ლაშა თოთაძე: როცა შემეძლო, მაღალ დონეზე მეთამაშა, ეს შანსი ვერ გამოვიყენე

საქართველოს ეროვნული ლიგის ერთ-ერთი მთავარი ხიბლი "დინამო"-"ტორპედოს" საჩემპიონო ბრძოლაშია. "დინამომ" გასულ ტურში უმნიშვნელოვანესი 3 ქულა მოიპოვა გორში, სადაც "დილას" უაღრესად დაძაბული მატჩი მოუგო. დინამოელთა ტრიუმფის გარდა, ამ შეხვედრაში აღსანიშნავი სხვაც იყო - თბილისელთა ცენტრალური მცველის, ლაშა თოთაძის შესანიშნავი გარჯა, რომელმაც საენდშპილო "სტანდარტულით" გამარჯვება მოაპოვებინა თავისიანებს.

თოთაძეს ერთმანეთის მიყოლებით გააქვს გოლები საქართველოს ჩემპიონატის მატჩებში და თანაც, სულ - სტანდარტული სიტუაციებიდან. რა თქმა უდა, "დინამოს" ერთ-ერთ ლიდერთან გასაუბრება საინტერესო უნდა იყოს...

- ბოლო ტურებში რეგულარულად გაგაქვთ გოლები. ცხადია, ეს შემთხვევითობა ვერ იქნება. ალბათ, ჯერ კიდევ ბავშვობიდან მუშაობდით ძლიერ და ზუსტ დარტყმაზე...
- სიმართლე გითხრათ, ბავშვობიდანვე სწორედ იმით გამოვირჩეოდი თანატოლებს შორის, რომ ძლიერი დარტყმა მქონდა. ჩავდიოდი ეზოში და როცა გუნდი-გუნდზე ვთამაშობდით, ვურტყამდი, როცა და როგორც შემეძლო. მერე, საქართველოდან რომ წავედი, კიევის "დინამოში" მიწევდა საჯარიმოების შესრულება. ძირითადი ვარჯიში რომ მორჩებოდა, ვრჩებოდი და საჯარიმოების დარტყმაზე ვვარჯიშობდი.

- საინტერესოა თქვენი აზრი თანამედროვე "დინამოზე"...
- კარგი გუნდი გვყავს, ამაზე ორი აზრი არ არის. ვფიქრობ, ამ გუნდს შეუძლია, საქართველოს ჩემპიონი გახდეს. დანარჩენი მომავალმა უნდა თქვას. ჩანს, რომ "დინამოს" დიდი პოტენციალი აქვს.

- საჯარიმოების შესრულებაზე უნდა გკითხოთ. რა არის თქვენი საიდუმლო?
- ბავშვობიდან რომ ძლიერი დარტყმა მქონდა, ეს უკვე გითხარით. საქართველოში თამაშის პირველი პერიოდის დროსაც ვვარჯიშობდი ჯარიმებზე, მაგრამ ამ კუთხით უფრო მოვუმატე მას შემდეგ, რაც კიევში წავედი.

- როგორ ურტყამთ ჯარიმას?
- საინტერესო ამბავი უნდა გითხრათ იმ დროიდან, როცა უნგრეთში ვთამაშობდი. ერთი მწვრთნელი მყავდა, ძალიან კარგი სპეციალისტი. კუთხეს ვირჩევდი და ისე ვურტყამდი. სიმართლე გითხრათ, ხშირად ვერც ხვდებოდა მიზანში. მწვრთნელმა მითხრა, როცა "სტანდარტულს" ასრულებ, კუთხეს კი არა, მთავარია, კარში მოარტყა ბურთი, დანარჩენზე არ იფიქროო. მე იმ დღიდან მის რჩევას მივდევ.

- დღესაც განსაკუთრებით ვარჯიშობთ "სტანდარტულების" შესრულებაზე?
- კი, "დინამოში" ჩვენ დამატებით შეგვიძლია ვივარჯიშოთ საკუთარ პლუს-მინუსებზე.

- თავის დროზე, როცა შანსი გქონდათ, რატომ ვერ დამკვიდრდით კიევის "დინამოში"?
- კიევის "დინამოს" დროინდელ პერიოდს რაც შეეხება, ალბათ, რამდენიმე ფაქტორის თანხვედრა იყო. ალბათ, ძალიან ახალგაზრდა ვიყავი იმ დროისთვის. რა თქმა უნდა, კონკურენცია ძალიან დიდი იყო. მეორეც - არ მყავდა გვერდით ის ადამიანი, რომელიც რჩევას მომცემდა. აგერ, სულ ცოტა ხნის წინ ჩემი თანაგუნდელი და მეგობარი, ლუკა ლოჩოშვილი წავიდა კიევის "დინამოში" და ჩემი მოკრძალებული რჩევები მივაშველე...

მერე, თანდათანობით მეც გული ამიცრუვდა გუნდზე, თან მენეჯერები მპირდებოდნენ ევროპაში მოწყობას... სამწუხაროდ, საქართველოში არის კატეგორია მენეჯერებისა, რომელიც ფეხბურთელს უფრო ხელს უშლის კარიერის აწყობაში, ვიდრე ეხმარება. როცა შემეძლო, რომ უფრო მაღალი დონის ფეხბურთი მეთამაშა, რიგი მიზეზების გამო, ვერ გამოვიყენე ეს შანსი, მაგრამ, მგონი, გვიან არც ახლაა.

