ლაშა თოთაძე: რუსთავში? წინადადება ნამდვილად იყო, მაგრამ ირანშიც მიწვევენ

გავრცელებული ინფორმაციით, ეროვნულ ლიგაში გადასული "რუსთავი" ლაშა თოთაძით გაძლიერდება. თბილისის "დინამოს" მცველი გუნდს წლეულს შეუერთდა და ერთი პერიოდი გუნდის კაპიტანიც გახლდათ.

29 წლის თოთაძემ კარგი სეზონი ჩაატარა, თბილისელებისთვის მნიშვნელოვანი რამდენიმე გოლის ავტორი გახლდათ და "ლელომ" წლის სიმბოლურ ნაკრებში დაასახელა.

- ქართული სეზონის ლაურეატები - ლელოს რჩეულები ეროვნულ ლიგაში

ლაშა თოთაძე "ლელოსთან" ამ ინტერესს ადასტურებს, მაგრამ არ მალავს, რომ სხვა წინადადებებს ელოდება:

- სანამ კითხვებს დამისვამთ, "ლელოს" მადლობა უნდა გადავუხადო, წლის სიმბოლურ ნაკრებში რომ დამასახელეთ.

- დასრულებული სეზონი თქვენთვის მართლაც გამორჩეული იყო - რამდენი გოლი გაიტანეთ ჯარიმიდან?
- 6 ჯარიმა გავიტანე და პლუს - პენალტი.

- ძლიერი დარტყმებით გამოირჩევით. ეს ვარჯიშების შედეგია თუ ბუნებრივად გამოგდით?
- ამით ჩემს გვარში გამონაკლისი არ ვარ. თანაც, 6 წლამდე ახალციხეში ვიზრდებოდი და ეტყობა, ამანაც გავლენა იქონია. ხომ იცით, რაიონებში უფრო ჯანიანი ბავშვები არიან.

- ჯარიმების შესრულებაზე ცალკე ვარჯიშობთ?
- რა თქმა უნდა. "დინამოს" ბაზაზე საამისოდ ყველანაირი პირობაა და ბიჭებს გვაქვს საშუალება, რომ მთავარი პროცესის შემდეგ ინდივიდუალურად ვივარჯიშოთ. ზოგი საკუთარი ნაკლის გამოსწორებას ცდილობს, ზოგი საკუთარი ძლიერი მხარის დახვეწას. მე ჯარიმების დარტყმა თავიდანვე კარგად გამომდიოდა და ამიტომ სიზუსტის დახვეწას ვცდილობ. სხვათა შორის, კახა კაჭარავას ინიციატივით, ბაზაზე სავარჯიშო კედელი აღადგინეს, რაც ახალგაზრდებისთვის ძალიან საჭირო სავარჯიშოა და გამოცდილებისთვისაც - აუცილებელი.

- დასრულებულ სეზონს როგორ შეაფასებთ?
- ამ 10-გუნდიან ფორმატს დადებითად შევაფასებდი, რადგან გაამართლა და სეზონი ძალიან მომეწონა, იმდენად დაძაბული და საინტერესო გამოდგა. ბოლოს და ბოლოს, ჩემპიონიც და ლიგიდან გავარდნილი გუნდის ვინაობაც ბოლო ტურში გაირკვა და მაყურებელს ასეთი ჩემპიონატი აინტერესებს. ქულას ვერც ერთ გუნდთან ვერ დაგეგმავდი. კიდევ უფრო რთული სეზონი "დინამოსთვის" იყო, რადგან ჩვენთან ყველა გაორმაგებული მონდომებით თამაშობდა.

- თქვენი აზრით, გუნდმა ჩემპიონობა რატომ ვერ მოიპოვა?
- ვიცე-ჩემპიონობაც კარგი შედეგი იყო და მიმაჩნია, რომ სეზონი "დინამოსთვისაც" წარმატებული გამოდგა. აქვე ქუთაისის "ტორპედოს" ჩემპიონობას ვულოცავ.

- "დინამოსთვის" ჩემპიონობის გარდა ყველა შედეგი მიუღებელია - ასე არ არის?
- დიახ, ზუსტად ასეა. რაც შეეხება ჩვენს მეორე ადგილს - გაგახსენებთ, რას ამბობდნენ სეზონის დაწყებამდე, რომ "დინამომ" ჩამოწერილი ან ძალიან გამოუცდელი ფეხბურთელები შეკრიბა და ამ შემადგენლობით გავარდებაო. ასე არ იყო? ძირითადად, პატარა ბიჭები გვყავდა, გუნდის საშუალო ასაკი 20-21 წელია და სეზონის მსვლელობისას შემადგენლობა სამჯერ შეიცვალა.

