ლაშა თოთაძე: დინამო მაშინ დამეხმარა, როცა ბევრმა ჩამომწერა

შემთხვევითი არ არის, რომ საქართველოს ეროვნული ჩემპიონატის საუკეთესო მცველად თბილისის "დინამოს" 29 წლის უკანახაზელი ლაშა თოთაძე დავასახელეთ.

ის დინამოელთა შემადგენლობაში ერთ-ერთი გამორჩეული გახლდათ და ჩემპიონატში გატანილი 7 გოლით გუნდში მესამე შედეგი აქვს.
თოთაძემ მთელი სეზონი ძალიან სტაბილურად ჩაატარა.

არც ის არის შემთხვევითი, რომ ის შვიდჯერ მოხვდა "ლელოს" ტურის სიმბოლურ ნაკრებში. რაც მთავარია, ახალგაზრდა დინამოელებისთვის ფასდაუდებელი იყო მისი და ლაშა სალუქვაძის გამოცდილება...

გუშინ "ლელოს" ერთ-ერთ რჩეულს დავუკავშირდით და ინტერვიუ ჩავწერეთ...

- თავდაპირველად, დასრულებული სეზონის შეფასება უნდა გთხოვოთ...

- რა თქმა უნდა, საწყენი იყო ის, რომ ბოლო ტურში დავკარგეთ საქართველოს ჩემპიონობა. "დინამო" თითქმის მთელი პირველობის განმავლობაში ლიდერობდა და კარგ ფეხბურთს თამაშობდა... რას ვიზამთ, ეს ფეხბურთია. ახლა მოდით მეორე მხრიდან შევხედოთ საკითხს.

მოგეხსენებათ, როგორი იყო ჩვენი გუნდის შემადგენლობა - არაერთი ისეთი მოთამაშე გვყავდა, რომლის ასაკიც ამ დროისთვის ძალიან ახალგაზრდულია. სხვანაირად რომ ვთქვათ, მხოლოდ მე და ლაშა სალუქვაძე ვიყავით გამოცდილი ფეხბურთელები.

თავდაპირველად, მიზნად სამეულში შესვლა გვქონდა დასახული, მაგრამ მერე თანდათან ამბიციამაც მოიმატა... ასე იყო თუ ისე, ერთი რამ დანამდვილებით შემიძლია გითხრათ - ამ "დინამოს" მომავალი აქვს და ის გეზი, რომელიც კლუბის ხელმძღვანელობამ აიღო, უთუოდ გაამართლებს.

თავადაც დამეთანხმებით, ეს ბიჭები გამუდმებით პროგრესირებენ. როცა ვლაპარაკობთ "დინამოს" მეორე ადგილზე, უნდა გავითვალისწინოთ ისიც, რომ შუა სეზონში რამდენიმე მნიშვნელოვანი ფეხბურთელი დაგვაკლდა, მათ შორის - გიორგი ჩაკვეტაძე.

მე მაინც მგონია, რომ ახალგაზრდა ფეხბურთელებმა ძალიან კარგად გამოიყენეს ის შანსი, რომელიც მიიღეს.

- როცა თვალს ვავლებთ თქვენს კარიერას, იქმნება შეგრძნება, რომ სასურველზე ხშირად იცვლიდით კლუბებს. ეთანხმებით ამ აზრს?

- საერთოდ, კარიერის განმავლობაში იყო მომენტები, როცა შეცდომას ვუშვებდი. ჩემი აზრით, საქართველოდან ძალიან ადრე წავედი. პატარა ბიჭი ვიყავი და, ალბათ, არ უნდა გადამედგა ეს ნაბიჯი.

მოვხვდი კიევის "დინამოში". ეს გუნდი თავისი მენტალიტეტითა და სტატუსით არის ნამდვილი გრანდი. უნდა გითხრათ პირდაპირ - იქ ძალიან გამიჭირდა ფეხის მოკიდება. ჯერ პირველ გუნდში ვიყავი, მერე - მეორეში... საბოლოოდ მოხდა ისე, რომ თავდაჯერება დავკარგე. ეს კი ძალიან მნიშვნელოვანი რამაა ფეხბურთელისთვის.

