[ლა ლიგა. ბარსელონა-რეალის წინ] სეზონის მთავარი მატჩი

დღეს „კამპ ნოუ“ ლა ლიგის სეზონის უმთავრეს დაპირისპირებას - „ელ კლასიკოს“ მასპინძლობს. ყველაფერთან ერთად, მატჩის მნიშვნელობას ის ფაქტიც მატებს, რომ გუნდები 35-35 ქულით ლიდერობენ, ხოლო ეს დაპირისპირება პოლიტიკური კრიზისის გამო გვიან ტარდება, თუმცა არა გვგონია, ახლა მაინც მშვიდად ჩაიაროს...

სავარაუდო შემადგენლობები
ბარსელონა-რეალი

ბარსელონა (4-3-3): ტერ შტეგენი - სემედუ, პიკე, ლონგლე, ალბა - რაკიტიჩი, ბუსკეტსი, ფ. დე იონგი - მესი, ლ. სუარესი, გრიზმანი

რეალი (4-4-2): კურტუა - კარვახალი, ვარანი, სერხიო რამოსი, მენდი - კროოსი, ვალვერდე, კაზემირო, მოდრიჩი - ბენზემა, ბეილი
18 დეკემბერი. 23:00

„რეალი“ ბარსელონაში მას მერე პირველად ჩადის, რაც ესპანეთის ხელისუფლებამ კატალონიელი პოლიტიკოსების ნაწილი დაიჭირა, ნაწილი კი ქვეყნიდან გაიხიზნა. მას მერე, კატალონიის მცხოვრებთა დიდი ნაწილი ცენტრალური ხელისუფლების კონტროლს თითქმის აღარ ექვემდებარება, „ბარსელონაც“ სეპარატისტული მოძრაობის მხარდამჭერი და ერთ-ერთი სიმბოლოა. მოკლედ, „რეალი“ კატალონიაში ძალზე სერიოზული დაცვით ჩადის, მოედანზე და მის გარეთ კი ერთნაირად დაცხება.

სიმშვიდე არც ახლა არის მოსალოდნელი. რეალს გაძლიერებულად დაიცავენ, რადგან „სამეფო კლუბი“ იმ ამბების შემდეგ პირველად ჩადის ბარსელონასთან სათამაშოდ.

უნდა ველოდოთ გართულებებსაც - კატალონიურმა საპროტესტო მოძრაობა Tsunami DemocrTtic-მა უკვე დაპოსტა ტვიტერზე: „სცადეთ მოგება ავტობუსიდან გადმოუსვლელად - შევხვდებით 18 დეკემბერს“. ამ ორგანიზაციამ ბოლო თვეებში რამდენიმე საპროტესტო აქცია გამართა კატალონიაში და მას მილიონამდე მიმდევარი ჰყავს ტვიტერზე. უსაფრთხოების ზომებისთვის, ორივე გუნდი „კამპ ნოუზე“ თამაშამდე ორი საათით ადრე გამოცხადდება.

ურთიერთშეხვედრები

„ბარსელონასა“ და „რეალს“ შორის სულ 242 ოფიციალური დაპირისპირება გაიმართა. „ბარსელონა“ ოდნავ წინაა: 96 კლასიკო მოიგო, ხოლო „რეალმა“ - 95. 51 მატჩი კი ფრედ დასრულდა. მხოლოდ ლა ლიგის მატჩებს თუ ჩავთვლით, მაშინ სრული თანაფარდობაა - 72-72 მოგება ორივე მხარეს და 34 ფრე. მოკლედ, მეტი ინტრიგა წარმოუდგენელია - ისტორიაშიც თანაფარდობაა და მიმდინარე ცხრილშიც.

