ლადო ხინჩეგაშვილი და გენო პეტრიაშვილი - მსოფლიოს ჩემპიონები კლუბებში

ქართველი მოჭიდავეები - ვლადიმერ ხინჩეგაშვილი (61) და გენო პეტრიაშვილი (125) მსოფლიოს საკლუბო ლიგის ჩემპიონები გახდნენ. მათ ამ წარმატებას ირანული "იზი პაიპ კაშანის" რიგებში მიაღწიეს, თავად კი კლუბის წარმატებაში ლომის წილი დაიდეს.

განსაკუთრებით - პეტრიაშვილმა, ვინც ფინალურ შეხვედრაში, ნატკენი ნეკნის მიუხედავად, გადამწყვეტი გამარჯვება მოიპოვა მოქმედ ჩემპიონთან, ამერიკულ "ტიტან მერკურთან" (შარშან მათ რიგებში ხინჩეგაშვილი გამოდიოდა).

თან იმ პაექრობაში არა შემთხვევით ფალავანს, არამედ მსოფლიოს ბრინჯაოს მედალოსან ნიკ გვაზდოვსკის აჯობა.

ხინჩეგაშვილმა საკლუბო ჩემპიონატში უკლებლივ ყველა პაექრობა მოიგო, პეტრიაშვილმა კი მხოლოდ პირველი შეხვედრა დაუთმო თანამემამულე ლევან გოგრიჭიანს, როცა კაშანელებმა ქართულ "რაინდს" მოუგეს.

მძიმე წონების შეხვედის დროს პაექრობის ბედი ირანელთა სასარგებლოდ იყო გადაწყვეტილი.

მსოფლიოს IV საკლუბო ჩემპიონატი თეირანში გაიმართა და "იზი პაიპმა" ფინალში "მერკურს" 6:4 სძლია. ხინჩეგაშვილმა პირწმინდად დაამარცხა ალან უოტერსი: 7:0 და, ზოგადადაც, კაშანელები 4:0 დაწინაურდნენ. თუმცა ამერიკელებმა მომდევნო სამ პაექრობაში იმარჯვეს და ანგარიში მინიმუმადე დაიყვანეს: 3:4.

მეტოქეებმა ამას მონაცვლეობით ისევ თითო მოგება მიაყოლეს და ბოლო შეხვედრის წინ ანგარიში კვლავ მინიმალური იყო ირანელთა სასარგებლოდ: 5:4. ბოლო შეხვედრაში პეტრიაშვილმა გვაზდოვსკის 6:5 მოუგო და თავის გუნდს ჩემპიონობაც მოუტანა.

ის პირველად გახდა მსოფლიოს საკლჯუბო ჩემპიონი, ხინჩეგაშვილი - მესამედ. როგორც გითხარით, მან შარშან ანალოგიური წარმატება "ტიტან მერკურთან" ერთად იზეიმა, შარშანწინ კი - ირანულ "ბიმეჰ რაზისთან".

ამ ტურნირში ჩვენი "რაინდი" მეხუთე ადგილზე გავიდა. გადამწყვეტ შეხვედრაში მათ ინდოელებს მოუგეს: 6:4.

2202
მკითხველის კომენტარები / 0 /
მსგავსი ამბები
რუბრიკის სხვა სიახლეები
;