ლაშა ტალახაძე: საქართველოს რეკორდები მსოფლიოსაზე უკეთესია

თბილისის ფრენბურთის სასახლეში საქართველოს ძალოსანთა ეროვნული ჩემპიონატი ტრიუმფით დაასრულა რიოს თამაშების გამარჯვებულმა, მსოფლიოს და ევროპის ორგზის ჩემპიონმა ლაშა ტალახაძემ. მძიმე წონაში (+105 კგ) მან მესამე ცდაზე 264 კილოგრამი აკრა, რაც კილოგრამით აღემატება 2004 წელს ათენში ირანელი ჰოსეინ რეზა ზადეს მიერ დამყარებულ მსოფლიოს რეკორდს (ატაცში პირველობა ტალახაძეს ეკუთვნის - 220 კგ).

ორჭიდში ლაშამ 478 კილოგრამი მოაგროვა, რაც, ასევე, კილოგრამით მეტია მისსავე 2017 წლის მსოფლიო მიღწევაზე. ოღონდ საქმე ის არის, რომ ქართველი გოლიათის მიერ ნაჩვენები შედეგები მსოფლიოს რეკორდებად არ ჩაითვლება, რადგან ჩვენი ეროვნული ჩემპიონატი ძალოსნობის საერთაშორისო ფედერაციის კალენდარში არ შედის და შეჯიბრებას უცხოელი მსაჯები არ ემსახურებოდნენ. თუმცა ერთობ საამაყოა ის, რომ ქართველოს ეს რეკორდები მსოფლიოსას აღემატება და +105-ში ასეთად დარჩება მარად, რადგან პირველი ნოემბრიდან წონითი კატეგორიები იცვლება (მძიმე წონა იქნება +109 კგ).

კახი კახიაშვილი: ყველა რეკორდი ისტორიის საკუთრება გახდება, მათ შორის ტალახაძისა და ჩემიც

როგორც ვაჟები, ისე ქალები მსოფლიოს და ევროპის ჩემპიონატებსა და პირველობებზე, ასევე, საერთაშორისო ტურნირებში მედლებისთვის 10-10 წონით კატეგორიაში იბრძოლებენ, ხოლო ოლიმპიურ თამაშებზე ორივე სქესისთვის მედლების კომპლექტი 7-7 წონაში გათამაშდება.

წლეულს გაზაფხულზე ბუქარესტში უფროსებთან პაექრობისას 85 კილოში რევაზ დავითაძემ ევროპის ჩემპიონობა მოიპოვა, მერე ტაშკენტში 20-წლამდელთა მსოფლიოს პირველობაზე ორჭიდსა (356) და ატაცში (164) აჯობა ყველას, ხოლო აკვრაში (192) ვერცხლის მედალს დასჯერდა. დავითაძემ ეროვნულ ჩემპიონატშიც პირველი ადგილი დაიკავა.

ტაშკენტში ახალგაზრდების მსოფლიოზე 105 კილოში სამი ოქროს მედალი დაიმსახურა ირაკლი ჩხეიძემ. გასულ უქმეებზე კი უფროსებში მოიპოვა საქართველოს ჩემპიონობა. 94 კილოგრამ წონით კატეგორიაში ტიტული შეინარჩუნა 22 წლის ანტონ პლესნოიმ. იგი წარმოშობით უკრეინელია, შარშან მიიღო საქართველოს მოქალაქეობა. წლეულს ოქტომბრის მიწურულს ჩვენი ქვეყნის სახელით პირველ საერთაშორისო ტურნირში - 23-წლამდელთა ევროპის ჩემპიონატზე გამოვა.

ეროვნულ პირველობაზე გოგონებმაც მოსინჯეს ძალები. გამარჯვებული და პრიზიორები სინკლერის სპეციალური ცხრილის მიხედვით გამოვლინდა: 1. სოფიო მუქათარიძე (თბილისი) - 171 (78+93), 2. ხათუნა ჯიმშელეიშვილი (წყალტუბო) - 132 (61+71), 3. თეონა ჟიჟიაშვილი (დუშეთი) - 166 (73+93). ვაჟებში სინკლერით პირველი-მეექვსე ადგილები ასე განაწილდა: ლაშა ტალახაძე (478,8 ქულა), ანტონ პლესნოი (427,3), გიორგი ჩხეიძე (422,9), ირაკლი ჩხეიძე (416,3), რევაზ დავითაძე (412,9), დავით ხეცურიანი (412,2).

კვარცხლბეკი
56 კგ. 1. ზაზა ფუტკარაძე (აჭარა) - 195 (90+105), 2. ზვიად ფუტკარაძე (აჭარა) - 188 (85+103), 3. გიორგი ხარაზიშვილი (ხაშური, ოლიმპიური მზადების ცენტრი) - 181 (81+100).
62 კგ. 1. შოთა მიშველიძე (ქუთაისი) - 282 (128+154), 2. რამინ შამილიშვილი (აჭარა) - 273 (125+148). 3. გოდერძი ბერძელიძე (საჩხერე) - 269 (128+141).
69 კგ. 1. გოგა ჩხეიძე (ზუგდიდი) - 305 (134+171), 2. ვაჟა ქავთარაძე (აჭარა) - 255 (113+142), 3. გურამ გიორბელიძე (ქუთაისი) - 252 (107+145).
77 კგ. 1. ირაკლი გაბრიჭიძე (საჩხერე) - 307 (142+165), 2. გიგი პატარაშვილი (თბილისი) - 297 (137+160). 3. ვახტანგ ვეკუა (ზუგდიდი) - 294 (134+160).
85 კგ. 1. რევაზ დავითაძე (თბილისი) - 347 (162+185), 2. ნოდარ კაკაბაძე (ქუთაისი) - 316 (143+173), 3. ლომია თებიძე (აჭარა) - 306 (136+170).
94 კგ. 1. ანტონ პლესნოი (თბილისი) - 375 (173+202), 2. ზაზა ლომთაძე (ქუთაისი) - 313 (140+173), 2. ირაკლი ჯალაღონია (ზუგდიდი) - 275 (125+150).
105 კგ. 1. ირაკლი ჩხეიძე (ზუგდიდი, ომც) - 378 (167+211), 2. დავით ხეცურიანი (ქუთაისი) - 377 (172+205), 3. აკაკი ტალახაძე (საჩხერე) - 319 (142+177).
+105 კგ. 1. ლაშა ტალახაძე (საჩხერე) - 478 (214+264), 2. გიორგი ჩხეიძე (ზუგდიდი) - 410 (182+228), 3. ბაქარ თურმანიძე (აჭარა) - 396 (184+212).
გუნდური: 1. ქუთაისი (188 ქულა), 2. ზუგდიდი (181), 3. საჩხერე (181).

1359
მკითხველის კომენტარები / 0 /
მსგავსი ამბები
რუბრიკის სხვა სიახლეები
;