[სპეციალისტის აზრით] ლადო ბურდული: შეუცვლელი არავინაა,  ვერ გაამართლებს  ერთი? მოვა სხვა... როცა საქმე ეხება საქართველოს  ნაკრებს, ასე არ უნდა ითამაშო! 

საქართველოსა და დანიის ნაკრებთა მატჩის შესახებ ვესაუბრეთ ეროვნული გუნდის ყოფილ ნახევარმცველ ლადო ბურდულს, რომელმაც ძალიან საინტერესოდ ილაპარაკა სადღეისო პრობლემებზე...

- მოდით, ძირითადად დანიის ნაკრებთან მატჩზე ვილაპარაკოთ, - გვთხოვა ბურდულმა საუბრის დასაწყისში, - ისევე, როგორც ყველა გამარჯვება, გიბრალტართან მოგებაც სასიამოვნო იყო. თუმცა იმ შეხვედრაში ისე განვითარდა მოვლენები, როგორც ამას ყველა ველოდით...

- თქვენი აზრით, რა მოხდა დანიაში?

- რა თქმა უნდა, ნაკრებმა ძალიან ცუდად ითამაშა. თავის გასამართლებლად არ ვამბობ, მაგრამ იყო ლოგიკური მიზეზიც. გიორგი ჩაკვეტაძე, ჯანო ანანიძე, თორნიკე ოქრიაშვილი, საბა კვირკველია, გიორგი ქვილითაია, დავით ხოჭოლავა, ლევან მჭედლიძე... მეშინია კიდეც, ვინმე არ გამომრჩეს, ნაკრებს ერთბაშად იმდენი ლიდერი აკლდა...

სიმართლეს თვალებში ჩავხედოთ და ვთქვათ, რომ ამ ეტაპზე ჩვენ არ გვაქვს იმის რესურსი, რომ ამდენი ფეხბურთელი ჩავანაცვლოთ. თანაც, სულ ლიდერებზეა ლაპარაკი. საქართველოს ნაკრებს კი არა, მასზე ძლიერ გუნდს შეიძლება დაეტყოს ამხელა დანაკლისი. მეორე მხრივ, როცა გაქვს პრეტენზია იმაზე, რომ იყო ნაკრების ძირითადი შემადგენლობის წევრი, რომ მოგეცემა შანსი, ის მეტად უნდა გამოიყენო. ერთადერთი, ვინც მომეწონა, იყო საბა ლობჟანიძე. აქ მხოლოდ გოლში არ არის საქმე. ზოგადად, როცა საქმე ეხება საქართველოს ნაკრებს, ასე არ უნდა ითამაშო.

- რამდენად ეთანხმებით ვაისის გადაწყვეტილებას, როცა დანიასთან მატჩი უფორვარდოდ დაიწყო?

- მე არ გამოვდგები ვაისის კრიტიკოსად, ამხელა გამოცდილების მწვრთნელია... უბრალოდ, მე შემიძლია, აზრი გამოვთქვა, როგორც ქართული ფეხბურთის რიგითმა ქომაგმა. მგონია, რომ ასეთი განლაგება მიუღებელია. ცენტრფორვარდი ნებისმიერ შემთხვევაში აუცილებელია, დაიჭერს ბურთს, გუნდს ამოასუნთქებს... კიდევ ერთხელ ვიმეორებ - ეს არ არის კრიტიკა, ეს ჩემი აზრია...

- გასაგებია, დანია ძლიერია, მაგრამ მხოლოდ ამით თავის მართლებაც არ ივარგებს...

- რა თქმა უნდა, არა. ასე რომ ავიღოთ, დანიაზე ძლიერია ესპანეთი და მას ჩვენ მოვუგეთ. დღეს თამაში ყველასთან შეიძლება, მაგრამ უნდა ვთქვა ისიც, რომ ყველა გუნდის ცხოვრებაში არის კარგი და ცუდი მატჩები. დანიასთან შეხვედრა არის ის თამაში, რომელიც, რაც შეიძლება, მალე უნდა დაივიწყოს საქართველოს ნაკრებმა. ასე თურქებმაც მოუგეს საფრანგეთს, მსოფლიოს ჩემპიონს, თან ისე, რომ მომენტიც არ შეაქმნევინეს.

