ლა ლიგა. XXI ტური: რომ არა მესი...

"ბარსელონამ" კოუტინიოს ლალიგურ დებიუტში ქომაგები დიდხანს ანერვიულა, მაგრამ მაინც მოიგო; "ატლეტიკომ" მეორე ადგილის კონტურები უფრო მკაფიოდ დაინახა; მესამისთვის ბრძოლაში "მესტალიაზე" გამარჯვების შემდეგ "რეალი" გახდა ფავორიტი; "სევილია" ხელიდან წავიდა...

ვალენსია-რეალი

ტურის ცენტრალურ მატჩში "ვალენსიამ" ვერ ივარგა, "რეალს" ტოლ-სწორად მხოლოდ მეორე ტაიმის პირველი ნახევარი ეთამაშა, როცა სანტი მინამ ერთი გაქვითა და ამის მერეც მასპინძლებს მომენტი ჰქონდათ, მაგრამ შემდეგ "რეალი" ისევ ისე ათამაშდა, როგორც პირველ ტაიმში, როცა კრიშტიანო რონალდომ დუბლი პენალტებით შეასრულა. მეორე ტაიმში გოლები მარსელომ და ტონი კროოსმა გაიტანეს - 1:4.

ზინედინ ზიდანი (რეალი): "ძალიან გახარებული ვარ. ჩვენთვის მნიშვნელოვან შედეგს მივაღწიეთ. ვალენსია ლა ლიგაში ფანტასტიკურად თამაშობს. ამიტომ, არ იყო ადვილი დღეს მათი დამარცხება".


ფაქტები

* კრიშტიანო რონალდომ 20 და მეტი გოლი (ყველა შეჯიბრებაში) ყოველ სეზონში გაიტანა, რაც "რეალში" თამაშობს.

* კრიშტიანო რონალდოს, ქარიმ ბენზემასა და გარეთ ბეილის ცნობილმა ტრიომ 279-დღიანი პაუზის მერე პირველად ითამაშა. ბოლოს ისინი აპრილში

"ბარსელონას" წინააღმდეგ გამოვიდნენ.

* კრიშტიანო რონალდომ კლუბსა და ნაკრებში ერთად უკვე 100 პენალტი გაიტანა.

* "ვალენსიამ" "რეალთან" ბოლო 17 დაპირისპირებიდან მხოლოდ 2 მოიგო.

ატლეტიკო-ლას პალმასი

გრიზმანის, ტორესისა და თომასის გოლების წყალობით, დიეგო სიმეონეს გუნდს "ლას პალმასთან" პრობლემა საერთოდ არ ჰქონია, თუმცა მეორე ტაიმის შუამდე მასპინძლებს გოლები ვერ გაჰქონდათ.

მას მერე, რაც "ვალენსია" დამარცხდა, "ატლეტიკო" უკვე 6 ქულით უსწრებს მესამეადგილოსანს, თუმცა დაკარგული ქულებით მესამეადგილოსანი "რეალია".

ფაქტები

* იან ობლაკი (ატლეტიკო) პირველი სლოვენიელია, რომელმაც ლა ლიგაში 100 მატჩი (59-ჯერ კარი მშრალად შეინახა) ითამაშა.

* თომას პარტეიმ ამ სეზონში 5-ჯერ დაარტყა კარში და 5 გოლი გაიტანა.

* დიეგო სიმეონეს ხელმძღვანელობით "ატლეტიკომ" 600 გოლი გაიტანა. საიუბილეო გოლის ავტორი ფერნანდო ტორესია.

* ანტუან გრიზმანს "ვანდაზე" 7 გოლი აქვს გატანილი, ყველაზე მეტი.

ბარსელონა-ალავესი

"კამპ ნოუზე" "ბარსას" ბოლოს 2016 წლის სექტემბერში წაეგო... "ალავესთან" და ახლაც "ბარსელონოლოგი" იონ გუიდეტის გოლის წყალობით ბასკები დიდხანს იგებდნენ და "ბარსაც", თითქოს, ვერ თამაშობდა. დებიუტიანტი ფილიპე კოუტინიო ბევრს შრომობდა, თუმცა წინ ვერაფერს აკეთებდა.

