ლა ლიგა. XI ტურის მიმოხილვა: სოლარი, ვინისიუსი, რეგილონი... ახალი ხალხი 'რეალში' [VIDEO]

მესის არყოფნაში "ბარსას" ლიდერობა ლუის სუარესმა იკისრა, "ატლეტიკო" ისევ წვალობს, ხოლო სანტიაგო სოლარის "რეალს" ახალი გმირი ჰყავს - ვინისიუს ჟუნიორი...

ესპანური მედია ამტკიცებს, რომ ეს არ იყო შემთხვევითობა - რომ სანტიაგო სოლარის ლა ლიგაში "რეალის" თავკაცის რანგში დებიუტისას კი არ გაუმართლდა, არამედ, მისმა სწორმა გადაწყვეტილებებმა მოიტანა გამარჯვება "ვალიადოლიდთან" - 2:0.

რას გულისხმობს "მარკა"? გამოცემის აზრით, სოლარიმ ვინისიუსში ის პოტენციალი დაინახა, რასაც ასე აიგნორებდა ხულიენ ლოპეტეგი. სოლარი ენდო ალვარო ოდრიოზოლას, რომელიც აშკარად კარგ ფორმაშია, მეორე ტაიმში კაზემიროს ნაცვლად ისკოს თამაშში ჩართვით მან დაამტკიცა, რომ შემტევ ფეხბურთს არ ერიდება. ვერ გეტყვით - დრო გვიჩვენებს, თუმცა "ვალიადოლიდთან" თამაშის ბოლო წუთებამდე "რეალი" ვერ იგებდა და ვერც ქმნიდა, ვინისიუსის დარტყმა კი სტუმართა კარში გვარიანი რიკოშეტის წყალობით აღმოჩნდა.

სოლარიმ ათამაშა მარცხენა მცველი რეგილონიც, რომელიც საფეხბურთო სამყარომ მას მერე გაიცნო, რაც ვარჯიშზე სერხიო რამოსის ბულინგის მსხვერპლი გახდა. აღმოჩნდა, რომ რეგილონიც მზადაა ლა ლიგაში თამაშისთვის. არც ის დაგვავიწყდეს, რომ რამოსმა პენალტი პანენკას სტილში შეასრულა.

სანტიაგო სოლარი (რეალი): "ვინისიუსს ვუთხარი, რომ თამამად წასულიყო გამწვავებაზე, არ მორიდებოდა მცველებს. ის ამ კომპონენტში ძლიერია და უნდა გამოგვეყენებინა. მას ასევე ვუთხარი, რომ არც დაცვაში ჩამოსვლა დავიწყებოდა. ეს რომ არ შეახსენო მას, ნამდვილად არ შეიძლება. მიხარია, რომ ფანებს მოსწონთ ბრაზილიელის თამაში".

რონალდო ("ვალიადოლიდის" მფლობელი): "ამ მატჩმა სხვადასხვანაირი გრძნობები მომგვარა. სამწუხაროა, რომ მხოლოდ ერთ გუნდს შეუძლია მოგება. "ვალიადოლიდმა" ძალიან კარგად ითამაშა, ჩვენ სწორ გზას ვადგავართ. მადლობა "რეალს" ჩემთვის გაწეული სტუმართმოყვარეობისთვის".

ფაქტები

* სერხიო რამოსმა (რეალი) მეოთხე პენალტი გაიტანა ამ სეზონში.

* სერხიო რამოსმა კარიერაში 5-ჯერ შეასრულა პენალტი პანენკას სტილში და ყველა გაიტანა.

* რეგილონმა (რეალი) მისთვის სადებიუტო ტაიმში 34 პასიდან ყველა ზუსტი გააკეთა.

* ერთი უგოლო მატჩიც და გარეთ ბეილი "რეალში" მისთვის ყველაზე ცუდ, 7-მატჩიან "მშრალ" სერიას გაიმეორებს.

არ არის მესი, მაგრამ არის ლუის სუარესი, რომელმაც "რაიო ვალეკანოსთან" მატჩში ანგარიში გახსნა, ბოლოს კი გამარჯვების გოლი გაიტანა. შუაში კი იყო "ბარსასთვის" უსიამოვნო თამაში, რომელშიც მადრიდული კლუბი სჯობდა კიდეც ლიდერს. 87-ე წუთამდე "რაიო" 2:1-ს იგებდა, კატალონიელებს კი შეცვლაზე შესულმა უსმან დემბელემ უშველა.

ერნესტო ვალვერდე (ბარსელონა): "მეორე ტაიმში, თითქოს, ყველგან ბუტარკეს აჩრდილი გველანდებოდა. მაგრამ ბოლოს მაინც ჩვენ მოვიგეთ, რადგან განსხვავებულად თამაში დავიწყეთ. "რაიო" კარგად თამაშობს და მწვავედ უტევს, მას ეს ადგილი ცხრილში არ შეეფერება".

ფაქტები

* ლუის სუარესს (ბარსელონა) 9 გოლი აქვს ლა ლიგაში, ეს კი მეტია, ვიდრე "რეალის" ყველა ფორვარდის გოლების რაოდენობა ერთად აღებული.

* "ბარსელონამ" ამ სეზონში ყველაზე მეტი ქულა მოიპოვა, მას მერე, რაც მატჩს აგებდა - 12.

* ხუან პოსოს (რაიო ვალეკანო) გოლი პირველია, რომელიც "ბარსელონამ" ამ სეზონში საჯარიმოს გარედან გაუშვა.

"ატლეტიკოს" სანახაობრივი ფეხბურთის ჩვენება ადრეც იშვიათად გამოსდიოდა, მაგრამ, როცა დიეგო სიმეონეს გუნდი დაწინაურდებოდა, ის ძირითადად ინარჩუნებდა 1:0-ებს. ახლა ამის გარანტია აღარ არსებობს.