- საქართველოს ნაკრებზეც ვთქვათ, სადაც უკვე იყავით გამოძახებული...
- კახა ცხადაძე მიძახებდა საქართველოს ნაკრებში, მაგრამ ისე მოხდა, რომ ოფიციალური მატჩი ჯერ არ ჩამიტარებია ეროვნულ გუნდში. რა თქმა უნდა, ყველა ფეხბურთელის მთავარი მიზანი ნაკრებში თამაშია. ბუნებრივია, გამონაკლისი არც მე ვარ, ოღონდ, ეგ არის, რომ ობიექტურობის გრძნობა არ უნდა დაკარგო.

ძალიან კარგად ვიცი, რამხელა კონკურენციაა ნაკრებში ჩემს პოზიციაზე. გადაჭარბების გარეშე ვიტყვი, რომ საქართველოს ნაკრების დაცვაში გუნდის ლიდერები თამაშობენ. თავადაც დამეთანხმებით, გურამ კაშიასა და საბა კვირკველიას წინაც კარგი სეზონი ჰქონდათ და ახლაც შესანიშნავად თამაშობენ. მინდა, წარმატებები ვუსურვო მათ. მე კი ცდასა და მონდომებას არ დავაკლებ საიმისოდ, რომ ნაკრებში თამაშის პატივი დავიმსახურო.

- საქართველოს ჩემპიონატის დონეზე რას იტყვით?
- ვხედავ გარკვეულ პროგრესს, ეგ არის, რომ უცბად არ ხდება ყველაფერი. თუნდაც, დაძაბულობის მხრივ რომ ავიღოთ, ვხედავთ, რომ 3 გუნდი იბრძვის ჩემპიონობისთვის. ევროპალიგაზე გამსვლელი ადგილისთვისაც დიდი ბრძოლაა, ლიგაში დასარჩენადაც... არ არის მატჩები, რომლებშიც წინასწარ რაიმე გაქვს გარანტირებული.

ამას გარდა, ძალიან ბევრი კარგი ახალგაზრდა ფეხბურთელი გამოჩნდა. როგორ შეიძლება, ეს არ გახარებდეს?! ამასთან, ჩემი აზრით, არც ზედმეტად გაახალგაზრდავებაა გამოსავალი. მაგალითად, ჩვენი გუნდი ახალგაზრდული კია, მაგრამ არიან გამოცდილებიც. თუნდაც, ლაშა სალუქვაძე რომ ავიღოთ. საქმისადმი მისი მიდგომა სამაგალითოა ახალგაზრდა მოთამაშეებისთვის. თავის დროზე, "დინამოში" ჩისკოსთან ერთად მომიწია ყოფნამ. მან მე ძალიან ბევრი რამ მასწავლა.

მთლიანობაში, პატარა ნიუანსები იყრის თავს ერთად და საბოლოოდ ვიღებთ შედეგს. ფეხბურთში წვრილმანები არ არსებობს. მაგალითად, მე ვისწავლე, როგორ უნდა დაისვენო ვარჯიშის შემდეგ, როგორ უნდა იკვებო... ამიტომაც ვამბობ, რომ გუნდში გამოცდილი ფეხბურთელის ყოლა აუცილებელია. ახალგაზრდა მის მაგალითზე ბევრს სწავლობს.

- კონკურეციის მიუხედავადა, "დინამო" ახლოსაა საქართველოს ჩემპიონობასთან...
- მოდით, ნუ გავუსწრებთ მოვლენებს. მე ასე ვიტყვი: ჩვენ რა მატჩებიც დაგვრჩა სათამაშო, ყველა ფინალის ტოლფასია და შესაბამისად ვართ განწყობილები. "დინამო" ყოველთვის უმაღლესი მიზნებისთვის იბრძვის და ყველაფერს გავაკეთებთ იმისთვის, რომ ამ მიზნებს მივაღწიოთ ჩემპიონატშიც და თასზეც.

- თუ არის თქვენთვის უხერხული ფორვარდი, ვის წინააღმდეგაც თან გსიამოვნებთ თამაში და თან ეს ძალიან რთულია?
- ახლა ის ფეხბურთელი აღარ თამაშობს. თორნიკე აფციაურს ვგულისხმობ. ის არ გამოირჩეოდა განსაკუთებული ფიზიკური მონაცემებით, მაგრამ უაღრესად ტექნიკური ფეხბურთელი იყო, თვითმყოფადი სათამაშო მანერა ჰქონდა... ბოლოს "სიონში" ერთად ვიყავით და ვხუმრობდით კიდეც ამ თემაზე...

დღესაც არიან ასეთი ფეხბურთელები. დინამოელებზე ვიტყვი. ვარჯიშის დროს ერთი სიამოვნებაა ოთარ კიტეიშვილის წინააღმდეგ თამაში. ვერ ვიტყვი, რომ იოლია, უფრო - პირიქით. იმავეს ვიტყვი გიორგი ჩაკვეტაძეზე, რომელიც ბელგიაში წავიდა და მინდა, წარმატებები ვუსურვო. ის ძალიან ნიჭიერია. მე მას ჩემს მეგობარ ლევან ყენიას შევადარებდი. ჩვენ ერთად გავიზარდეთ. ლევანს ტრავმებმა შეუშალა ხელი, თორემ ის მოწოდებული იყო იმისთვის, რომ დიდი ფეხბურთი ეთამაშა. მჯერა, ლევანი კიდევ გაგვახარებს.

ყოველდღიური სპორტული გაზეთი "ლელო"

898
მკითხველის კომენტარები / 0 /
მსგავსი ამბები
რუბრიკის სხვა სიახლეები