელდა ინფორმაცია, რომ ქუთაისის "ტორპედო" გიწვევ. ეს რამდენად დასაჯერებელია?

- ვერაფერს ვიტყვი. ერთი იმას ვიტყვი, რომ რამდენიმე შემოთავაზებაა, მათ შორის, საქართველოდანაც.

- თქვი, რომ თუ ვარიანტი იქნებოდ, ყაზახეთში დარჩებოდთ. გამოჩნდა რამე?

- ვარიანტები ყაზახეთიდანაც არის, მაგრამ ჯერ კონკრეტული არაფერია.

- "მეზოკოვეშდის" წინადადება ისევ ძალაშია?

- ჯერ კლუბთან ბევრი რამ მაქვს გასარკვევი - დავალიანების საკითხი, გათავისუფლების ფურცელი და მერე მეცოდინება, სად ვითამაშებ. არის ვარიანტები, მაგრამ ჯერ ახალი არაფერია.

- რამდენ ხანში გადაწყდება ეს ყველაფერი?

- რაც შეიძლება მალე მინდა ახალი კლუბი გაირკვეს და ვნახოთ, რა გამოვა.

1218
მკითხველის კომენტარები / 0 /
მსგავსი ამბები
რუბრიკის სხვა სიახლეები
;