- როგორ ფიქრობთ, უნდა დარჩეს ვლადიმირ ვაისი ნაკრების მთავარი მწვრთნელის პოსტზე, თუ...

- ჩემი აზრით, ვლადიმირ ვაისმა მოიყვანა გუნდი აქამდე და მიმაჩნია, რომ სწორედ მან უნდა უხელმძღვანელოს საქართველოს ნაკრებს ერთა ლიგის დარჩენილ შეხვედრებში. მიმაჩნია, რომ სწორედ ასე იქნება მართებული. საქართველოს ნაკრები ცოცხალი ორგანიზმია.

თუ საჭირო იქნება, შეიძლება ბევრი რამ შეიცვალოს მასში, თუ ვინმე ვერ გააკეთებს კარგად საქმეს, რაოდენ დიდი დამსახურებაც უნდა ჰქონდეს, შეიცვლება და მის ადგილზე მოვა სხვა. თუ ისიც ვერ გაამართლებს, კიდევ სხვა და ასე შემდეგ...

ჩემი აზრით, როცა ყველა ფეხბურთელი ჯანმრთელადაა, საქართველოს ნაკრები ასეთ შემთხვევაში ძალიან კონკურენტუნარიანი გუნდია. ახალი თაობიდან ძალიან მომწონს ვატო არველაძე. მას აქვს თავდამსხმელისთვის დამახასიათებელი მოძრაობები და სტილი, ცალკეა გენეტიკა, რომელიც არ იკარგება.

- და ბოლოს: ისევ გაისმა ხმები, რომ ფეხბურთი არ უნდა დაფინანსდეს, რომ ფული წყალში იყრება, რომ ფეხბურთი არ არის ჩვენი საქმე... ვიცით, რომ ამ საკითხთან დაკავშირებით ძალიან მკვეთრი პოზიცია გაქვთ...

- შემიძლია ნებისმიერს დავუჯდე და ვეკამათო, რომ ეს ასე არ არის. ფეხბურთი ჩვენი თამაშია! ის გენში გვაქვს, ის ჩვენს სისხლშია!.. გასაგებია, არ გვაქვს მთლად სახარბიელო სიტუაცია, მაგრამ რომ ხედავ მიჭირს, “მაზოლზე” კი ნუ მაჭერ ფეხს, გამოდი და როგორც შეგიძლია, ისე დამეხმარე. ეს ხომ შენი ქვეყნის პირველი გუნდია? როგორ დავიჯერო, რომ ის ხალხი, ვინც საქართველოში ფეხბურთის გაუქმებას ითხოვს, ასე უნაკლოა თავის პროფესიაში? არა მგონია, ასე იყოს.

ჩვენ ერთმანეთს ხშირად ვუდებთ კვანტს. არადა, სუფრასა და სადღეგრძელოებში მაგრები ვართ ძალიან. 9-9 ბურთით აგებენ ნაკრებები და ხალხი მაინც ტაშს უკრავს და ამხნევებს. მე ღრმად ვარ დარწმუნებული, რომ საქართველოს ნაკრებს აქვს მომავალი. უბრალოდ, საჭიროა, ერთად დავდგეთ. ფეხბურთი ძალიან ბევრს ნიშნავს ქართველი კაცისთვის და ეს ფაქტია. 

ყოველდღიური სპორტული გაზეთი "ლელო"
3694
მკითხველის კომენტარები / 4 /
Roma
0
Ra naxet am vato arveladzeshi erti gamagebinet? Gaviget rom mamiko da bidzis pontshi qatinaurebs ar ishurebt magram magis tolebi daprinaven vinc kargi motamashea.
tamazi tsomaia
0
კრიტიიკულ კომენტარებს რატომ ბლოკავთ ნაბოზვრებო?
მსგავსი ამბები
რუბრიკის სხვა სიახლეები
;