ლაშა თაქთაქიშვილის სამი მედალი ჭაბუკ ძალოსანთა მსოფლიოს ჩემპიონატზე

ლას ვეგასში (აშშ) ჭაბუკ ძალოსანთა მსოფლიოს ჩემპიონატზე საქართველოს ნაკრების წევრმა, 17 წლის ლაშა თაქთაქიშვილმა ჩვენი დელეგაციის ყულაბას სამი ვერცხლის მედალი შემატა.

102 კილოგრამ წონით კატეგორიაში მან ატაცისას სამივე ცდა (123, 127, 130) გამოიყენა და ვერცხლის მედალი მოიპოვა. ქართველ ძალოსანს ბულგარელმა დიმიტროვ სტეფკო ხრისტოვმა აჯობა - 145 კილოგრამით მან პირველი ადგილი დაიკავა. 125 კილოთი მესამე იყო აზერბაიჯანელი ალი შუქურლუ.

აკვრაში ლაშა თაქთაქიშვილს ორი ცდა გამოუვიდა შედეგიანი და 160 კილოგრამით ისევ მეორე ადგილზე გავიდა. 170 კილოგრამით პირველობა აქაც ხრისტოვს ერგო, კვარცხლბეკის მესამე საფეხური შუქურლუმ დაიკავა.

102 კგ
1. დიმიტროვ სტეფკო ხრისტოვი (ბულგარეთი) 315 (145+170)
2. ლაშა თაქთაქიშვილი (საქართველო) 290 (130+160)
3. ალი შუქურლუ (აზერბაიჯანი) 280 (125+155)

გუშინ ლას ვეგასში საქართველოს ჭაბუკთა ნაკრების მთავარ მწვრთნელ ზურაბ ანთაურს შევეხმიანეთ.

- ორმა ქართველმა ძალოსანმა მსოფლიოზე 5 ვერცხლის მედალი მოიპოვა - ორი ჯილდო გურამ გიორბელიძის (67 კგ), ხოლო სამი - ლაშა თაქთაქიშვილის ანგარიშზეა, - გვითხრა მან. - ამასთანავე, გიორბელიძემ 17-წლამდელებში ევროპის ორი და საქართველოს ერთი რეკორდი გააუმჯობესა, ლაშამ კი საქართველოს ორ მიღწევას გადაამეტა - ატაცსა და ორჭიდში მან თავისივე რეკორდები 3-3 კილოგრამით დაამძიმა. მინდა, რომ ამერიკაში მიღწეული წარმატება მივულოცო ორივე ათლეტს, მათს პირად მწვრთნელებსა და საქართველოს ძალოსნობის ფედერაციას, რომელმაც სპორტის სამინისტროსთან ერთად ჩვენს ბიჭებს ყოველგვარი პირობები შეუქმნა შეჯიბრებისთვის მოსამზადებლად.

მსოფლიოს ჩემპიონატზე 81 კილოგრამ წონით კატეგორიაში უნდა ეასპარეზა მანუჩარ გოგოხიას, მაგრამ ამერიკის საელჩომ მას, გაურკვეველი მიზეზებით, ქვეყანაში შესვლის უფლება არ მისცა. არადა, გოგოხიას ვარჯიშებზე ამ წონაში მე-2 ადგილზე გასული სპორტსმენის შედეგებზე უკეთესი მაჩვენებლები ჰქონდა. ასე რომ, ამერიკის საელჩომ, სულ მცირე, ორი ვერცხლის და ერთი ბრინჯაოს მედალი დაგვაკარგვინა..

ყოველდღიური სპორტული გაზეთი "ლელო"
667
მკითხველის კომენტარები / 0 /
მსგავსი ამბები
რუბრიკის სხვა სიახლეები
;