ლებრონი და დურანტი ისევ ერთად: როგორი უნდა იყოს აშშ-ის ნაკრები ტოკიოს 2020 წლის ოლიმპიადაზე

მსოფლიოს ჩემპიონატზე მეშვიდე ადგილის შემდეგ, ამერიკელები, უბრალოდ, ვალდებულნი არიან შეკრიბონ ტოკიოს თამაშების წინ უძლიერესი შემადგენლობა. როგორი უნდა იყოს ახალი „ოცნების გუნდი“...

გამთამაშებელი - ჯეიმს ჰარდენი
სათადარიგოები: კაირი ირვინგი, რასელ უესტბრუკი

ოლიმპიადა - ერთადერთი ტურნირია, რომელზე გამგზავრებისთვისაც ამერიკის ნაკრების ვარსკვლავებს ხვეწნა არ სჭირდებათ. ტოკიოს 2020 წლის თამაშების ოქროსმედალოსნის წინასწარმეტყველება უკვე დღეს შეიძლება, რჩება მხოლოდ 12 საუკეთესოს შერჩევა.

მას შემდეგ, რაც მსოფლიოს 2019 წლის ჩემპიონატზე თითქმის ყველა ვარსკვლავმა თქვა უარი, აშშ-ის ნაკრების გენერალურმა მენეჯერმა ჯერი კოლანჯელომ მკაცრი კომენტარი გააკეთა: „შეუძლებელია ყველას დამახსოვრება, ვინც აპირებდა ჩვენთან ერთად ომში წასვლას, მაგრამ გადაიფიქრა“.

იმ 35 მოთამაშიდან, რომლებიც ამ ზაფხულს ნაკრებში გამოიძახეს, ჩინეთამდე მხოლოდ ოთხმა მიაღწია. გასაგებია კოლანჯელოს აღშფოთება, მაგრამ შეძლებს ის რომელიმე ვარსკვლავისთვის უარის თქმას, თუ ის თავად მოისურვებს ოლიმპიადაზე თამაშს? რა თქმა უნდა, ვერ შეძლებს. განსაკუთრებით მაშინ, როცა სასწორზე ოლიმპიური ოქროა. განსაკუთრებით ახლა, როცა ნაკრებმა თავის ისტორიაში ყველაზე ცუდი შედეგი აჩვენა (ადრე, ყველაზე დაბალი შედეგი იყო მეექვსე ადგილი მსოფლიოს 2002 წლის ჩემპიონატზე).

ამიტომაც, ჯეიმს ჰარდენი უნდა იყოს ოლიმპიადაზე. მსოფლიოს 2014 წლის ჩემპიონატის საუკეთესო მოთამაშე კაირი ირვინგი - მით უმეტეს. და რასელ უესტბრუკიც. თუმცა, ჯერ სანახავია, მისი ნაზი ფსიქიკა გაუძლებს თუ არა 2019-20 წლების სეზონს „ჰიუსტონში“ ჰარდენთან ერთად. ორ ეგოისტს შეუძლია „როკეტსი“ ცაშიც აიყვანოს ან უფსკრულში გადაჩეხოს. მეორე შემთხვევაში, გასაგებია, რომ დამნაშავედ ჰარდენს არ გამოაცხადებენ.

ყველაზე კარგი ვარიანტი ალბათ უესტბრუკის ნაცვლად კემბა უოკერის წაყვანა იქნება. თუნდაც იმიტომ, რომ მან ნაკრები არ დააღალატა და მსოფლიოს ჩემპიონატზე გაემგზავრა. მაგრამ, პოპულიზმი გაიმარჯვებს და დიდი ალბათობით, ტოკიოში უესტბრუკი გაემგზავრება.

შემტევი მცველი - სტეფ კარი
სათადარიგო: კლეი ტომპსონი

„გოლდენ სტეიტის“ წყვილი აშშ-ის ნაკრებშიც შესანიშნავი სანახავი იქნებოდა პირველ და მეორე ნომრის პოზიციებზე, მაგრამ ეს ვარიანტი მხოლოდ მაშინ იქნება ძალაში, თუ ოლიმპიადაზე არ წავა ჰარდენი. მაგრამ, თუ ჰარდენი უარს არ იტყვის, მაშინ სტეფ კარის მოუწევს მეორე მცველად მოედანზე გასვლა (რა თქმა უნდა, შეიძლება „ჰიუსტონის“ წყვილის - ჰარდენისა და უესტბრუკის გაყვანაც, მაგრამ დაცვას ვინ მიხედავს?)

ტომპსონი, როგორც იქნა, გამოვიდა „გოლდენ სტეიტის“ ლიდერის ჩრდილიდან, რეგულარულად ხვდება ეროვნული საკალათბურთო ასოციაციის „ყველა ვარსკვლავის მატჩში“, 2016 წელს, რიო-დე-ჟანეიროს ოლიმპიადაზე საშუალოდ 10 ქულას აგროვებდა.

NBA-ში მცველებს შორის უდიდესი კონკურენციის მიუხედავად, ის ნებისმიერი შემადგენლობით ნაკრებში მოხვედრის მყარი კანდიდატია. და ის მარტო, სტეფ კარის გარეშეც კი, შესაძლოა, საკმარისი ყოფილიყო იმისთვის, რომ ამერიკას მინიმუმ არ წაეგო საფრანგეთთან მსოფლიოს 2019 წლის ჩემპიონატზე.

