გვსურს გურია ფეხზე დავაყენოთ

ლანჩხუთის გამგებელმა, ალექსანდრე სარიშვილმა ლანჩხუთის "გურიას" ახალი აღმასრულებელი დირექტორი დანიშნა - ეროვნულ საფეხბურთო ლიგა 3-ში დაქვეითებულ კლუბს ამიერიდან დავით ყენია უხელმძღვანელებს.

ყენია თანამდებობაზე გურიის გუბერნატორმა მერაბ ჭანუყვაძემ და ლანჩხუთის მუნიციპალიტეტის მერმა ალექსანდრე სარიშვილმა წარადგინეს.

"ეს მნიშვნელოვანი გადაწყვეტილებაა. დარწმუნებული ვარ, ბათონი დავითი თავის გუნდთან ერთად ამლე შეძლებს იმ პრობლემების მოგვარებას, რომლის წინაშეც "გურია" ბოლო პერიოდში დადგა" - ამბობს მერაბ ჭანუყვაძე.

39 წლის დავით ყენია რამდენიმე წელი სპორტული გაზეთის, "ოლიმპის" ჟურნალისტი გახლდათ. 10 წლის წინ, საფეხბურთო მენეჯერი გახდა. დღემდე გიორგი ქინქლაძისა და გოგა გახოკიძის მიერ დაფუძნებული სამენეჯერო სააგენტოსთან თანამშრომლობს. უცხოეთში არაერთი ქართველი ფეხბურთელის ტრანსფერის თანამონაწილეა. 2011-2012 წლებში ქუთაისის "ტორპედოს" ტრანსფერების მენეჯერად მუშაობდა, ხოლო ბოლო სამი წელი ბათუმის "დინამოსთან" თანამშრომლობდა. 2013 წელს დააარსა სამენეჯერო კომპანია, რომელიც თურქულ კურორტებზე ქართული გუნდების შეკრებებს ორგანიზებას უწევს.

"ლელო" კომენტარისთვის ყენიას დაუკავშირდა და მან კომენტარი გუნდთან დაკავშირებულ გეგმებზე გააკეთა.

"ჩვენი სურვილია, რომ გუნდი დალაგდეს, მთავარი მწვრთნელი დროულად დაინიშნოს და სეზონისთვის მზადებას უახლოეს დღეებში შევუდგეთ. ჩემპიონატი კარს მოგვარდა და ჯერ შემადგენლობა არ გვყავს. ზოგადად კი, ვიტყვი, რომ გვსურს "გურია" ფეხზე დავაყენოთ, გრიგოლეთის ბაზა თანამედროვე დონეზე შევაკეთოთ და ინფრასტრუქტურით ლანჩხუთი გამორჩეული გახდეს" - აბობს ყენია.


3624
მკითხველის კომენტარები / 0 /
მსგავსი ამბები
რუბრიკის სხვა სიახლეები
;