ლებრონ ჯეიმსი ამერიკის პრეზიდენტად

ლებრონ ჯეიმსმა მშობლიურ აკრონში სკოლა გახსნა - I Promise ("მე გპირდები"). გახსნის ცერემონიის დღეს, CNN-ის ჟურნალისტმა ლებრონს ჰკითხა - მზად არის თუ არა გახდეს პრეზიდენტობის კანდიდატი 2020 წელს. "მზად ვიქნები, თუ მათ არავინ ეყოლებათ. დარწმუნებული ვარ, ვიღაც გამოინახება. მე შემიძლია მონაწილეობა. ვნახოთ", - თქვა ჯეიმსმა.

"მათში" კალათბურთელმა დემოკრატიული პარტია იგულისხმა. დემოკრატებს ჯერ კიდევ ბარაკ ობამამდე ჰქონდათ დიდი მხარდაჭერა შავკანიან მოსახლეობაში, ამასთან, ლებრონი მონაწილეობდა ჰილარი კლინტონის საარჩევნო კამპანიაში.

თავად ის ფაქტი, რომ ჯეიმსს კითხვას უსვამენ 2020 წელზე, იმაზე მიუთითებს, თუ როგორ შეიცვალა ამერიკა დონალდ ტრამპის შემდეგ. ცხადი გახდა: თუ ექსცენტრულმა და ოდნავ არაჯანმრთელმა ბიზნესმენმა მოახერხა პრეზიდენტობა, გამოდის, ამ პოსტზე ნებისმიერს შეუძლია პრეტენზიის წამოყენება.
ბოლო კანდიდატურა, რომელსაც ამერიკული პრესა 2020 წლისთვის სთავაზობდა, მსახიობი დუეინ ჯონსონი იყო. გასული წლის მაისში, "კლდე" GQ-ს გარეკანზე მოხვდა და ჟურნალმა გამოუშვა მასალა სათაურით - "დუეინ ჯონსონი პრეზიდენტად!" ამის შემდეგ დაიწყო სპეკულაციების მძლავრი ტალღა და ყველა იმ აზრამდე მივიდა, რომ ჯონსონის კანდიდატურა სოლიდურად მოჩანდა. თავად მსახიობი ცეცხლზე ნავთს ასხამდა - მაგალითად, ჯიმი კიმელის ტელეშოუში ხუმრობით აღიარა, რომ თანახმაა საპრეზიდენტო კამპანიაში ჩართვაზე.

[რა მოხდა სინამდვილეში?] ჯეიმსისა და ტრამპის Twitt-ომი

მაგრამ, რაც უფრო მეტს პასუხობდა "კლდე" პრეზიდენტობაზე შეკითხვებს, მით უფრო ნაკლებად გეჩვენებოდა მის ლაპარაკი ხუმრობად. ივლისის დასაწყისში ჯონსონმა გაჩერება გადაწყვიტა. მან განაცხადა, რომ არ აპირებს პრეზიდენტის პოსტზე კანდიდატურის წამოყენებას: "ეს მრავალწლიან მუშაობას მოითხოვს, ჩემი მჭიდრო გრაფიკიდან გამომდინარე კი არ შემიძლია 2020 წლისთვის გამოცდილების დაგროვება". ამ განცხადებიდან გასაგები გახდა, რომ დუეინი არ ტოვებს პოლიტიკურ ამბიციებს, მაგრამ არც მოვლენათა დაჩქარებას აპირებს.

გადავიდეთ მიზეზებზე, თუ რატომ განიხილავდა ამერიკა სერიოზულად ყოფილი რესტლერისა და საშუალო დონის ბლოკბასტერების ვარსკვლავის პრეზიდენტობას.

"კლდეს" ფანების მრავალრიცხოვანი და მეტად ლოიალური არმია ჰყავს, რომლებიც ყოველთვის მის გვერდით არიან, რა პროექტშიც არ უნდა მიიღოს მონაწილეობა.

ის მთელს მსოფლიოში პოპულარულია, რასაც ადასტურებს ხელმომწერთა რიცხვი სოციალურ ქსელებში და სარეკლამო კონტრაქტების თანხები.
მედიაში პოპულარობის გამო, ისეთი შთაბეჭდილება რჩება, რომ მას დიდი ხანია იცნობთ, თითქოს თქვენი ძველი მეგობარი იყოს.

ის სწორ რამეებს ლაპარაკობს - ძირითადად იმაზე, რამდენად მნიშვნელოვანია მონდომებით მუშაობა, ან იმაზე, რომ არ უნდა დანებდე ნებისმიერი სირთულის წინაშე.

