ინტერვიუ ხინჩეგაშვილის პირად მწვრთნელ ნუგზარ სხირელთან: ლადოს ვერცხლი მორიგ ოქროს გვაახლოვებს

ტიტულოვანმა ლადო ხინჩეგაშვილმა ევროპის თამაშებზე მინსკში თავისი კარიერის მორიგი მედალი მიითვალა, ის აღნიშნული შეჯიბრების ვიცე-ჩემპიონი გახდა. ფინალამდე ლადომ მეტად შთამბეჭდავი და პრინციპული შეხვედრები მოიგო, ფინალში კი მსოფლიოს სამგზის ჩემპიონ აზერბაიჯანელ ჰაჯი ალიევთან დამარცხდა. ჩვენს ფალავანს მასთან რიოს ოლიმპიადაზე მოგებული ჰქონდა, თუმცა ამჯერად მოწინააღმდეგემ იძალა.

ხინჩეგაშვილის გამოსვლის შეფასება მის პირად მწვრთნელს ბატონ ნუგზარ სხირელს ვთხოვეთ.

ლადო ხინჩეგაშვილი: თავისუფალში რუსეთს ყოველთვის ძლიერი მოჭიდავეები ჰყავს, ამიტომაცაა მათთან გამარჯვება სასიამოვნო [ექსკლუზივი მინსკიდან]

- დავიწყოთ იმით, რომ ლადომ შეკრების მიმდინარეობისას ნეკნი დაიზიანა და ვერ ვიტყვი, თითქოს სრულად ახერხებდა პოტენციალის რეალიზებას. თუ გახსოვთ ფინალში ალიევთან ერთ ეპიზოდში მოწინააღმდეგე ფეხით აიყვანა და ხალიჩიდან გაყვანისას ქულათა მეტი რაოდენობა უნდა აეღო, მაგრამ გაუჭირდა, რადგან ამ ფანდის შესრულებისას მთელი სხეულია ჩართული და მე აშკარად ვიგრძენი როგორ შეუშალა ხელი ნატკენმა ნეკნმა განზრახულის შესრულებაში.

- მოლდოველ პერპელიცასთან და რუს ჩაკაევთან დაპირისპირებებისას კიდევ ერთხელ ვნახეთ, რა კარგად გამოსდის ლადოს ანგარიშში ჩამორჩენის შემდეგ ქულათა მარაგის ამოქაჩვა და საქმის გამარჯვებამდე მიყვანა.

- დიახ, მის მიერ ამ გზით მოგებული ძალიან ხშირად გვინახავს, თუმცა რასაკვირველია ყოველთვის რომ შეძლო ასე გამარჯვება - უაღრესად ძნელია.

- ხინჩეგაშვილის და ჩაკაევის კიდევ ერთი პრინციპული შეხვედრა გამოვიდა მაყურებლისთვის თვალსასეირო და ორივე მოჭიდავის მაღალი კლასის მაჩვენებელი.

- მასთან ლადოს მიერ ბოლო წამებზე მოგებული ბრწყინვალე პაექრობა ევროპის ჩემპიონატის ფინალში ყველას კარგად ახსოვს. სამწუხაროდ, ლადო შარშან დამარცხდა ჩაკაევთან, მაგრამ ევროპის თამაშებზე ისევ გვაჩვენა თავისი კლასი და შესაძლებლობები. ისე კი, თუ დააკვირდებით ერთ მოწინააღმდეგესთან ორჯერ, მით უფრო ზედიზედ - ლადო არ აგებს.

- ამ ლოგიკით ალიევთან მომდევნო შეხვედრაში მოგებას უნდა ველოდოთ?

- რა თქმა უნდა. ლადოსგან ყოველთვის მოგებას ველით და ყველა შეჯიბრებაზე მისთვის მხოლოდ ჩემპიონობაა დამაკმაყოფილებელი.

- თანაც ამასობაში 65 კგ-ში ცოტა გაჭიანურებული ადაპტაციაც ვფიქრობთ დასრულდა. ამ წონაში ევროპის ჩემპიონატის ბრინჯაო, ევროპის თამაშების ვერცხლმა შეცვალა. ახლა ლადოსთვის ახალ წონაში ოქროც მოპოვების დროა.

- ყველამ იცის რომ ეს არაა ლადოს წონა და ფაქტობრივად იძულებით უწევს 65 კგ-ში ასპარეზობა. მისთვის უმჯობესი 61 კგ იქნებოდა, მაგრამ ეს წონა არ არის ოლიმპიური. ოლიმპიადა კი ყველა შეჯიბრებაზე უფრო მნიშვნელოვანია. 65 კგ-ში მოასპარეზეს ბუნებრივი წონა 70 კგ უნდა ჰქონდეს და შეჯიბრების წინ 4-5 კილოგრამის იკლებდეს. ამ თვალსაზრისით ლადოს ფაქტობრივად წონით თავისზე მძიმეებთან უწევს ჭიდილი. მიუხედავად ყველაფრისა, ჩვენ საქმე გვაქვს დიდებულ სპორტსმენთან და მოჭიდავესთან, ლადო მაინც ლადოა და მისგან დიდ გამარჯვებებს ველით.

4124
მკითხველის კომენტარები / 1 /
poti
0
olimpiuri chempioni xar lado, ra minski ris minski
მსგავსი ამბები
რუბრიკის სხვა სიახლეები
;