შინდაგორიძე ბომბარდირობაზე არ ფიქრობს. ჩემპიონთა ლიგაში განუთესავებს შორის ვართ და, ალბათ, ძლიერ გუნდს შევხვდებით

ლაშა შინდაგორიძე კარიერაში საუკეთესო სეზონს ატარებს. "საბურთალოს" ფლანგის შემტევი შედეგიანობით აქამდეც გამოირჩეოდა - 2017 წელს 9 გოლი გაიტანა. მაგრამ წელს ამდენივე უკვე 16 შეხვედრაში მოახერხა და ბომბარდირთა დავაში 10 გოლით ქუთაისის "ტორპედოს" თავდამსხმელ ბუდუ ზივზივაძესთან ერთად ლიდერობს...

26 წლის თავდამსხმელმა ეროვნული ლიგის ბოლო 6 შეხვედრაში მეტოქეთა კარი 5-ჯერ აიღო და კარგ ფორმაშია. "საბურთალოს" ფეხბურთელის თქმით, მისთვის ახლა გოლები განსაკუთრებით მნიშვნელოვანია.

"გოლები და ბომბარდირობა ყოველთვის სასიხარულოა, მაგრამ ახლა ეს ჩემთვოს ორმაგად მნიშვნელოვანია. უნგრეთში მიღებული მძიმე ტრავმის შემდეგ 9 თვე გამიცდა და გოლები თავდაჯერებულობისთვის მჭირდებოდა. ამ ყველაფრის შემდეგ ჩემპიონატის ერთ-ერთი ბომბარდირობა და ის ფაქტი, რომ გუნდს წარმატების მიღწევაში ვეხმარები, ჩემთვის ძალიან ბევრს ნიშნავს", - ამბობს შინდაგორიძე.

"საბურთალოს" თავდამსხმელმა ბომბარდირთა დავაში თავის კონკურენტ ბუდუ ზივზივაძეზე ილაპარაკა:

"ბუდუ ჩემი მეგობარია და კონკურენტად არ ვთვლი, პირიქით - მისი წინსვლა და წარმატება მახარებს. სანაკრებო სიაშიც რომ მოხვდა, ესეც გამიხარდა... ვუსურვებ, რომ მაღალ დონეზე ითამაშოს, რადგან ნიჭიერი კაცია. ორჯერ საქართველოში საუკეთესო ბომბარდირი გახდა - ასეთი რამ შემთხვევით არ ხდება. მე კი, სიმართლე გითხრათ, ბომბარდირობაზე დიდად არც ვფიქრობ. მთავარია, "საბურთალომ" წელს ჩემპიონის ტიტული შეინარჩუნოს და ევროტურნირზე ღირსეულად გამოვიდეთ - აი, ეს არის ჩემი მიზანი".

ლიგის ერთ-ერთმა ბომბარდირმა გადამწყვეტი როლი ითამაშა თბილისის "დინამოსთან" მოგებაში, რომელიც 2:0 დასრულდა. შინდაგორიძემ ლამაზი გოლებით დუბლი შეასრულა: "საერთოდ, გულწრფელად ვამბობ - გუნდი ხელს თუ არ გიწყობს, ვერც გაიტან და მით უფრო, ბომბარდირებშიც ვერ დაწინაურდები. ამიტომ ეს გოლები მხოლოდ მე არ მეკუთვნის. "დინამოსთან" დუბლზეც იმავეს ვიტყვი - ძალიან სასიხარულოა, რომ "საბურთალო" ერთსულოვანი გუნდია, რომელიც "დინამოს" დონის მეტოქეს ამარცხებს. მაგრამ, გადამწყვეტი და მნიშვნელოვანი გოლები, რა თქმა უნდა, ძალიან სასიხარულოა. ასეთი რამ ყველა ფეხბურთელისთვის ბევრს ნიშნავს".

"საბურთალო" საქართველოს წლეულს პირველად წარადგენს ჩემპიონთა ლიგის საკვალიფიკაციო ეტაპზე. ქვეყნის მოქმედი ჩემპიონი განუთესავია და 16 განთესილიდან ერთ-ერთს შეხვდება. პირველ საკვალიფიკაციო ეტაპზე (მატჩები 9-10 და 16-17 ივლისს გაიმართება) "საბურთალოს" შესაძლო მეტოქეები არიან: "სელტიკი" (შოტლანდია), "ასტანა" (ყაზახეთი), ბატე (ბელარუსი), "ლუდოგორეცი" (ბულგარეთი), "ყარაბაღი" (აზერბაიჯანი), "მარიბორი" (სლოვენია), "ცრვენა ზვეზდა" (სერბეთი), "შერიფი" (მოლდოვა), "რუსენბორგი" (ნორვეგია), ჰიკ (ფინეთი), "დანდალკი" (ირლანდია), "დუდელანჟი" (ლუქსემბურგი), "შკენდია" (მაკედონია), "ნიუ სეინტსი" (უელსი), "სლოვანი (სლოვაკეთი), აიკ (შვედეთი).

შინდაგორიძემ სასურველი და არასასურველი მეტოქეები დაასახელა: "ჩემპიონი თუ ხდება, ის გუნდი სუსტი არ იქნება. თუმცა, განსხვავებაც არის და ყველაზე მეტად არ ვისურვებდი "სელტიკს", "ასტანას", "ყარაბაღსა" და "ცრვენა ზვეზდას" - ესენი განთესილებში ყველაზე ძლიერი გუნდები არიან. შედარებით სასურველებად მიმაჩნია ირლანდიისა და უელსის ჩემპიონები - "დანდალკი" და "ნიუ სეინტსი", თუნდაც ლუქსემბურგის ჩემპიონი - "დუდელანჟი". მაგრამ, რადგან ჩვენ განუთესავებში ვართ, დიდი ალბათობით, პირველივე ეტაპზე ძლიერ მეტოქეს შევხვდებით".

478
მკითხველის კომენტარები / 0 /
მსგავსი ამბები
რუბრიკის სხვა სიახლეები
;