მას კარიერის გარკვეულ ეტაპზე ვერ იტანდნენ, მაგრამ, ახლა, მის მიმართ მხოლოდ პატივისცემას გამოხატავენ - ის ძალიან წარმატებულია.
მან ფეხი მოიკიდა კინობიზნესში და გამოიყენა ჰოლივუდი, რათა გაემაგრებინა საკუთარი პოზიციები.

მან გადაატრიალა ინდუსტრია, რომელშიც იწყებდა კარიერას, დროთა განმავლობაში, მის მიმართ ცივი დამოკიდებულება ჩამოუყალიბდა და გადაერთო სხვა ამოცანებზე.

არავის გაგონებთ?

ჯერჯერობით, მინიშნებები ლებრონის პოლიტიკურ კარიერაზე შეიძლება ყველას გადამეტებულად მოეჩვენოს. მაგრამ ის არსებობს.
დღეს პოპულარულია თეორია, რომ "ლეიკერსის" გენერალური მენეჯერი მეჯიქ ჯონსონი 1 ივლისს, ლებრონთან სახლში მივიდა არა კონტრაქტის დეტალების შესათანხმებლად, არამედ არაფორმალური ურთიერთობისთვის და უმნიშვნელო საკითხების მოსაგვარებლად. ამასთან, ჯეიმსი ყველანაირად აჩვენებდა თავს, რომ "ლეიკერსი" შემთხვევით აირჩია, დეტალებს ჩაუღრმავდა და ოჯახის ინტერესებიდან გამოვიდა. რა თქმა უნდა, ეს ასე არ არის. გამოდის, ლებრონმა და მისმა გარემოცვამ გაითავისა ნებისმიერი პოლიტიკოსის ყველაზე მნიშვნელოვანი თვისება - დაუმალოს პუბლიკას თავისი გადაწყვეტილებების ნამდვილი მოტივები.

ტრამპმა ლებრონს შეუტია, ლებრონი ჯორდანმა დაიცვა

ამასთან, ლებრონი პრაქტიკულად უკვე აღარ განიხილება კალათბურთის კონტექსტში. ამაშია განსხვავება 2010 (როცა ლებრონი "მაიამიში" გადავიდა) და 2018 (როცა "ლეიკერსი" აირჩია) წლებს შორის. ფართო პუბლიკისთვის სულერთი იქნება - დააგროვებს თუ არა სამმაგ დუბლს და გაუსწრებს თუ არა "ჰიუსტონს" ან "გოლდენ სტეიტს" სატურნირო ცხრილში, რადგან სულ რაღაც ერთ თვეში ის მოგვევლინა სამაგალითო მეოჯახისა და კეთილშობილი ფილანტროპის როლში.

YouTube-ში Uninterrupted-ის არხზე დაიდო პროგრამა The Shop-ის ფრაგმენტები, სადაც ლებრონმა საკუთარ თავში მზრუნველი მამის ახალი ამპლუა აღმოაჩინა. მას ეჭვი ეპარებოდა - უნდა მიეცა თუ არა ვაჟისთვის საკუთარი სახელი და გაუკვირდა, როცა ძალიან ნერვიულობდა შვილების თამაშებზე. გადაცემა საათზე მეტ ხანს გრძელდება, იქ უამრავი თემაა წამოწეული და უამრავი სტუმარი აფიქსირებს თავის აზრს. მაგრამ, ტრეილერისთვის სწორედ ეს ფრაგმენტები აირჩიეს. გარდა ამისა, ძალიან ცნობადი გახდა ლებრონ ჯეიმს-უმცროსი. დღეისთვის, ჯეიმსის ვაჟი YouTube-ის 5 ყველაზე პოპულარულ კალათბურთელს შორის შედის: 2.3 მილიონი ნახვა აქვს, არადა, მხოლოდ 13 წლისაა.

ამ დღეებში ყველა განიხილავს ლებრონის ახალ სკოლას. ეს რეალურად ლამაზი ისტორიაა, რომელშიც შეუძლებელია რაიმე ცუდი მომენტის აღმოჩენა. I Promise - არც კერძო სკოლაა და არც საზოგადოებრივი. ის ხელმისაწვდომია ყველაზე დაბალი სოციალური ფენიდან გამოსული ბავშვებისთვის. ჯერჯერობით აიყვანეს 120 ბავშვი მესამე კლასში და ამდენივე - მეოთხეში. და ეს შესანიშნავად ერგება თავად ჯეიმსის ბიოგრაფიას. როგორც ცნობილია, მან გამოტოვა მეოთხე კლასში 180-დან 80 სასწავლო დღე. იმ დროს, მის ოჯახს არ გააჩნდა მუდმივი საცხოვრებელი.

