ლა ლიგა. XXXI ტურის მიმოხილვა: მესი აღარ ჩერდება ბარსამ კი თითქმის გაინაღდა [VIDEO]

სეზონის მთავარ მატჩში დიეგო კოშტას არ ელოდნენ, მაგრამ ბრაზილიური წარმოშობის ესპანელმა გამოჯანმრთელება მოასწრო. არადა, “ატლეტიკოსთვის” ჯობდა ეს არ მომხდარიყო...

28-ე წუთზე ლა ლიგის ჩემპიონის ვინაობა, დიდი ალბათობით, გაირკვა - დიეგო კოშტა არბიტრ მანსანოსთან მიიჭრა და რაღაც უწმაწური უთხრა. “ატლეტიკო” 10 კაცის ამარა დარჩა და მხოლოდ ის შეძლო, რომ 85-ე წუთამდე გაძლო, მერე კი ლუის სუარესისა და ლეო მესის გოლებით დამარცხდა და ჩემპიონატის მთავარ ინტრიგას წერტილი დაესვა - “ბარსა” “ატლეტიკოს” 11 ქულით უსწრებს, ლა ლიგის დასრულებამდე კი მხოლოდ 7 ქულა რჩება.

ერნესტო ვალვერდე (ბარსელონა): “ეს ძალიან მნიშვნელოვანი სამი ქულაა. ჩვენ დავუახლოვდით ტიტულს, თუმცა ის ჯერ არ მოგვიპოვებია. საქმე ბოლომდე უნდა მივიყვანოთ. დღევანდელი მატჩი ბევრს ნიშნავდა. ბედნიერი ვარ, რადგან ოპონენტი ტყუილად არ არის მეორე ადგილზე, “ატლეტიკომ” ბოლომდე იბრძოლა. თან, ეს ათი კაცით გააკეთა. ახლა ჩვენი კონცენტრაცია ჩემპიონთა ლიგაზე გადაინაცვლებს”.

თამაშის შემდეგ ზინედინ ზიდანი გამოტყდა, რომ “რეალს” მოტივაციის გარეშე უჭირს ლა ლიგაში. რომ არა ქარიმ ბენზემას დუბლი “ეიბარის” კარში, ვინ იცის, შესაძლოა, ფრანგ სპეციალისტს მისთვის მე-100 მატჩი ლა ლიგაში “სამეფო კლუბის” თავკაცის რანგში, ჩამწარებოდა კიდევაც.

ზინედინ ზიდანი (რეალი): “ჩვენ კარგად ვიცით, რომ ამ სეზონში ვეღარაფერს მოვიგებთ. არაფრისთვის თამაში კი ძალზე ძნელია. შესვენებაზე, რაღაც უნდა შეგვეცვალა, რადგან ასე გაგრძელება არ შეიძლებოდა. უფრო გუნდურად ვითამაშეთ, მოვინდომეთ და ყველაფერი შეიცვალა. ვულოცავ იმ ფეხბურთელებს, ვინც თამაშის შემოტრიალება შეძლეს. რაც შეეხება ბეილს, ვნახოთ, იქნება თუ არა გარეთი “რეალში” მომავალ სეზონში. ისე, მას გუნდთან კიდევ ორი წელი რჩება კონტრაქტით”.

ფაქტები

* სერხი დარდერს (ესპანიოლი) ამ სეზონში (27 თამაში) უკვე 3 გოლი აქვს გატანილი, მაშინ, როცა გასულ სეზონში 35 მატჩში მხოლოდ ერთი გოლი გაიტანა.

* კრისტიან სტუანიმ (ჟირონა) ყოფილ გუნდ “ესპანიოლს” 8 დაპირისპირებაში 5 გოლი გაუტანა.

* “რეალმა” 62 გოლი გაუშვა ლა ლიგაში, ეს ყველაზე მეტია.

* “ეიბარის” წინააღმდეგ პირველ ტაიმში “რეალი” მხოლოდ ერთხელ დაჯარიმდა.

* “რეალმა” მას მერე, რაც აგებდა, თამაშის შემოტრიალება ბოლო 9 შემთხვევიდან პირველად შეძლო.

* დანი პარეხომ (ვალენსია) 2017 წლის შემდეგ პირველად ვერ გაიტანა პენალტი ლა ლიგაში (10-დან 10 სერია ჰქონდა).

* კეილორ ნავასმა (რეალი) მეასედ ითამაშა ლა ლიგაში, ზინედინ ზიდანმა ტურნირზე მეასედ გაიყვანა “რეალი”.

* “ვალენსიას” 17-მატჩიანი წაუგებელი სერია (10 მოგება, 7 ფრე) დასრულდა.

* დიეგო სიმეონემ (ატლეტიკო) “ბარსელონას” ლა ლიგაში 15 ცდიდან ვერც ერთხელ ვერ მოუგო.

* რაც სიმეონე “ატლეტიკოს” მწვრთნელია, გუნდის 9 ფეხბურთელი გააძევეს “ბარსელონასთან” თამაშებში.

* ლუის სუარესმა ზედიზედ ორჯერ საჯარიმოს გარედან პირველად გაიტანა ბარსელონურ კარიერაში.