ყველაფერი ანდრეს ინიესტას შესანიშნავმა პასმა შეცვალა 72-ე წუთზე - სუარესმა გაათანაბრა. ლიდერს სამი ქულა კი ლეო მესიმ საჯარიმო დარტყმით მოუტანა - 2:1 და ერნესტო ვალვერდეს გუნდმა, რომელმაც პეპ გვარდიოლას "ბარსას" დაუმარცხებელი რეკორდი გაიმეორა, ჩემპიონობისკენ მორიგი სამი ქულა ჩაიწერა.

თუმცა იყო ეპიზოდი ბოლოსკენ, როცა სამუელ უმტიტის ბურთი აშკარად ხელში მოხვდა საჯარიმოში, მაგრამ მსაჯის სასტვენი დუმდა...

ერნესტო ვალვერდე (ბარსელონა): "დიახ უმტიტის ბურთი ხელზე მოხვდა, მაგრამ რა ექნა, ხელი როგორც შეეძლო უკან ჰქონდა წაღებული. დღეს მეტოქემ სივრცეები გადაკვიკეტა და საქმე გაგვირთულა. ტალანტი კი მაშინ არის დასაფასებელი, როცა მნიშვნელოვან მომენტში ავლენ, რაც სუარესმა და მესიმ გააკეთეს კიდეც".

ფაქტები

* "ბარსელონამ" 2009/10 წლების სეზონის რეკორდი გაიმეორა - 21 დაუმარცხებელი მატჩი ლა ლიგაში (18 მოგება, 3 ფრე).

* "ბარსელონამ" ამ სეზონში ყველაზე მეტი ქულა მოიპოვა მას მერე, რაც აგებდა - 12.

* ლიონელ მესიმ ლა ლიგაში 21-ჯერ გაიტანა საჯარიმო დარტყმით და გაუსწრო კრიშტიანო რონალდოს (20).

* ანდრეს ინიესტა ლა ლიგის ერთადერთი ფეხბურთელია, რომელსაც ბოლო 15 სეზონის განმავლობაში ერთი საგოლე პასი მაინც აქვს - ჯამში 69 საგოლე პასი.

* ლუის სუარესი ევროპის ტოპ-5 ლიგებში ერთადერთია, რომელმაც ბოლო 8 მატჩში გაიტანა ზედიზედ (სულ 11 გოლი).

* ფილიპე კოუტინიომ პირველ 65 წუთში 7-ჯერ მოიპოვა ბურთი "ბარსასთვის", რაც მატჩის საუკეთესო შედეგია.

* კოუტინიოს პასის სიზუსტე 91,6 % იყო.

* ლა ლიგაში ყველაზე მეტი გოლი იონ გუიდეტის (ალავესი) "ბარსელონასთვის" აქვს გატანილი - 12-დან 3.

* ლეო მესიმ ლა ლიგაში "კამპ ნოუზე" მე-200 მატჩი გამართა.

სხვა მატჩები
ბასკურმა დერბიმ აშკარად ვერ გაამართლა, ამიტომაც მთავარი თემა ემერიკ ლაპორტი იყო, რომელიც "ბილბაოს" განაცხადის ნაცვლად ტრიბუნაზე იჯდა - ფრანგი მცველი "სიტიში" გადადის.

არიც ადურისის მე-8 გოლი სეზონში მოგებისთვის საკმარისი არ გამოდგა, კიკემ "ბილბაოს" მცველების დაბნეულობით ისარგებლა - 1:1.

ვინჩენცო მონტელას "სევილია" ვერ ყოჩაღობს, გუნდი მოწინავე ხუთეულს უკვე სერიოზულად ჩამორჩა - ანდალუსიელებმა შინ ვერ შეძლეს "ხეტაფეს" დამარცხება და ახლა "ვილიარეალს" 4 ქულით ჩამორჩებიან.

