ლაშა დვალი: პოლონელებს ჩემი გაშვება არ უნდოდათ

ლაშა დვალი, რომელმაც უნგრულ "ფერენცვაროშთან" კონტრაქტი გააფორმა, ახალ გუნდთან ერთად უკვე ივარჯიშა და საწრთნელ მატჩშიც მიიღო მონაწილეობა.

"დიდი ხანი არც მიფიქრია, როც "ფერენცვაროშის" წინადადება მივიღე. ამ კლუბის ისტორიასა და ტრადიციაზე ბევრი მსმენია. გუნდის მთავარი მწვრთნელი სერგეი რებროვია, რომელიც ჩემთვის ერთ-ერთი გამორჩეული მოთამაშე იყო", - ეს დვალმა "ფერენცვაროშის" ოფიციალურ გვერდთან ინტერვიუში განაცხადა.

1899 წელს ბუდაპეშტში დაარსებული "ფერენცვაროში" უნგრეთის ყველაზე ტიტულოვანი და პოპულარული საფეხბურთო კლუბია. მის ისტორიაში ყველაზე დიდი მიღწევა 1965 წელს "ბაზრობათა თასის" მოგებაა, როცა ფინალში "იუვენტუსი" დაამარცხა, ორ წელიწადში კი ამავე გათამაშების ფინალში მეორედ გავიდა და დამარცხდა. 1975 წელს თასების მფლობელთა თასის ფონალშიც იყო, სადაც კიევის "დინამოსთან" 0:3 წააგო.

დღეს სწორედ კიევის "დინამოს" ყოფილი ფორვარდი სერგეი რებროვია მწვრთნელი "ფერენცვაროშისა", რომელიც უნგრეთის ჩემპიონატში 18 ტურის შემდეგ 39 ქულით პირველ ადგილზეა.

საქართველოს ნაკრების მცველმა ტრანსფერის დეტალები გაიხსენა: "მოლაპარაკება დაახლოებით ორი კვირის წინ დაიწყო. საინტერესო შეთავაზება იყო და გადაწყვეტილებაც მალე მივიღე. "ფერენცვაროში" ტრადიციული და ისტორიული კლუბია, რომელსაც დიდი მიზნები და გეგმები აქვს. პოლონელებს ჩემი გაშვება არ უნდოდათ. თუმცა დაველაპარაკე კლუბის ხელმძღვანელობას. ჩემთვის, "ფერენცვაროშში" გადასვლა წინ გადადგმული ნაბიჯი და იმის შანსია, რომ განვითარდე და თავი კარგად წარმოვაჩინო. საბოლოოდ პოლონელებმა გამიგეს და წარმატებები მისურვეს".

დვალის თქმით, უნგრეთში გადასვლამდე იქაურ ფეხბურთში ჩახედულ მოთამაშეებს ელაპარაკა: "აზრი ვკითხე ბაჩანა არაბულს და პოლონეთში ჩემს ორ ყოფილ თანაგუნდელს, რომლებმაც უნგრეთის ჩემპიონატი კარგად დამიხასიათეს. რაც შეეხება კლუბს, "ფერენცვაროშზე" გარკვეული წარმოდგენა და ინფორმაცია თავადაც მქონდა. გუნდს ჩემპიონობის დიდი შანსი აქვს. ყველაფერი ჩვენს ხელშია და იმედია, ამ შანსს გამოვიყენებთ. ეს იყო ერთ-ერთი მთავარი ფაქტორი, რის გამოც არჩევანი ამ კლუბზე შევაჩერე".

901
მკითხველის კომენტარები / 0 /
მსგავსი ამბები
რუბრიკის სხვა სიახლეები
;