ძნელია, როცა ხარ ახალგაზრდა, გიწევს უცხო გარემოსთან ადაპტაცია და შენს პოზიციაზე თამაშობს ფეხბურთელი, რომელშიც 10-15 მილიონი ევროა გადახდილი... კიევის "დინამოს" შემდეგ იყო უნგრული "დიორი". იქაურ ჩემპიონატზე კარგის მეტს მართლა ვერაფერს ვიტყვი.

საკმაოდ მაღალი დონის პირველობაა. სამი წლის განმავლობაში ძირითადი შემადგენლობის ფეხბურთელი ვიყავი. შეიძლება ჩავთვალოთ, რომ უნგრეთში ჩემი კარიერა შედგა. მყავდნენ ძალიან კარგი თანაგუნდელები, მათ შორის - უაღრესად გამოცდილი სერბი და ხორვატი, რომელთაგან ძალიან ბევრი ვისწავლე.

ამის შემდეგ მოხდა ისე, რომ საქართველოში დავბრუნდი. გუნდების ნაწილი, სადაც ვთამაშობდი, თავისუფლად შემიძლია მივაკუთვნო ერთწლიანი გუნდების კატეგორიას.

ამანაც დაამჩნია კვალი ჩემს კარიერას... რაც შეეხება ჩემს აწმყოს, თბილისის "დინამოში" ბედნიერი ვარ. მე "დინამოს" გაზრდილი ვარ და სულ მინდოდა, რაც შეიძლებოდა მეტად გამოვდგომოდი ამ გუნდს. საბოლოოდ მოხდა ისე, რომ ახალ კონტრაქტზე შევთანხმდით.

დაუფარავად ვიტყვი - არაერთ სარფიან შეთავაზებაზე ვთქვი უარი. შარშან, როცა კარიერაში რთული პერიოდი მედგა, მხოლოდ თბილისის "დინამომ" გამიხსენა და მაგრძნობინა, რომ ვიღაცას კიდევ ვჭირდებოდი. არადა, მაშინ ბევრმა ჩამომწერა... ნებისმიერი ფეხბურთელისთვის ძალიან მტკივნეულია ამის შეგრძნება.

- რა თქმა უნდა, ამის თაობაზე ბევრჯერ გისაუბრიათ, მაგრამ ერთხელაც უნდა გკითხოთ - რას უნდა მივაწეროთ თქვენი საჯარიმოები, რომელთაც ხშირად ულამაზესი გოლები მოჰყვება ხოლმე?

- ვერ ვიტყვი, რომ ამაში რაღაც განსაკუთრებულია. ხანდახან, თავადაც გამკვირვებია, ისეთი გოლი გამიტანია. ძალიან ხშირად ვვარჯიშობ ხოლმე ამ კომპონენტზე. ალბათ ნიჭიც უნდა გქონდეს, სხვანაირად ძალიან რთულია. ვარჯიშებზე ხშირად არ გამომდის გატანა, თუმცა თამაშის დროს გამაქვს ხოლმე.

- "ტორპედოსთან" საჩემპიონო მატჩი დისკვალიფიკაციის გამო გამოტოვეთ. არადა, "საბურთალოსთან" მატჩის 94-ე წუთზე ყვითელი ბარათი რომ არ მიგეღოთ, შეიძლებოდა, ყველაფერი სხვანაირად ყოფილიყო. ფაქტია, ეროვნული ლიგის დასკვნით მატჩში "დინამოს" თქვენი გამოცდილება ძალიან დააკლდა...

- ძალიან განვიცადე, რაც მაშინ მოხდა. ვიცოდი, რომ აღარ უნდა მიმეღო ყვითელი ბარათი და მთელი მატჩი ისე წავიდა, საერთოდ არ მიუხეშია. 94-ე წუთზე კი მოხდა ასეთი ეპიზოდი - მსაჯს შეეძლო, მოეცა ან არ მოეცა ყვითელი ბარათი. არის ხოლმე ფეხბურთში ეპიზოდები, როცა ყველაფერი 50/50-ზეა და საბოლოოდ მსაჯმა უნდა მიიღოს გადაწყვეტილება.

