ლებრონ ჯეიმსი: აშშ-ში ხალხს იარაღის შეძენა შეუძლია და ამას ახალგაზრდობა ეწირება

"ლოს ანჯელეს ლეიკერსის" ლიდერი ლებრონ ჯეიმსი კიდევ ერთი მნიშვნელოვანი სტატისტიკური მიღწევის ავტორი გახდა.

ორშაბათს, "ატლანტას" წინააღმდეგ მატჩში, ლებრონმა დააგროვა 26 ქულა და გაუსწრო ლეგენდარულ მაიკლ ჯორდანს რეგულარულ სეზონებსა და პლეი ოფში ერთად აღებული ქულების რაოდენობით.

ახლა, ჯეიმსის აქტივში 38 292 ქულაა. აქედან 31 381 ქულა რეგულარულ ჩემპიონატებზე მოდის და 6 911 ქულა - პლეი ოფის მატჩებზე. ჯორდანის მონაგარი იყო 38 279 ქულა (32 292+5 987).

ამ მაჩვენებლით, ყველა დროის სიას სათავეში უდგას ქარიმ აბდულ-ჯაბარი - 44 749 (38 987+5 762), მეორეა კარლ მელოუნი - 41 689 (36 928+4 761), მესამე კობი ბრაიანტი - 39 283 (33 643+5 640). ჯეიმსი და ჯორდანი მეოთხე და მეხუთე ადგილებზე არიან.

ლებრონ ჯეიმსი მეექვსე ადგილზე იმყოფება NBA-ის ისტორიაში რეგულარული ჩემპიონატების ყველაზე შედეგიანი კალათბურთელების სიაში და ჩამორჩება ჯორდანს 911 ქულით. ლებრონს სჭირდება დაახლოებით 35 მატჩი იმისთვის, რომ დაეწიოს ჯორდანს, რომელიც ყველა დროის სიაში მეოთხე ადგილზე იმყოფება.

ამასობაში, ლებრონ ჯეიმსმა სხვა მოთამაშეებთან ერთად მიიღო მონაწილეობა ხსოვნისა და გლოვის აქციაში, რომელიც კალიფორნიის ქალაქ თაუზენდ-ოუკსში მომხდარ ტრაგედიას მიეძღვნა. 8 ნოემბერს, ამ ქალაქში მასობრივი სროლისას 13 ადამიანი დაიღუპა. "ატლანტა ჰოქსთან" მატჩის წინ, "ლეიკერსის" მოთამაშეებმა ჩაიცვეს მაისურები, რომლებზეც ეწერა დაღუპულთა სახელები და სიტყვა "კმარა".

"რა გავიფიქრე, როცა ამ სროლის შესახებ შევიტყვე? ალბათ, იგივე, რაც სხვებმა. ოღონდ ეს არა. შესაძლოა, გონებაში უფრო მკაცრი სიტყვები მქონდა, მაგრამ, ახლა, მათ არ ვიტყვი. ეს ყველაფერი - არის აშშ-ში იარაღის ბრუნვის სიტუაციის შედეგი. ნებისმიერ ადამიანს შეუძლია შეიძინოს იარაღი და მასთან ერთად გააკეთოს, რაც სურს. უდანაშაულო ადამიანები კი ადრეულ ასაკში იხოცებიან", - მოჰყავს ჯეიმსის სიტყვები Sports Illustrated -ს.

ყოველდღიური სპორტული გაზეთი "ლელო"
307
მკითხველის კომენტარები / 0 /
მსგავსი ამბები
რუბრიკის სხვა სიახლეები