ფაქტები

* "ბილბაომ" პრიმერაში წაუგებელი სერია 10 მატჩამდე (3 მოგება, 7 ფრე) გააგრძელა. ასეთი სერია ბასკებს 1997 წლის მერე პირველად აქვთ.

* "ბილბაოსა" და "ეიბარის" მატჩში 29-ჯერ დაირღვა თამაშის წესი, მაგრამ ყვითელი ბარათი არავისთვის უჩვენებიათ. ეს ლა ლიგაში ბოლო 5 სეზონში პირველად მოხდა.

* გაბრიელ პირესი "ლეგანესის" პირველი ფეხბურთელია, რომელმაც ლა ლიგაში 50-ე მატჩი ითამაშა.

* "მალაგას" ამ სეზონში ყველაზე მეტი წითელი ბარათი აქვს მიღებული - 5.

* ივი "ლევანტეს" პირველი ფეხბურთელია, რომელმაც ამ სეზონში დუბლი შეასრულა.

* "ესპანიოლის" მცველმა ერმოსომ ორი გოლი საკუთარ კარში გაიტანა, ერთიც მეტოქისაში.

ბილბაო-ეიბარი 1:1
გოლები: 1:0 ადურისი (50), 1:1კიკე (73)
 
დეპორტივო-ლევანტე 2:2
გოლები: 1:0 ადრიანი (19), 2:0 ანდონე (45), 2:1 ივი (80), 2:2 ივი (84)
გაძევება: ბორხესი (34. დეპორტივო)

ვალენსია-რეალი 1:4
გოლები: 0:1 რონალდო (16-პენ), 0:2 რონალდო (38-პენ), 1:2 ს. მინა (58), 1:4 მარსელო (84), 1:4 კროოსი (89)
 
მალაგა-ჟირონა 0:0
გაძევება: გ. კასტრო (78. მალაგა)

ვილიარეალი- სოსიედადი 4:2
გოლები: 1:0 რუისი (5), 2:0 ფორნალსი (17), 3:0 ბაკა (20), 3:1 დ. ლორენტე (24), 4:1 კასტილიეხო (34), 4:2 ვილიან ჟოზე (58)
 
ლეგანესი-ესპანიოლი 3:2
გოლები: 1:0 ერმოსო (11 ს. კ.), 1:1 ნავარო (49), 2:1 გერერო (69), 3:1 ერმოსო (82 ს. კ.), 3:2 ერმოსო (88)

ატლეტიკო-ლას პალმასი 3:0
გოლები: 1:0 გრიზმანი (61), 2:0 ფ. ტორესი (73), 3:0 თომასი (88)
 
სევილია-ხეტაფე 1:1
გოლები: 1:0 ლ. მურიელი (72), 1:1 ანხელი (93)
 
ბარსელონა-ალავესი 2:1
გოლები: 0:1 გუიდეტი (23), 1:1 ლ. სუარესი (72), 2:1 მესი (84)
 
ორშაბათი, 29 იანვარი
სელტა-ბეტისი 23:59
 
ბომბარდირები: 20 - ლიონელ მესი (ბარსელონა); 16 - ლუის სუარესი (ბარსელონა); 12 - იაგო ასპასი (სელტა); 10 - კრისტიან სტუანი (ჟირონა), სიმონე ძაძა (ვალენსია), ვილიან ჟოზე (რეალ სოსიედადი).

მომდევნო ტური
2 თებერვალი: რეალ სოსიედადი-დეპორტივო;
3 თებერვალი: ეიბარი-სევილია, ბეტისი-ვილიარეალი, ალავესი-სელტა, ლევანტე-რეალი;
4 თებერვალი: ხეტაფე-ლეგანესი, ესპანიოლი-ბარსელონა, ჟირონა-ბილბაო, ატლეტიკო-ვალენსია;
5 თებერვალი: ლას პალმასი-მალაგა.

ყოველდღიური სპორტული გაზეთი "ლელო"
920
მკითხველის კომენტარები / 0 /
მსგავსი ამბები
რუბრიკის სხვა სიახლეები