ლადო ბურდული ერთა ლიგაზე: ჯგუფზე რთული კალენდარი მგონია

ერთა ლიგაში საქართველოს ნაკრებისგან ყველა მაქსიმუმს ველით. სანამ თამაშები დაიწყება, მანამდე მთავარი თემა ჩვენი გუნდის შანსებზე მსჯელობაა.

ვფიქრობთ, საინტერესო რესპონდენტი შევარჩიეთ. საქართველოს ნაკრების პერსპექტივას ეროვნული გუნდის ყოფილი ნახევარმცველი ლადო ბურდული აფასებს...

- რა თქმა უნდა, იოლი ჯგუფი არ არის, მაგრამ მე მაინც ბოლომდე მჯერა, რომ ამ ჯგუფში წარმატების მიღწევა შეგვიძლია, - თქვა ბურდულმა საუბრის დასაწყისში, - ჩემი აზრით, ჯგუფზე უფრო რთულია კალენდარი.

ვეთანხმები ლევან კობიაშვილს. ამასწინათ თქვა - ჩვენ რომ ვთამაშობთ ანდორაში, მოწინააღმდეგეს მეტი დრო რჩება დასვენებისთვისო. ეს ფაქტია.

ჩვენ ვმსჯელობთ შესარჩევ ჯგუფზე, მაგრამ არ უნდა დაგვავიწყდეს ის, რომ ჯგუფიდან გასვლის შემდეგ ვაგრძელებთ ბრძოლას და თუ გვინდა, რომ ევროპის ჩემპიონატზე გავიდეთ, პირველი ადგილი უნდა დავიკავოთ. რთული იქნება, მაგრამ მჯერა, რომ ეს თაობა შეძლებს ამ მიზნის მიღწევას.

- რას იტყვით საქართველოს ნაკრების მეტოქეებზე?

- ყაზახეთსა და ლატვიას ალბათ ის აერთიანებს, რომ ერთიც და მეორეც, ასე თუ ისე, რუსულ საფეხბურთო სკოლას წარმოადგენს. მათი თამაში აგებულია ფიზიკურ მომზადებაზე.

ყაზახეთის ნაკრებში ბევრია რუსული წარმოშობის ფეხბურთელი. ყველასთვის ცნობილია, რომ ის მოთამაშეები, რომლებიც ვერ ხვდებოდნენ და ვერ ხვდებიან რუსეთის ნაკრებში, იღებენ ყაზახურ პასპორტს და თამაშობენ ამ ქვეყნის ეროვნულ გუნდში.

ლატვიის ნაკრების მთავარი კოზირიც ესაა - კარგი ფიზიკური მომზადება, თამაშის ორგანიზაცია. ფაქტია, არავითარ შემთხვევაში არ შეიძლება არცერთი მეტოქის შეუფასებლობა. ლატვიას თბილისში 5:0 კი მოვუგეთ, მაგრამ ეს არაფერს ნიშნავს, ყველაფერი იწყება თავიდან, სუფთა ფურცლიდან.

რაც შეეხება ანდორას, ორი აზრი არ არის იმასთან დაკავშირებით, რომ საქართველოს ნაკრებმა ამ გუნდს ორივე მატჩი უნდა მოუგოს. არ უნდა დაგვავიწყდეს ისიც, რომ ჩვენ უნდა ვიზრუნოთ ბურთების სხვაობაზეც.

არის შანსი, რომ ეს გადამწყვეტი ფაქტორი აღმოჩნდეს ჩვენს ჯგუფში. ალბათ, არ შევცდები, თუ ვიტყვი, რომ ამ მოკლე ტურნირში ყველა საშინაო თამაში უნდა მოვიგოთ. ყაზახეთი და ლატვია, რომ იტყვიან, "დაჭამენ" ერთმანეთს. ესეც გასათვალისწინებელია.

- რომელი ფაქტორები შეიძლება აღმოჩნდეს გადამწყვეტი ამ ჯგუფში წარმატების მისაღწევად?

- უპირველეს ყოვლისა, ეს არის სტაბილურობა. მეტოქეებზე წინ ვართ კონტინგენტით, ტექნიკური არსენალითა და ტაქტიკური განათლებით. ამას გამოყენება სჭირდება.

საქართველოს ნაკრების ბოლო მატჩებს თუ გადავხედავთ, ჩვენ სულ გვქონდა გამონათებები. კარგად ვთამაშობდით კონკრეტულ ტაიმს, ან ტაიმნახევარს... ახლა ასე უნდა ვითამაშოთ მთელი შეხვედრის განმავლობაში და წარმატება აუცილებლად მოვა.

არის კიდევ ერთი მნიშვნელოვანი ფაქტორი - ძალიან ბევრი რამ იქნება დამოკიდებული იმაზე, თუ როგორ ვითამაშებთ დამაგვირგვინებელ ფაზაში. მოწინააღმდეგის კართან შექმნილი სახიფათო მომენტები მაქსიმალურად უნდა გამოვიყენოთ.

- თქვენი აზრით, ჩვენს ჯგუფს ფავორიტი თუ ჰყავს?

- ფავორიტად დავასახელებდი საქართველოს. კი, დიდი ფული ტრიალებს ყაზახურ ფეხბურთში, მაგრამ მე მაინც ვრჩები ჩემს აზრზე.

- თუ არ ვცდები, ფეხბურთელობისას თქვენ გითამაშიათ ყაზახეთისა და ლატვიის ნაკრებთა წინააღმდეგ...

- ორივე გუნდს ვიცნობ. ყაზახეთის ნაკრების მთავარი პლუსი იქნება საშინაო მატჩები. არ დაგვავიწყდეს - ისინი ხელოვნურ საფარზე თამაშობენ. ასევე არაერთ ლატვიელთან მითამაშია და მათ წინააღმდეგაც ვყოფილვარ მაშინ, როცა ვთამაშობდი რუსეთსა და ლატვიაში.

- ჩვენთვის რამდენად სასარგებლო იქნება ის, რომ ვლადიმირ ვაისი კარგად იცნობს ყაზახეთის ეროვნულ ნაკრებს, ის ხომ ცოტა ხნის წინ მუშაობდა ამ ქვეყანაში?

- ეს ძალიან მნიშვნელოვანი ფაქტორია ჩვენთვის. წლების განმავლობაში ვითამაშე უკრაინაში და ამ ქვეყნის ლიგასაც ძალიან კარგად ვიცნობ. კი, შეიძლება იცვლებიან ფეხბურთელები, მაგრამ უცვლელია სპეციფიკა.

ყოველდღიური სპორტული გაზეთი "ლელო"
1245
მკითხველის კომენტარები / 0 /
მსგავსი ამბები
რუბრიკის სხვა სიახლეები
;