ლა ლიგა. XXVI ტურის ბოლო მატჩები. 4 გოლი, 4 ქულა და 4 დღე "ბარსამდე" - "ატლეტიკო" არ ნებდება

შუა კვირის ტური დღეს დასრულდება - ბოლოსკენ ლიდერი "ბარსელონა" თამაშობს, რომელიც დისკვალიფიცირებული ჟორდი ალბას და ტრავმირებული პაკოსა და სემედუს გარეშე გაემგზავრა კანარის კუნძულებზე, სადაც "ლას პალმასს" ეთამაშება.

მანამდე კი "ატლეტიკო" კატალონიურ გრანდს 4 ქულაზე მიუახლოვდა - მადრიდულ დერბიში "ლეგანესი" 4:0 გაანადგურა. ანტუან გრიზმანმა პოკერი შეასრულა.

სხვათა შორის, მომდევნო ტურში გადამწყვეტი დაპირისპირებაა - 4 მარტს "ბარსა" "კამპ ნოუზე" "ატლეტიკოს" უმასპინძლებს.

"რეალის" ბარსელონური მარცხით მხოლოდ ნაწილობრივ ისარგებლა "ვალენსიამ", რომელიც "სან მამესზე" ჟოფრეი კონდოგბიას გოლით უგებდა "ბილბაოს", თუმცა საბოლოოდ ეს ვერ შეძლო და ფრეს დასჯერდა - 1:1.

ყოფილმა ვალენსიელმა არიც ადურისმა პირველ ტაიმში პენალტი ვერ გაიტანა, თორემ ბასკები სამ ქულასაც აიღებდნენ. "ღამურებმა" ქულა შეიმატეს, მართალია, "რეალი" მესამე პოზიციიდან ვერ "ჩააჩოჩეს", მაგრამ სხვაობა ქულამდე შეამცირეს. ერთი ეგაა - ესპანეთში მესამე და მეოთხე ადგილებს შორის მთავარი სხვაობა (ერთი პირდაპირ ლიგის ჯგუფურ ეტაპზე გადიოდა, მეორე კი საკვალიფიკაციო პლეი ოფში) ახალი სეზონიდან აღარ იარსებებს - პირველ ოთხეულს ლიგის ჯგუფური ეტაპი გარანტირებული აქვს.

ვინჩენცო მონტელას "სევილიამ" მოკრძალებულად მოუგო ანდალუსიური დერბი აუტსაიდერ "მალაგას" - 1:0. მე-15 წუთზე გამარჯვების გოლი ნოლიტოს პასით არგენტინელმა ხოაკინ კორეამ გაიტანა.

ფაქტები

* ხოაკინ კორეამ (სევილია) სეზონში ლა ლიგაში პირველი გოლი გაიტანა, თუმცა ეს ჯამში მისი მე-6 გოლია სეზონში (ყველა შეჯიბრების გათვალისწინებით).

* არიც ადურისმა (ბილბაო) ლა ლიგაში 23 პენალტი დაარტყა და 8 ვერ გაიტანა.

* "დეპორტივოს" ჯერ არ მოუგია ახალი მწვრთნელის, კლარენს ზეედორფის თავკაცობით. მეტიც, 5 მატჩია გუნდს გოლი არ გაუტანია, რაც ბოლო 49 წელში არ მომხდარა.

* "ვალენსიას" მეკარეებმა ლა ლიგაში ბოლო 38 პენალტიდან ნახევარი (19) მოიგერიეს - 12 დიეგო ალვეშმა, 2-2 ხაუმე დომენეკმა, ვისენტე გუაიტამ და ნეტომ, 1 - მეტ რაიანმა.

* ფერან ტორესი (ვალენსია) პირველი ფეხბურთელია, რომელიც 2000 წელს (და მერე) დაიბადა და ლა ლიგაში სასტარტოში დაიწყო.

* ანტუან გრიზმანი "ატლეტიკოს" მე-3 ფეხბურთელია, ვინც 21-ე საუკუნეში 100 და მეტი გოლი გაიტანა სერხიო აგუეროსა (101) და ფერნანდო ტორესის (124) შემდეგ.

* "სან მამესზე" ამ სეზონში ლა ლიგაში 19 გოლი გავიდა, რაც ყველაზე ნაკლებია ლა ლიგის სტადიონებს შორის.

* ანტუან გრიზმანმა 21-ე საუკუნეში პირველმა შეძლო "ატლეტიკოს" მაისურით ზედიზედ ორ მატჩში ჰეთ თრიკის შესრულება (3 და 4 გოლი).

ხუთშაბათი, 1 მარტი
ბეტისი-რეალ სოსიედადი 22:30
ლას პალმასი-ბარსელონა 23:59
ალავესი-ლევანტე 00:30

ბომბარდირები: 22 - ლიონელ მესი (ბარსელონა); 20 - ლუის სუარესი (ბარსელონა); 16 - იაგო ასპასი (სელტა); 15 - ანტუან გრიზმანი (ატლეტიკო); 14 - კრიშტიანო რონალდო (რეალი); 13 - კრისტიან სტუანი (ჟირონა), მაქსი გომესი (სელტა).

ყოველდღიური სპორტული გაზეთი "ლელო"
1124
მკითხველის კომენტარები / 0 /
მსგავსი ამბები
რუბრიკის სხვა სიახლეები
;