ფეხბურთი აერთიანებს და არ ყოფს

საკადრო პრობლემები „ბარსას“ „რეალზე“ ნაკლები აქვს - მხოლოდ ორი ფეხბურთელის თამაშია გამორიცხული - ფრანგი უსმან დემბელესი და ბრაზილიელი არტურის. ჟორდი ალბამ მოირჩინა ტრავმა და დაცვის მარცხენა ფლანგს ჩაიბარებს. ივან რაკიტიჩი ბოლო მატჩებია, ძალიან კარგად თამაშობს და ეს ხორვატის თამამი განაცხადია, რომ კლასიკოზე სასტარტოში იქნება.

ერნესტო ვალვერდე (ბარსელონა): „ხალხს შეუძლია, რაც სურს ის გამოხატოს ტრიბუნებზე, თუკი ეს ყველა მონაწილეს პატივისცემის ფარგლებში იქნება. ფეხბურთი მოწოდებულია იმისთვის, რომ ყველა გაგვაერთიანოს და არა პირიქით. ჩემი აზრით, საუკეთესო გამოსავალი იყო კლასიკო იმ დღეს გამართულიყო, როცა დაიგეგმა. ორი თვის წინათ ეს თამაში დაძაბული და თანაბარი იქნებოდა. ამ მხრივ არაფერი იცვლება, ის ხვალაც დაძაბული და თანაბარი იქნება. ყოველი კლასიკო რთულია, ზოგიერთი ჩემი ფეხბურთელისთვის ეს იქნება პირველი კლასიკო კარიერაში. ამ დაპირისპირებას სხვა აურა აქვს და ამას გვირაბიდან გამოსვლისას იგრძნობ. ეს არის სულ სხვა დონის თამაში.

ჯერ სეზონის პირველი ნახევარი არ მორჩენილა და წინ კიდევ ბევრი მატჩია ლა ლიგაში, მაგრამ ორივე გუნდს სურს წინ გაიჭრას ლიდერთა ბრძოლაში. ის, რომ კლასიკოს თანაბარი ქულებით ვხვდებით, წლევანდელი სეზონის ბალანსზე მიუთითებს. რეალი „კამპ ნოუზე“ ყოველთვის ინტენსიურად თამაშობს. ისე მოხდა, რომ სტუმრად ბოლო კლასიკოებს უკეთ ვატარებთ, ვიდრე შინ.

დიახ, ჩვენ ერთი დღით მეტი დავისვენეთ, მაგრამ ეს ძალიან მცირე უპირატესობაა. იმ დღეს, როცა მატჩი უნდა გამართულიყო, ჩვენ ვიყავით წამგებიან პოზიციაში. ასეთ სიტუაციებში ორივე გუნდმა კარგად იცის, როგორ მოემზადოს და მოტივაციაც უმაღლეს დონეზეა. ასე რომ, ეს მცირე უპირატესობა სალაპარაკოც კი არაა.

ჩვენი ფეხბურთი უნდა ვითამაშოთ და ჩვენთვის არ აქვს მნიშვნელობა იმას, რომ აზარი ვერ თამაშობს, ან ბენზემა საუკეთესო ფორმაშია.

რაც შეეხება VAR-ს თავიდანვე ცხადი იყო, რომ ის ფეხბურთში ყველა საკამათო სიტუაციას ვერ აღმოფხვრიდა, რადგან თავად ფეხბურთია ხშირად წინააღმდეგობრივი - ყველას თავისი სიმართლე აქვს“.

პოლიტიკა არ მაინტერესებს

„რეალს“ დიდი ხნით დააკლდნენ მარკო ასენსიო, ლუკას ვასკესი და ედენ აზარი. მარსელოს თამაშიც გამორიცხულია. ნაკლებად მოსალოდნელია, ვარჯიშს ახლახან დაბრუნებულმა ხამეს როდრიგესმა ითამაშოს. ფერლან მენდიმ დისკვალიფიკაცია მოიხადა, რაც მარსელოს შეცვლის მარცხენა ფრთაზე. ფედე ვალვერდე ბოლო თამაშებში აშკარად კარგად თამაშობს. ასე რომ, მას აქვს შანსი კლასიკოზე სასტარტოში ვიხილოთ. გარეთ ბეილს ქარიმ ბენზემას მეწყვილედ ვიხილავთ.

