ლაშა შინდაგორიძე უნგრეთში ითამაშებს

ლაშა შინდაგორიძე კარიერას უნგრეთის უმაღლესი ლიგის ბინადარ "ბალმაზუივაროშში" გააგრძელებს.

24 წლის ნახევარმცველი გუშინ "საბურთალოს" ფეხბურთელებს, მწვრთნელებსა და ხელმძღვანელობას დაემშვიდობა და უნგრეთში გაფრინდა - ეს ინფორმაცია თბილისურმა კლუბმა გაავრცელა.

შინდაგორიძე "საბურთალოში" გასულ სეზონში ჩაირიცხა და ერთ-ერთი საკვანძო ფეხბურთელი გახდა. მან საკმაოდ დიდი წვლილი შეიტანა, გუნდმა ჩემპიონატი მეოთხე ადგილზე რომ დაასრულა.

ლაშამ იანვრის დასაწყისში "საბურთალოსთან" ახალი ხელშეკრულება გააფორმა. მიუხედავად ამისა, თბილისურმა კლუბმა მას ტრანსფერში ხელი არ შეუშალა. უნგრული კლუბი შინდაგორიძით ცოტა ხნის წინ დაინტერესდა და "საბურთალომ" მოთამაშის ინტერესი გაითვალისწინა.

ტანმაღალი შემტევი ნახევარმცველი "საბურთალოში" ერთადერთი ფეხბურთელი იყო, რომელმაც გასულ სეზონში ყველა 36 თამაში ჩაატარა. ამ ხნის განმავლობაში მან მეტოქეთა კარი 9-ჯერ აიღო.

შინდაგორიძემ ტრანსფერზე კომენტარი "საბურთალოს" ვებგვერდთან გააკეთა. მისი თქმით, ახლა კლუბსა და ლიგაზე ინფორმაცია წინასწარ მოიპოვა.
"ყველაფერი ძალიან სწრაფად მოხდა.

"საბურთალოში" დარჩენა გადაწყვეტილი მქონდა, მაგრამ გამოჩნდა უკეთესი ვარიანტი და თბილისური კლუბის ხელმძღვანელებმაც შემიწყეს ხელი. მოლაპარაკებები დაახლოებით ორი კვირის წინ დაიწყო.

გეცოდინებათ, რომ "ბალმაზუივაროშში" ბაჩანა არაბული თამაშობს. მას ველაპარაკე, უნგრულ კლუბზე საინტერესო ინფორმაცია მივიღე და საბოლოოდ შევთანხმდით" - ამბობს შინდაგორიძე.

მან "საბურთალოზეც" ილაპარაკა: "ვისარგებლებ შემთხვევით და სამწვრთნელო შტაბს, ფეხბურთელებსა და კლუბის ხელმძღვანელობას გვერდში დგომისა და დაფასებისთვის მადლობას გადავუხდი.

თავს კარგად ვგრძნობდი, რადგან თბილი და მეგობრული კლუბია - "საბურთალოში" ერთი წელი ვითამაშე და აქ გატარებული პერიოდი სასიამოვნოდ მახსენდება.

თავდაპირველად, ფორმაში არ ვიყავი, მაგრამ გიორგი ჭიაბრიშვილი და სამწვრთნელო შტაბი მენდო და მთელი სეზონის განმავლობაში სისტემატურად მათამაშებდნენ. სწორედ, ჭიაბრიშვილის დამსახურებაა, საკუთარი თავის რწმენა რომ დამიბრუნდა და ჩემით უცხოური კლუბი დაინტერესდა.

რა თქმა უნდა, "საბურთალოს" გულშემატკივრად ვრჩები. კლუბს წარმატებებსა და დიდ გამარჯვებებს ვუსურვებ. "საბურთალო" ჩემპიონობას ნამდვილად იმსახურებს".

ყოველდღიური სპორტული გაზეთი "ლელო"
1068
მკითხველის კომენტარები / 0 /
მსგავსი ამბები
რუბრიკის სხვა სიახლეები
;