ლა ლიგა. IV ტურის წინათქმა: 'ღამურები' კამპ ნოუს ესტუმრებიან, მესი არ იქნება

სანაკრებო პაუზის შემდეგ განახლდება ესპანური პრიმერაც. მთავარი მატჩი შაბათს „კამპ ნოუზეა“ - „ბარსელონა“ მას კვლავ ლიონელ მესის, ხოლო „ვალენსია“ მთავარი მწვრთნელის, მარსელინოს გარეშე ხვდება.

ორივე გუნდისთვის სტარტი წარუმატებელი გამოდგა - ჩემპიონსა და ჩემპიონთა ლიგის მონაწილეს 4-4 ქულა აქვთ და ცხრილის შუაში იმყოფებიან. მართალია, ერნესტო ვალვერდეს სკამი ამის გამო არ შერყეულა, მაგრამ მარსელინოს ნდობის ვოტუმი ამოიწურა - „ღამურებს“ ტურის ცენტრალური შეხვედრაში უკვე სელადესი გამოიყვანს.

ლიონელ მესი არცთუ ხშირად იღებს ტრავმებს და თუ იღებს დიდხანს გუნდს არ აკლდება ხოლმე. თავიდან ეს დაზიანებაც ასეთი ეგონათ, თუმცა „ბარსას“ გულშემატკივრებისთვის ცუდი ამბავი გვაქვს - ლეო ჯერ კიდევ კარგა ხანს ვერ ითამაშებს, მის გარეშე კი „ბარსა“ სულ სხვა გუნდია.

მესი „ბარსელონას“ ერთადერთი მნიშვნელოვანი ფეხბურთელი არაა, რომელიც გუნდს „ვალენსიასთან“ დაპირისპირებაში დააკლდება. შემტევი ტრიდენტი, რომელსაც გასულ სეზონში შევეჩვიეთ, საერთოდ არ იქნება: ლუის სუარესი და უსმან დემბელეც კვლავ ტრავმებს იშუშებენ. ამ სამეულის გარდა, ვალვერდეს არც მეორე მეკარე ჰყავს მწყობრში - ექსვალენსიელი ნეტო.

სელადესი დებიუტისას იტალიელ მცველ კრისტიან პიჩინის ვერ დაეყრდნობა, რადგან ის ტრავმირებულია. დიდი ალბათობით, არც ახალგაზრდა კარლოს სოლერი იქნება.

სავარაუდო შემადგენლობები
ბარსელონა (4-3-3): ტერ შტეგენი - სერხი რობერტო, პიკე, ლონგლე, ალბა - არტური, ბუსკეტსი, დე იონგი - ანსუ ფატი, გრიზმანი, კარლეს პერესი
ვალენსია (4-4-2): სილესენი - ვასი, გარაი, გაბრიელ პაულისტა, გაია - ფერან ტორესი, პარეხო, კონდოგბია, გედეში - როდრიგო, გამეირო

ტურის სხვა თამაშებიდან უდანაკარგო ლიდერის, „ატლეტიკოს“ ბასკურ ვიზიტს გამოვყოფთ - დიეგო სიმეონეს გუნდი სან სებასტიანში „რეალ სოსიედადს“ სტუმრობს, ახლა უკვე „ბარსაში“ წასული ანტუან გრიზმანის გარეშე, რომელიც სწორედ „ჩური ურდინის“ შემადგენლობაში „დაფრთიანდა“.
დისკვალიფიცირებული გარეთ ბეილის გარეშე მოთამაშე „რეალი“ ვალენსიურ „ლევანტეს“ უმასპინძლებს.

მეორეადგილოსანი „სევილია“, რომელსაც ბასკი ხულიენ ლოპეტეგი ხელმძღვანელობს, ბასკეთში „ალავესს“ ესტუმრება.

ფაქტები

* „ბარსელონამ“ ლა ლიგაში „კამპ ნოუზე“ ბოლო 8 მატჩი მოიგო ზედიზედ.

* „ბარსელონა“ „კამპ ნოუზე“ ჩემპიონატის ბოლო 7 მატჩიდან 5-ის პირველ ტაიმს ფრედ ასრულებდა და შემდეგ იმარჯვებდა.

* „ბარსელონამ“ ლა ლიგის ბოლო 16 საშინაო მატჩიდან 14-ში სულ მცირე, 2-2 გოლი გაიტანა.

* „ბარსელონასა“ და „ვალენსიას“ ბოლო 7 დაპირისპირებიდან (ლა ლიგა) 6-ში 2.5 გოლზე მეტი დაფიქსირდა.

* „რეალს“ „ლევანტესთან“ ბოლო 13 დაპირისპირებიდან 12-ში არ წაუგია.

* „ლევანტემ“ ლა ლიგის ბოლო 6 ტურიდან 5-ში ორ-ორი გოლის გატანა შეძლო.

* „ატლეტიკომ“ „რეალ სოსიედადს“ ბოლო 10 დაპირისპირებიდან 8 მოუგო.

* „ატლეტიკო“ ერთადერთი გუნდია, რომელსაც ამ სეზონში ქულა არ დაუკარგავს ლა ლიგაში.

ესპანეთი. ლა ლიგა. IV ტური

შაბათი, 14 სექტემბერი
რეალი-ლევანტე 15:00
ლეგანესი-ვილიარეალი 18:00
სოსიედადი-ატლეტიკო 20:30
ბარსელონა-ვალენსია 23:00

კვირა, 15 სექტემბერი
ეიბარი-ესპანიოლი 14:00
ალავესი-სევილია 16:00
სელტა-გრანადა 18:00
ვალიადოლიდი-ოსასუნა 20:30
ბეტისი-ხეტაფე 23:00

1. ატლეტიკო 3 3 0 0 5:02 9
2. სევილია 3 2 1 0 4:01 7
3. ბილბაო 3 2 1 0 4:01 7
4. ლევანტე 3 2 0 1 4:02 6
5. რეალი 3 1 2 0 6:04 5
6. ოსასუნა 3 1 2 0 3:02 5
7. ალავესი 3 1 2 0 2:01 5
8. ბარსელონა 3 1 1 1 7:05 4
9. გრანადა 3 1 1 1 7:05 4
10. ვალენსია 3 1 1 1 3:02 4
11. ვალიადოლ. 3 1 1 1 3:04 4
12. სელტა 3 1 1 1 3:04 4
13. სოსიედადი 3 1 1 1 2:03 4
14. მალიორკა 3 1 0 2 2:04 3
15. ბეტისი 3 1 0 2 5:08 3
16. ვილიარეალი 3 0 2 1 7:08 2
17. ხეტაფე 3 0 2 1 2:03 2
18. ეიბარი 3 0 1 2 3:05 1
19. ესპანიოლი 3 0 1 2 0:05 1
20. ლეგანესი 3 0 0 3 1:04 0

ბომბარდირები: 3 - ლორენი (ბეტისი), ხ. მორენო (ვილიარეალი).

ყოველდღიური სპორტული გაზეთი "ლელო"
117
მკითხველის კომენტარები / 0 /
მსგავსი ამბები
რუბრიკის სხვა სიახლეები
;