ზინედინ ზიდანი (რეალი): „ამ დღეებში ბევრი რამ ითქვა, მაგრამ ფანების უმრავლესობას უბრალოდ უნდა კარგი ფეხბურთის ნახვა. ბოლომდე უნდა დავიხარჯოთ მოედანზე და არა მის მიღმა. იმედი გვაქვს, რომ მატჩი უინციდენტოდ ჩაივლის.

კარგად ვიცით ვის ვხვდებით, ვიცით, რომ მათ მესი ჰყავთ, მაგრამ ჩვენ ჩვენი უპირატესობები გაგვაჩნია. ჩვენი მიზანია, კარგად ვითამაშოთ და იმედი მაქვს, რომ მეტოქეც ამას ფიქრობს.

მე აქ ჩემი სამუშაოს შესასრულებლად ვარ ჩამოსული. პოლიტიკა არ მაინტერესებს და რა ხდება მოედნის მიღმა იმაზე კომენტარს არ გავაკეთებ. ვემზადებით კლასიკოსთვის და ეს ერთადერთია, რაც გვაინტერესებს.

ვალვერდე რეალის აღმოჩენაა და ის კარგად თამაშობს. ვინ იქნება ძირითადში ამას კი თავად გადავწყვეტ ხვალინდელი მატჩის წინ“.

ფაქტები

* 2019 წელს სულ სამი კლასიკო გაიმართა: 2 მატჩი „ბარსელონამ“ მოიგო და 1 ფრედ დასრულდა. ბურთები - 5:1 კატალონიელთა სასარგებლოდ.

* „კამპ ნოუზე“ ამ გუნდების ბოლო დაპირისპირება (კოპა დელ რეი) 6 თებერვალს გაიმართა და 1:1 დასრულდა.

* „ბარსელონას“ ლა ლიგაში ბოლო 4 მატჩში „კამპ ნოუზე“ სულ მცირე, 4 გოლი გააქვს.

* ბოლო 6 მატჩია ლა ლიგაში, რაც „ბარსელონას“ „კამპ ნოუზე“ მოგებული აქვს, როგორც პირველი ტაიმები, ისე მატჩები.

* ბოლო 7 მატჩია ლა ლიგაში, რაც „კამპ ნოუზე“ 2.5 გოლზე მეტი გადის.

* „რეალი“ ლა ლიგაში 7 ტურია, რაც დაუმარცხებელია.

* ბოლო 6 კლასიკოა, რაც „ბარსელონა“ „რეალთან“ არ აგებს.

* ტიბო კურტუამ (რეალი) ბოლო 21 ზუსტი დარტყმიდან 19 მოიგერია (90.5%).

* მარკ-ანდრე ტერ შტეგენის უხეში შეცდომების გამო „ბარსელონამ“ ამ სეზონში 3 გოლი გაუშვა.

* „კამპ ნოუზე“ გამართულ ბოლო 15 კლასიკოში აუცილებლად გაჰქონდა ორივე გუნდს.

* „ბარსელონა“ ერთადერთი გუნდია ლა ლიგაში, რომელმაც ყველა საშინაო მატჩი მოიგო (7). არადა, ამ 7-დან 6-ში ორივე გუნდმა გაიატანა გოლი.

* ბოლო 6 კლასიკოდან 5-ში პირველი გოლი „ბარსას“ გაჰქონდა.

* ამ სეზონში ლა ლიგაში „რეალმა“ საგარეო მატჩებში 8-დან 7-ში არ წააგო.

* ლიონელ მესიმ 25 კლასიკოში (ლა ლიგა) 18 გოლი გაიტანა.

* როცა „რეალი“ კლასიკოს იგებდა, ბოლო სამ შეხვედრაში გოლი აუცილებლად ქარიმ ბენზემას გაჰქონდა.
1272
მკითხველის კომენტარები / 0 /
მსგავსი ამბები
რუბრიკის სხვა სიახლეები
;