მსუბუქი ფორვარდი - ლებრონ ჯეიმსი
სათადარიგო: ჯეისონ ტეიტუმი

თუ ამგვარად ჩაგდებული მსოფლიოს ჩემპიონატის შემდეგაც ლებრონ ჯეიმსი არ გაემგზავრება აშშ-ის ნაკრებში, ეს იმის მანიშნებელი გახდება, რომ ფულმა საბოლოოდ დაამარცხა სიკეთე. ჯეიმსის მთელი კარიერა - ეს არის ზედმიწევნით დაგეგმილი ბიზნესი, რომელშიც წვრილმანები არ არსებობს. ამ ბიზნესში ყოველწლიურად იდება მილიონობით დოლარი, რომელიც იხარჯება შემოსავლის მთავარი წყაროს - ლებრონის სხეულის დახვეწისთვისა და ცვეთისგან დაცვისთვის.

ნაკრებში ორი თვე ვარჯიში და ტოკიოში მგზავრობა 35 წლის ასაკში, თანაც უფასოდ - ეს ნამდვილად არ არის გონიერი ბიზნესგადაწყვეტილება. მაგრამ არსებობს ალბათობა, რომ მემკვიდრეობის საკითხი მაინც არანაკლებ მნიშვნელოვანია XXI საუკუნის საუკეთესო კალათბურთელისთვის. მას სურს გახდეს ყველა დროის საუკეთესო მოთამაშე და ოლიმპიადის მესამე ოქრო საშუალებას მისცემს, გაუსწროს მაიკლ ჯორდანს ოლიმპიურ თამაშებზე ჩემპიონის ტიტულების რაოდენობით.

მსოფლიოს 2019 წლის ჩემპიონატის ერთადერთი მონაწილე, რომლის ადგილიც მოინახა ოლიმპიურ შემადგენლობაში - ჯეისონ ტეიტუმია. მას ბევრი წუთი არ შეხვდება ლებრონის გადამკიდე, მაგრამ გუნდისთვის თავისი სარგებლობა მაშინ დაამტკიცა, როცა თურქეთთან მატჩში ტრავმა მიიღო. მის გარეშე, აშშ-ის ნაკრები პლეი ოფში სულ მთლად მოსაწყენი გახდა.

გარდა მეოთხედფინალში საფრანგეთთან წაგებისა, ასევე იყო კოშმარული 7:32 სერბეთთან მეხუთე-მერვე ადგილებისთვის მატჩის პირველ მეოთხედში. სწორედ ამ მატჩში წაგების შემდეგ აჩვენეს ამერიკელებმა ოფიციალურად ყველაზე ცუდი შედეგი ისტორიაში - ასე რომ, არ ღირს იმაზე ლაპარაკი, თითქოს სერბეთთან მატჩი არაფერს წყვეტდა.

მძიმე ფორვარდი - კევინ დურანტი
სათადარიგო: პოლ ჯორჯი
ამერიკის ნაკრების ყველაზე მძლავრი პოზიცია. პრინციპში, აქ შეიძლება ითამაშონ ლებრონმაც, ენტონი დევისმაც, მაგრამ სჯობს ისინი სხვაგან გადავიდნენ, რადგან აქ დიდი სიმჭიდროვეა. თუ ჯორჯი წელიწად-ნახევარში რაიმე ახალ ტრავმას არ მიიღებს, ხოლო დურანტი და ირვინგი არ ჩააგდებენ „ბრუკლინში“ საჩემპიონო კამპანიას, ერთი წლის შემდეგ, ისინი კიდევ უფრო ძლიერები გახდებიან.

დურანტი ნაკრებში - ყოველთვის დიდი სარგებლობაა. ის 21 წლის ასაკში ერთმნიშვნელოვნად საუკეთესო იყო მსოფლიოს 2010 წლის ჩემპიონატზე, 27 წლის ასაკში კი რიოს ოლიმპიურ თამაშებზე. 31 წელი ასეთი დონის მოთამაშისთვის - საერთოდ არაფერია.

დურანტის გეგმები მომავალი ორი წლის განმავლობაში - გახდეს NBA-ის ჩემპიონი ახალ კლუბთან ერთად და პირველი ნომერი იყოს აშშ-ის ნაკრებში.

ცენტრი - ენტონი დევისი
სათადარიგოები: დემარკუს კაზინსი, ანდრე დრამონდი
ის მოსაზრება, რომ თანამედროვე კალათბურთში არ დარჩა კლასიკური ცენტრების ადგილი, წარმატებით უარყო ამ ჩემპიონატზე ფრანგმა რუდი გობერმა.

ასე რომ, ტიპური მეხუთე ნომერი - კაზინსი (თუ ჯანმრთელი იქნება) და დრამონდი ტოკიოში გამოსადეგები იქნებიან. მაგრამ, ნაკლებად სავარაუდოა, მათ ბევრი ითამაშონ, რადგან არსებობს დევისი. ის მთლად ცენტრი არ არის, მაგრამ აშშ-ის ნაკრებში ისეთი შემადგენლობაა, რომ ხუთი საუკეთესო მოთამაშისთვის აუცილებლად მოსაძებნია ადგილი სასტარტო ხუთეულში.

ტოკიოში ამ შემადგენლობის ნახევარიც რომ გაემგზავროს - ოლიმპიადა ისე არ დამთავრდება, როგორც მსოფლიოს ჩემპიონატი.

ყოველდღიური სპორტული გაზეთი "ლელო"
461
მკითხველის კომენტარები / 0 /
მსგავსი ამბები
რუბრიკის სხვა სიახლეები
;