ლაშა გოგონაია: შარშანდელთან შედარებით, კოლხეთი გაძლიერდა

ფოთის "კოლხეთი 1913" თურქული შეკრებიდან დაბრუნდა და მშობლიურ ქალაქში ემზადება. რაგბის "პარკი არენზე" კოლხების მთავარმა მწვრთნელმა კონსტანტინე გალკინმა გუნდი ფიზიკურად და ბურთით დატვირთა, მოგვიანებით კი ფეხბურთელებთან თეორიული მეცადინეობა ჩაატარა.
სეზონისათვის მზადების შესახებ "ლელოს" გუნდის კაპიტანი ლაშა გოგონაია ელაპარაკა. მას ჯერ განახლებულ შემადგენლობაზე ველაპარაკეთ.

"ფოთის "კოლხეთი" სეზონის განახლებას რადიკალური ცვლილებებით იწყებს. შარშანდელი გუნდიდან რამოდენიმე ფეხბურთელი დარჩა, ხოლო მათი ჩანაცვლება საკმაოდ კარგი და გამოცდილი ლეგიონერებითა და ეროვნული ლიგის ისეთი ფეხბურთელებით მოხდა, რომლებსაც ქართვრლი გულშემატკივარი კარგად იცნობს. იმედი გვაქვს, რომ მათი გამოცდილება და კარგი თამაში ფოთის "კოლხეთს" დიდად გამოადგება" – ამბობს გოგონაია.

გუნდის კაპიტანი ახალ მწვრთნელსა დამ ის მოთხოვნებზე გველაპარაკა: "მწვრთნელს რაც შეეხება, საკმაოდ ძლიერი სპეციალისტი გვყავს, რომელიც კარგი ფეხბურთის მიმდევარია, გამორჩეული სტილითა და მოთხოვნებით. ცოტა არ იყოს, თავიდან ამ მოთხოვნების შესრულება გაგვიჭირდა.

მაგრამ მერე შევეჩვიეთ და ამ ეტაპზე ყველაფერი კარგად არის. სხვათა შორის, გაგიკვირდებათ და სულაც არაა რაღაც უაზრო ფიზიკური დატვირთვების მოყვარული. პირიქით, მაქსიმალურად ცდილობს, გუნდი ბურთით სწორად დატვირთოს. ეს კი ფეხბურთელებს ფიზიკური კონდიციებსაც საკმაოდ უზრდის. მოკლედ, საინტერესო მწვრთნელია".

გოგონაიას თქმით, ახალი "კოლხეთი" შარშანდელზე ამბიციური იქნება: "შარშანდელთან შედარებით, ფოთის "კოლხეთი" ახალ სეზონის დაწყებას ბევრად გაძლიერებული შემადგენლობით შეხვდება. პირველი ტური მოგვიახლოვდა და თავადაც იხილავთ, რომ გულშემატკივარს ბევრ კარგ თამაშსა და სიურპრიზს შევთავაზებთ".

1226
მკითხველის კომენტარები / 0 /
მსგავსი ამბები
რუბრიკის სხვა სიახლეები
;