ლებრონს სკოლის გახსნა მიულოცა ყოფილმა პირველმა ლედიმ მიშელ ობამამ და მას მეუღლის მადლიერების სიტყვები გადასცა.
შეიძლება ითქვას, რომ სკოლა - არც ისე რთული პროექტია ადამიანისთვის, რომელიც 15 წელია იღებს უზარმაზარ თანხებს კლუბებისგან და სპონსორებისგან. მაგრამ მნიშვნელოვანია იმის აღნიშვნა, რომ პირველად, ჯეიმსი სკოლის შესახებ ჯერ კიდევ "მაიამიში" თამაშისას დაფიქრდა. ლებრონი აკრონში საქველმოქმედო მარათონს ატარებდა, მაგრამ, დროთა განმავლობაში, ის ფინანსურად შეუძლებელი გახდა ქალაქის ბიუჯეტისთვის. ფონდმა Lebron James Family Foundation-მა გადაწყვიტა - ერთჯერადი ღონისძიებიდან მთელი ძალისხმევა უქონელი ოჯახებიდან გამოსული მოზარდების დახმარების პროგრამისკენ მიემართა. და მრავალწლიანი და რთული მუშაობის შემდეგ, ფონდი ახალ სკოლამდე მივიდა.

"ჩვენ გვინდა დავანახოთ ბავშვებს, რომ მზად ვართ მათ გვერდით ვიდგეთ და დავიცვათ ისინი. ვფიქრობ, ბავშვებს სწორედ ეს უნდათ. მათ სურთ მზრუნველობა იგრძნონ. აი ამით ვართ აქ დაკავებული", - აუხსნა ლებრონმა ESPN-ს. I Promise-ში სასწავლო დღე უფრო გრძელია, ვიდრე სხვა სკოლებში - 9 საათიდან 17 საათამდე. არდადეგებიც უფრო მოკლეა, ვიდრე სხვაგან. ასე უფრო იმედიანად იქნებიან იმაზე, რომ ბავშვებს, უბრალოდ, დრო არ დარჩებათ ქუჩის ცდუნებებზე, რომელსაც, თავის დროზე, ლებრონმა მისდია. ის ხშირად ამბობს ასეთ რამეს: "მე აქ არ უნდა ვიყო, მე სტატისტიკა უნდა გავმხდარიყავი". ის გულისხმობს, რომ უნდა ჩაკარგულიყო უმუშევრობის, კრიმინალის ან გაუნათლებლობის ნაღვლიან სტატისტიკაში.

ლებრონი დახმარებას სთავაზობს არა მხოლოდ ბავშვებს, არამედ მათ მშობლებს. I Promise ჩაატარებს კურსებს უფროსებისთვის, რომლებმაც ვერ შეძლეს საშუალო განათლების მიღება. აქვეა უფასო კვება: საუზმე და სადილი. ის ბავშვები, რომლებიც ბოლომდე გაივლიან სწავლების კურსს, შეძლებენ აკრონის უნივერსიტეტში მოხვედრას - სწავლას სრულად დაუფინანსებს თავად ლებრონი. თუ ვინმე გაკვეთილებს გააცდენს, მას მაშინვე დაურეკავენ სკოლიდან. ყურმილში გაისმება ლებრონის ხმა: დიადი კალათბურთელი ჰკითხავს მეოთხეკლასელს - რატომ არ იყო დღეს სკოლაში?

დუეინ ჯონსონი ვერასოდეს შეძლებს აუდიტორიისთვის საკუთარი თავის მიყიდვას მეოჯახე ადამიანის ამპლუაში. ის განქორწინებულია და იშვიათად ჩნდება პუბლიკაზე ქალიშვილებთან ერთად. "კლდეს" ლებრონის სკოლის მასშტაბისა არაფერი შეუქმნია - ჯონსონის ყველა მოქმედება მოქცეულია რინგების, გადასაღები მოედნებისა და სამოტივაციო ტრენინგების სიბრტყეში. ის არასოდეს აკრიტიკებდა ტრამპს და არასოდეს გამოუთქვამს საკუთარი აზრი მნიშვნელოვან სოციალურ საკითხებზე. ლებრონი კი ამ ყველაფერს აკეთებდა და თან არა ერთი წელი.

"შესაძლოა, ჯეიმსი ყველაზე გავლენიანი სპორტსმენია მოჰამედ ალის შემდეგ სოციალურ და პოლიტიკურ ჭრილში", - დაწერა Vox-მა და ლებრონს თანამედროვე ამერიკის ყველაზე მნიშვნელოვანი სპორტსმენი უწოდა.

ასე რომ, უახლოესი ორი წლის განმავლობაში, თვალი ადევნეთ მას არა მხოლოდ საკალათბურთო მოედანზე. ლოს ანჯელესში ლებრონი კალათბურთისთვის არ წასულა.

554
მკითხველის კომენტარები / 0 /
მსგავსი ამბები
რუბრიკის სხვა სიახლეები