ლადო ხინჩეგაშვილი ევროპის ჩემპიონობისთვის ბრძოლას გამოეთიშა

კასპიიისკში (რუსეთი) მიმდინარე ევროპის 2018 წლის ჩემპიონატზე თავისუფალ ჭიდაობაში ჩვენი ნაკრების ყველაზე ტიტულოვანი წევრი ლადო ხინჩეგაშვილი საჩემპიონო ბრძოლას გამოეთიშა.

არადა, შეჯიბრება ლადომ ძალიან კარგად დაიწყო – პირველ შეხვედრაში ხვდებოდა სომხეთის ნაკრების წევრს ვალოდია ფრანგულიანს, რომელიც საკმაოდ კარგი ფალავანია, თუმცა ხინჩეგაშვილისთვის წინააღმდეგობის გაწევა გაუჭირდა და უშანსოდ დამარცხდა.

ქართველი მოჭიდავე მასთან პირველივე ნახევარში 3:0 დაწინაურდა და შესვენების შემდეგ ბევრი არ უცდია ქულათა სხვაობის გაზრდა, ბოლომდე შეინარჩუნა ანგარიში და გადავიდა მეოთხედფინალში.

მომდევნო ეტაპზე ლადოს მეტოქე რუსეთის გუნდის წევრი ილიას ბეკბულატოვი გახლდათ. შეხვედრის მნიშვნელობასა და ხარისხზე დარბაზის დიქტორმაც ხაზგასმით აღნიშნა, როდესაც ამ წყვილის პაექრობა დღის ცენტრალურ შეხვედრად მონათლა, თუმცა ამის გარეშეც იგრძნობოდა ქომაგთა დიდი ყურადღება პაექრობისადმი.

ბეკბულატოვმა დაპირისპირების დასაწყისშივე შეძლო დაწინაურება. ანგარიშში ჩამორჩენის ამოქაჩვა ხინჩეგაშვილს ბევრჯერ წარმატებით მოუხერხებია, მაგრამ მცდელობის მიუხედავად სამწუხაროდ ქულის აღებაც ვერ შეძლო ტიტულოვანმა ქართველმა მოჭიდავემ და დამარცხდა 0:6. ახლა ის მისი მომგები მეტოქის ფინალში გასვლის შემთხვევაში ბრინჯაოს მედლისთვის ბრძოლას შეძლებს.

შეგახსენებთ, რომ ლადო ევროპის ჩემპიონატის მოქმედი გამარჯვებულია, ოღონდ 61 კგ-ში მოიპოვა მან შარშან ოქროს მედალი. საერთოდაც, ლადო 65 კგ-ში კონტინენტის ჩემპიონატზე პირველად ასპარეზობს. ეს მისთვის ახალი წონაა და გორელი ფალავანი ერთგვარად ადაპტაციასაც გადის ახალ წონაში.

1577
მკითხველის კომენტარები / 0 /
მსგავსი ამბები
რუბრიკის სხვა სიახლეები
;