* 335 გამარჯვებით, ლეო მესი (ბარსელონა) ლა ლიგის რეკორდსმენი გახდა, მან იკერ კასილიასს გაუსწრო (334 გამარჯვება ლა ლიგაში).

* იაგო ასპასი (სელტა) ევროპის ტოპლიგებში ერთადერთი ესპანელია, რომელმაც ამ სეზონში 4 დუბლი შეასრულა.

* ვილიან ჟოზე (რეალ სოსიედადი) ამ სეზონში ერთადერთი ფორვარდია, რომელმაც ერთ თამაშში გოლიც გაიტანა და წითელი ბარათიც მიიღო.

* ხოაკინ კაპაროსმა “სევილიაში” 65 თამაში მოიგო (ლა ლიგა), ეს კლუბის რეკორდია. მან ელენიო ერერას (64) გადაასწრო.

* ბრაიან ხილი (სევილია) ერთადერთი ფეხბურთელია, ვინც 21-ე საუკუნეში დაიბადა და ევროპის ტოპ-5 ლიგებში საგოლე პასი მიითვალა.

* “ლეგანესმა” ზედიზედ მეექვსედ არ წააგო “ალავესთან” დაპირისპირებაში.

ჟირონა-ესპანიოლი 1:2
გოლები: 0:1 დარდერი (59), 1:1 სტუანი (80-პენ), 1:2 ბონო (89 ს.კ.)

რეალი-ეიბარი 2:1
გოლები: 0:1 კარდონა (39), 1:1 ბენზემა (59), 2:1 ბენზემა (81)

ვალეკანო-ვალენსია 2:0
გამოუყენებელი პენალტი: პარეხო (28)

ბარსელონა-ატლეტიკო 2:0
გოლები: 1:0 ლუის სუარესი (85), 2:0 მესი (87)
გაძევება: დიეგო კოშტა (28)

ალავესი-ლეგანესი 1:1
გოლები: 1:0 კალერი (18-პენ), 1:1 ხ. სილვა (93)

ხეტაფე-ბილბაო 1:0
გოლი: 1:0 ანხელი (78)

ვალიადოლიდი-სევილია 0:2
გოლები: 0:1 მესა (84), 0:2 ელ ჰადადი (92)

სელტა-სოსიედადი 3:1
გოლები: 0:1 ვილიან ჟოზე (32-პენ), 1:1 ასპასი (51-პენ), 2:1 ასპასი (70), 3:1 მ. გომესი (91)
გაძევება: ვილიან ჟოზე (58. რეალ სოსიედადი)

ლევანტე-უესკა 2:2
გოლები: 1:0 როხერი (19), 1:1 ენრიკი (63), 2:1 ხ. მორალესი (65-პენ), 2:2 ავილია (69)

ბეტისი-ვილიარეალი 2:1
გოლები: 1:0 ლო სელსო (11), 1:1 მორი (13), 2:1 ლო სელსო (63)
გამოუყენებელი პენალტი: კასორლა (89. ვილიარეალი)

თ მ ფ წ ბ ქ
1. ბარსელონა 31 22 7 2 81:31 73
2. ატლეტიკო 31 18 8 5 45:21 62
3. რეალი 31 19 3 9 55:37 60
4. ხეტაფე 31 13 11 7 38:27 50
5. სევილია 31 14 7 10 51:37 49
6. ვალენსია 31 10 16 5 33:26 46
7. ალავესი 31 12 9 10 32:38 45
8. ბილბაო 31 10 13 8 33:35 43
9. ბეტისი 31 12 7 12 36:40 43
10. სოსიედადი 31 10 10 11 37:38 40
11. ლეგანესი 31 10 10 11 31:35 40
12. ეიბარი 31 9 12 10 41:43 39
13. ესპანიოლი 31 10 8 13 35:45 38
14. ჟირონა 31 8 10 13 33:43 34
15. ლევანტე 31 8 9 14 44:56 33
16. სელტა 31 8 8 15 45:53 32
17. ვალიადოლ. 31 7 9 15 24:43 30
18. ვილიარეალი 31 6 12 13 39:45 30
19. ვალეკანო 31 7 6 18 34:54 27
20. უესკა 31 5 9 17 35:55 24

ბომბარდირები: 33 - მესი (ბარსელონა); 20 - სუარესი (ბარსელონა); 18 - სტუანი (ჟირონა); 17 - ბენზემა (რეალი).

მომდევნო ტური
13 აპრილი: ესპანიოლი-ალავესი, უესკა-ბარსელონა, ატლეტიკო-სელტა, სევილია-ბეტისი
14 აპრილი: ვალიადოლიდი-ხეტაფე, ბილბაო-რაიო ვალეკანო, რეალ სოსიედადი-ეიბარი, ჟირონა-ვილიარეალი, ვალენსია-ლევანტე
15 აპრილი: ლეგანესი-რეალი

ყოველდღიური სპორტული გაზეთი "ლელო"
797
მკითხველის კომენტარები / 0 /
მსგავსი ამბები
რუბრიკის სხვა სიახლეები
;