ლაშა ჯაკობია: გენტში ქართული შემტევი ტრიო ნაკრების ინტერესებშია...

"გენტის" ძირითად გუნდში გიორგი ბერიძის ოფიციალური დებიუტი ერთი კვირის წინ, რუმინულ "ვიტორულთან" პირველ მატჩში (6:3 ბელგიელთა სასარგებლოდ) შედგა, თუმცა გუშინდელ საპასუხო შეხვედრაში ახალგაზრდა ქართველი შემტევი განაცხადში არ ყოფილა.

22 წლის ბერიძე "გენტი" 2-წლიანი იჯარის შემდეგ დაბრუნდა და სლოვაკურ "ტრენჩინსა" და უნგრულ "უიპეშტში" მოღონიერებულმა, ბელგიურ კლუბში თავის დამკვიდრება მოახერხა.

ბერიძის შესახებ მისი მენეჯერი, საქართველოს ნაკრების ყოფილი თავდამსხმელი ლაშა ჯაკობია გველაპარაკა:

"ევროპალიგაზე გიორგის დებიუტს კარგი გამოხმაურება მოჰყვა. ძალიან აქტიური იყო, მცველებს არ ასვენებდა, ერთ ეპიზოდში კი მაგარი პასი გააკეთა, მაგრამ თავდამსხმელმა ცარიელ კარში ვერ გაიტანა... ცხადია, გიორგის დარჩენა უკვე გადაწყვეტილია. "გენტს" რომ ველაპარაკე, მითხრეს - მინიმუმ სეზონის ბოლომდე დავტოვებთო. ამ პერიოდში გუნდს კიდევ უფრო უკეთ შეეწყობა, შეთამაშდება და უფრო თამამადაც ათამაშდება. მას იმხელა პოტენციალი გააჩნია, დარწმუნებული ვარ, "გენტში" ერთ-ერთი გამორჩეული ფიგურა გახდება. ოთხ საკონტროლო შეხვედრაში გატანილი 8 გოლითა და ევროპალიგაზე კარგი გამოსვლით დაამტკიცა, რომ ის ბელგიაში სათამაშოდ ფიზიკურადაც მზადაა და ფსიქოლოგიურადაც", - ამბობს ჯაკობია.

ცხადია, დავინტერესდით გიორგი ჩაკვეტაძის მდგომარეობით. მოგეხსენებათ, მან ოპერაცია გაიკეთა და ახლა რეაბილიტაციის პროცესშია:

"გიორგი ჩაკვეტაძე რეაბილიტაციას შემოდგომაზე დაასრულებს. გიორგი ქვილითაია უკვე მომჯობინდა და მალე ითამაშებს. ვოცნებობ, "გენტში" ქართული თავდასხმა ვიხილო. ბელგიის ჩემპიონატი, და კონკრეტულად "გენტი", მაღალი დონის მოთამაშეების გაზრდითაა ცნობილი. "გენტში" საქართველოს ნაკრების ინტერესებისთვის სასურველი ამბავი ხდება. ძალიან კარგია და მაიმედებს ის ფაქტი, რომ ერთ გუნდში სამი ქართველი თავდამხმელი ითამაშებს. ანუ მათი შეთამაშების დიდი შანსია, ეს კი საბოლოოდ ისევ ჩვენს ეროვნულ გუნდს და მისი შემტევი პოტენციალის გაზრდას წაადგება".

ჯაკობია ლევან შენგელია მენეჯერიცაა. სწორედ მისი შუამავლობით მოხვდა თბილისის "დინამოს" შემტევი 3 წლის წინ ბელგიურ "ტუბიცეში". ესპანურ პრესაში გავრცელებული ცნობით, შენგელია კარიერას იქაური ლა ლიგა 2-ის ბინადარ "კადისში" გააგრძელებს. თუმცა ჯაკობია ამბობს, რომ შენგელია, შესაძლოა, სხვა გუნდში აღმოჩნდეს:

"ლევანს "დინამოსთან" კონტრაქტი 31 აგვისტოს უმთავრდება და ჯერ მთლიანად ევროთასებზეა გადართული. ჩვენი დიდი სურვილია, რომ "დინამოსთან" ერთად ევროპალიგაზე მაქსიმალურად შორს წავიდეს. "გაბალას" შემდეგ "ფეიენოორდს" შეხვდებიან და მეტი შანსია, რომ გუნდს დაეხმაროს და თავი გამოიჩინოს...

რაც შეეხება "კადისზე" გავრცელებულ ინფორმაციას, ამაზე ლაპარაკი ჯერ ნაადრევია. ჩვენთვის ფეხბურთელის ბუნებრივ ინტერესთან ერთად, "დინამოს" პოზიციაც გასათვალისწინებელია, რადგან ევროტურნირში ქართული კლუბი რაც უფრო შორს წავა, უეფას რეიტინგში საქართველოს მით უფრო მაღალი კოეფიციენტი დაუფიქსირდება. დამიჯერეთ, საბოლოოდ, ეს მენეჯერების მუშაობაზეც დადებითად აისახება".

ყოველდღიური სპორტული გაზეთი "ლელო"
1464
მკითხველის კომენტარები / 0 /
მსგავსი ამბები
რუბრიკის სხვა სიახლეები
;