რა თქმა უნდა, მაშინ ძალიან ემოციურად გავაპროტესტე ის, რაც მოხდა. ზოგადად, ვერ დავმალავ იმას, რომ ემოციური ვარ. მერე ძალიან კი ვინანე, რაც მოხდა, ორი დღე საერთოდ არ მიძინია... რა თქმა უნდა, ახლა მსაჯებს არ გავაკრიტიკებ.

მინდა, საკითხს სხვა მხრიდან შევხედო. საქართველოს ჩემპიონატი 36 ტურისგან შედგება. გამოდის, რომ ძალიან ინტენსიური პირველობა გვაქვს. ხომ არ იქნებოდა უპრიანი, 4 ან 5 ყვითელი ბარათის მიღების შემთხვევაში გამოტოვოს ფეხბურთელმა ესა თუ ის მატჩი. თუ თვალს გადავავლებთ წამყვან ევროპულ ჩემპიონატებს, იქ სწორედ ასეა.

- გვაინტერესებს ისიც, რომელ პოზიციაზე უფრო კომფორტულად გრძნობთ თავს - ცენტრალური თუ მარცხენა მცველის?

- უფრო ცენტრალური მცველის პოზიციაზე, მაგრამ როგორც გადაწყვეტს მწვრთნელი და სადაც გუნდს დასჭირდება, ფეხბურთელმა სწორედ იქ უნდა ითამაშოს. არავინ ჩათვალოს ისე, თითქოს კახა კაჭარავა ახლა თბილისის "დინამოს" მწვრთნელია და ამ სიტყვებით დამატებითი დივიდენდების მიღება მინდა.

უბრალოდ, უნდა ვთქვა, რომ მის გაწვრთნილ გუნდში თამაში ძალიან მიადვილდება. კაჭარავა, ასე ვთქვათ, იტალიური სამწვრთნელო სკოლის მიმდევარია. მას მაინცდამაინც არ უყვარს რისკი და დაჟინებით არ მოითხოვს, რომ მცველი სულ შეტევაში იყოს სულ ჩართული.

ფეხბურთელი საკუთარ ნაკლსა და სტილზე ღიად უნდა ლაპარაკობდეს. მე უფრო წამრთმევი მცველი ვარ და ისეთი, ვისაც შეუძლია, პასი მისცეს თანაგუნდელს. არ ვარ ტექნიკური არსენალით მაინცდამაინც განებივრებული.

- ისევე, როგორც ყველა, თავის დროზე თქვენც ვიღაცის მაგალითზე იწყებდით კარიერას. ახლა კი თავად ხართ მისაბაძი მაგალითი იმ ახალგაზრდებისთვის, რომლებიც პირველ ნაბიჯებს დგამენ ფეხბურთში. თუნდაც მცველის ამპლუიდან რომ ავიღოთ, რომელ ფეხბურთელს გამოარჩევდით საქართველოს ჩემპიონატში?

- მინდა გამოვარჩიო ლუკა ლოჩოშვილის თამაში. მოგეხსენებათ, ის კარიერას კიევის "დინამოში" აგრძელებს. მას მხოლოდ წარმატებებს ვუსურვებ მას.

- ისე გამოდის, რომ ლუკა თქვენს გზას გადის...

- ვუსურვებდი, ჩემი კი არა, კახა კალაძის გზა გაიაროს. მე სად ვითამაშე იმხელა ფეხბურთი... ლუკა ახალგაზრდა, პერსპექტიული ბიჭია, ჩემი მეგობარია და რაც შემეძლო, რჩევები მივეცი. იმედია, სამომავლოდ წაადგება...

ისევ თქვენს კითხვას დავუბრუნდები და საქართველოს ჩემპიონატიდან გამოვარჩევდი დავით კობოურს თბილისის "დინამოდან", ჩემს თანაგუნდელს... ასევე მინდა გამოვარჩიო ქუთაისის "ტორპედოს" უკანახაზელის გიორგი ქიმაძის კარგი თამაში, განსაკუთრებით - შეტევაში. ასე რომ, ჩვენთანაც არიან კარგი მცველები.

ყოველდღიური სპორტული გაზეთი "ლელო"
1613
მკითხველის კომენტარები / 0 /
მსგავსი ამბები
რუბრიკის სხვა სიახლეები
;