დიეგო სიმეონე (ატლეტიკო): "პირველ ტაიმში კარგად ვერ ვითამაშეთ, მეტისმეტად უკან დავიხიეთ. როცა გავიტანეთ, ვიცოდი, რომ "ლეგანესი" შემოგვიტევდა, თუმცა არ ველოდი, თუ მეტოქე ჩვენზე უკეთ იბრძოლებდა ბურთისთვის".
მარსელინოს "ვალენსია" კი კრიზისშია, "ჟირონამ" პერე პონსის გოლით იმარჯვა "მესტალიაზე".

ფაქტები

* "ვილიარეალმა" ზედიზედ მე-5 ტურში ვერ შეძლო მოგება (2 ფრე, 3 წაგება).

* "ალავესის" ხონი როდრიგესს 6 საგოლე პასი აქვს. ტოპ-5 ლიგებში მასზე მეტი საგოლე პასი მხოლოდ სუსოს (მილანი) აქვს.

* 11 ტურში "ვალენსიას" მხოლოდ 1 მოგება აქვს, რაც ყველაზე ცუდი შედეგია კლუბისთვის 1957/58 წლების სეზონის შემდეგ.

* 11 ტურში 20 ქულა ყველაზე ცოტაა "ატლეტიკოსთვის", მას მერე, რაც გუნდს დიეგო სიმეონე წვრთნის.

* "ატლეტიკო" კვლავ ერთადერთია ტოპლიგებში, რომელსაც ამ სეზონში პირველ ტაიმში გოლი არ გაუშვია.


ლეგანესი-ატლეტიკო 1:1
გოლები: 0:1 გრიზმანი (69), 1:1 კარილიო (82)

რეალი-ვალიადოლიდი 2:0
გოლები: 1:0 ვინისიუსი (83), 2:0 სერხიო რამოსი (88-პენ)



ვალენსია-ჟირონა 0:1
გოლი: 0:1 პონსი (48)

ვალეკანო-ბარსელონა 2:3
გოლები: 0:1 ლ. სუარესი (11), 1:1 პოსო (35), 2:1 ალვარო გარსია (57), 2:2 დემბელე (87), 2:3 ლ. სუარესი (90)



ეიბარი-ალავესი 2:1
გოლები: 0:1 მანუ გარსია (4), 1:1 ჯორდანი (69), 2:1 დიოპი (91)
გაძევება: რ. დუარტე (24. ალავესი), დე ბლასისი (62. ეიბარი)

ვილიარეალი-ლევანტე 1:1
გოლები: 0:1 მორი (77 ს. კ.), 1:1 ალფონსო (93)

უესკა-ხეტაფე 1:1
გოლები: 1:0 ეჩეიტა (50), 1:1 მოლინა (91)

სოსიედადი-სევილია 0:0
სევილია (3-4-2-1): ვაცლიკი - ამადუ, კარისო, გომესი - ხესუს ნავასი, ბანეგა, ფ. ვასკესი, არანა (66. ესკუდერო) - სარაბია, პრომესი - მურიელი (72. მესა)

ბეტისი-სელტა 3:3
გოლები: 1:0 ლორენი (33), 2:0 ჟუნიორი (57), 2:1 მ. გომესი (63), 2:2 მენდესი (69), 2:3 მ. გომესი (84), 3:3 კანალესი (87)

ორშაბათი. 5 ნოემბერი
ესპანიოლი-ბილბაო 23:59

თ მ ფ წ ბ ქ
1. ბარსელონა 11 7 3 1 31:14 24
2. სევილია 11 6 2 3 22:13 20
3. ატლეტიკო 11 5 5 1 13:6 20
4. ალავესი 11 6 2 3 15:11 20
5. ესპანიოლი 10 5 3 2 14:8 18
6. რეალი 11 5 2 4 16:14 17
7. ლევანტე 11 5 2 4 17:16 17
8. ხეტაფე 11 4 4 3 11:9 16
9. ვალიადოლ. 11 4 4 3 9:9 16
10. ჟირონა 11 4 4 3 13:14 16
11. სელტა 11 3 5 3 20:16 14
12. ეიბარი 11 4 2 5 12:18 14
13. სოსიედადი 11 3 4 4 12:13 13
14. ბეტისი 11 3 4 4 8:12 13
15. ვალენსია 11 1 8 2 7:9 11
16. ვილიარეალი 11 2 4 5 9:11 10
17. ბილბაო 10 1 7 2 11:15 10
18. ლეგანესი 11 2 3 6 9:16 9
19. რ. ვალეკანო 11 1 3 7 12:23 6
20. უესკა 11 1 3 7 9:23 6

ბომბარდირები: 9 - ლუის სუარესი (ბარსელონა); 8 - იაგო ასპასი (სელტა), კრისტიან სტუანი (ჟირონა); 7 - ლიონელ მესი (ბარსელონა), ანდრე სილვა (სევილია).

მომდევნო ტური
9 ნოემბერი: ლევანტე-რეალ სოსიედადი
10 ნოემბერი: ვალიადოლიდი-ეიბარი, ხეტაფე-ვალენსია, ატლეტიკო-ბილბაო, ჟირონა-ლეგანესი
11 ნოემბერი: ალავესი-უესკა, ბარსელონა-ბეტისი, რაიო ვალეკანო-ვილიარეალი, სევილია-ესპანიოლი, სელტა-რეალი.

ყოველდღიური სპორტული გაზეთი "ლელო"
850
მკითხველის კომენტარები / 0 /
მსგავსი ამბები
რუბრიკის სხვა სიახლეები
;