ჩემით დაინტერესებული კლუბის წარმომადგენელი რომ ჩამოვიდა და ჩვენი ჩემპიონატის შეხვედრას დაესწრო, გაკვირვებული დარჩა, ირანის ჩემპიონატთან შედარებით, საქართველოში სამოყვარულო ფეხბურთის დონეაო

გაიხსენეთ, რამდენი მოთამაშე წავიდა - გველესიანი, ჩაკვეტაძე, არაბული, ლობჟანიძე, პაპუნაშვილი, ლოჩოშვილი. პლუს სეზონის ბოლოს ზარია და ქარდავა დაშავდნენ და მათი არყოფნა გუნდს აშკარად დაეტყო. ამ ყველაფრის გათვალისწინებით ახალგაზრდული გუნდისთვის ვიცე-ჩემპიონობა ნამდვილად წარმატებაა. რაც მთავარია, "დინამოს" აკადემიაში გაზრდილი ბევრი ნიჭიერი ბავშვი გამოჩნდა. ეს კახა კაჭარავას დამსახურებაა, რომელიც საუკეთესო მოტივატორია, საჭირო დროს იცის ბიჭების დამუხტვა და სხვათა შორის, ისეთი მომთხოვნია, მასთან "თავში ავარდნა" გამორიცხულია. ამავე დროს, უკრაინელი ფიზმომზადების მწვრთნელის ჩამოყვანაც დაგვეხმარა. მიმაჩნია, რომ მან კარგად მოგვამზადა.

- საერთოდ, ლიგიდან გავარდნილი "სიონიდან" "დინამოში" თქვენი დაბრუნებაც მოულოდნელი იყო. რა დასამალია და, ამ დროისთვის ლამის ჩამოგწერეს.
- (იცინის) ლამის კი არა, ლიგიდან გავარდნილი გუნდის 28 წლის ფეხბურთელი მართლა ჩამომწერეს. "დინამოდან" "გაბალასთან" მატჩის შემდეგ გუნდიდან წამოვედი და დაინტერესება ჩემთვისაც დიდი მოულოდნელობა იყო. უკვე შეგუებული ვიყავი იმ აზრს, რომ პირველი ლიგის კლუბში ვითამაშებდი, რადგან სატრანსფერო "ფანჯარა" იხურებოდა. ამ დროს, რომან ფიფია დამელაპარაკა და პირადად დამაბრუნა. მან შანსი მომცა და გვერდში დამიდგა. ცხადია, მენდო კაჭარავა და მათამაშებდა. ვერ წარმოიდგენდით, მაშინ ჩემთვის ეს რას ნიშნავდა. ამიტომ მთელი სეზონი ვცდილობდი, რომ მადლობა ჩემი თამაშით გადამეხადა.

- გავრცელდა ინფორმაცია, თითქოს, "დინამოდან" წახვედით და "რუსთავში" ითამაშებთ...
- ჯერ "დინამოს" ვეკუთვნი და არ წავსულვარ. კონტრაქტი კიდევ ერთი წელი მაკავშირებს. უფრო სწორად, კონტრაქტის ვადა დასრულდა, მაგრამ ოფციონის წესითაა გაფორმებული და კლუბს მისი ერთი წლით გახანგრძლივება შეუძლია.

- ანუ წასვლის ამბავი ჭორია?
- შემოთავაზება ნამდვილად იყო, მაგრამ არა მხოლოდ "რუსთავიდან", სხვა კლუბებიდანაც.

- მათ შორის უცხოურიდანაც?
- დიახ, ასეთი ვარიანტიც არის. ახლა მისი დასახელების უფლება არ გამაჩნია, მაგრამ ზოგადად გეტყვით, რომ ირანში მიწვევენ. რა დასამალია, იქ ძალიან კარგი პირობებია და უკვე ისეთ ასაკშიც ვარ, რომ ბევრ რამეზე ვფიქრობ. ჩვენთან აზიურ ჩემპიონატებზე ბევრი არაფერია ცნობილი, მაგრამ იქ დონეც კარგია. ირანში გიორგი გველესიანი თამაშობს და მისგან ვიცი, რომ ზოგიერთ შეხვედრას 60-70 ათასი მაყურებელი ესწრება. პირობებიც ძალიან კარგია და სამწუხაროდ, ასეთი არჩევანის წინაშე რომ დადგები, ძნელია, მასზე უარი თქვა.

სხვათა შორის, ჩემით დაინტერესებული კლუბის წარმომადგენელი რომ ჩამოვიდა და ჩვენი ჩემპიონატის შეხვედრას დაესწრო, გაკვირვებული დარჩა, ირანის ჩემპიონატთან შედარებით, საქართველოში სამოყვარულო ფეხბურთის დონეაო.

- "დინამო" თანახმაა, რომ გაგიშვათ?
- კონტრაქტი 31 დეკემბერს იწურება და მერე ვნახოთ. თუმცა, ჯერ რომან ფიფიას უნდა შევხვდე და ყველაფერი მასთან შევათანხმო. როცა დამჭირდა, გვერდში დამიდგა და ამ ნაბიჯს მასთან შეუთანხმებლად არ გადავდგამ. მე კი მგონია, რომ "დინამოში" ნიჭიერი ბიჭები სულ გაიზრდებიან და ჩემი შემცვლელის მოძებნა ასეთი ტრადიციების მქონე კლუბს არ გაუჭირდება.

ყოველდღიური სპორტული გაზეთი "ლელო"
3360
მკითხველის კომენტარები / 0 /
მსგავსი ამბები
რუბრიკის სხვა სიახლეები
;