ლეგენდარული მწვრთნელის ნოდარ ახალკაცის ბიუსტი, მის მშობლიურ სკოლაში გაიხსნა

თბილისის მე-9 საჯარო სკოლა ნაძალადევის მეტროსთან, სააკაძის ქუჩის 29 ნომერშია.

ბევრისთვის უცნობია, რომ ვეტერან ფეხბურთელთა კავშირის, ფეხბურთის ფედერაციისა და სკოლის დირექტორის, ქალბატონ მარინა გიგაურის მონდომების შედეგად, სკოლა ნოდარ ახალკაცის სახელობის გახდა - ფიფას საგანგებო ორდენით დაჯილდოებული ლეგენდარული მწვრთნელი და საქართველოს ფეხბურთის ფედერაციის პირველი პრეზიდენტი სწორედ ამ სკოლაში სწავლობდა...

...გუშინ კი, ფეხბურთის ფედერაციის ფინანსური მხარდაჭერითა და ვეტერან ფეხბურთელთა კავშირის ორგანიზებით, მე-9 სკოლაში ნოდარ ახალკაცის ბიუსტი გაიხსნა, რომელიც მოქანდაკე გოგი შხვაცაბაიამ დაამზადა. 2018 წლის 2 იანვარს ახალკაცს 80 წელი შეუსრულდებოდა.

ბიუსტის გახსნის ღონისძიებას მისი ოჯახის წევრები, საქართველოს ფეხბურთის ფედერაციის ხელმძღვანელები, ახალკაცის დროინდელი "დინამოს" ფეხბურთელები და სხვადასხვა სახეობის ვეტერანი სპორტსმენები დაესწრნენ.

"ჩემთვის დიდი პატივია აქ ყოფნა. ჩვენ ამას არ დავჯერდებით, რადგან 2 იანვარს ნოდარ ახალკაცის დაბადებიდან 80 წელი სრულდება და იუბილეს საზეიმო ღონისძიებებით აღვნიშნავთ", - ამბობს ფეხბურთის ფედერაციის გენერალური მდივანი დავით მუჯირი.

ალექსანდრე ჩივაძე: "ეს საკმარისი არ არის, ქალაქის მერიას უნდა მივმართოთ თხოვნით, რათა ამ დიდი პიროვნების სახელი თბილისის რომელიმე ქუჩას ეწოდოს".

ვლადიმერ გუცაევი: "ვეთანხმები საშას. ახალკაცი საქართველოსთვის იმხელა პიროვნება იყო, ნამდვილად იმსახურებს, მისი სახელი რომელიმე ქუჩას ერქვას. მე-20 საუკუნეში საქართველოს ბევრი დიდი სიხარული არ ჰქონია,

იყო მეორე მსოფლიო ომში გამარჯვება და 13 მაისი - ახალკაცმა რაც ამ ქვეყნისთვის გააკეთა, ის ბევრმა ვერ მოახერხა. ამის გამო მას საქართველოს დიდი გმირებისა და მეფეების გვერდით ვაყენებ".

ღონისძიებას უმცროსი ნოდარ ახალკაციც ესწრებოდა - საქართველოს ფეხბურთის ფედერაციის ყოფილი პრეზიდენტი, რომელიც ფიფას ეროვნული ასოციაციების მართვის დეპარტამენტის თავმჯდომარეა:

- ოჯახის სახელით მადლობა ყველა იმ ადამიანს, ვინც ამ საქმეში მონაწილეობდა, ფეხბურთის ფედერაციის, ვეტერანთა კავშირისა და მოქანდაკე გოგი შხვაცაბაიას თამადობით! ოჯახის წევრები მოხარულები ვართ და გვეამაყება, რომ ნოდარ ახალკაცი კიდევ ერთხელ დაფასდა.

ისიც, მისი სახელი რომ დღემდე ახსოვს ყველას, ვისაც ფეხბურთი უყვარს და ვისთვისაც ამ დიდი პიროვნების სახელი ქართველი ხალხის დიდ სიხარულთან არის დაკავშირებული. მომავალ წელს, ნოდარ ახალკაცის იუბილესთან დაკავშირებით, კიდევ არაერთი ღონისძიებაა დაგეგმილი.

- კერძოდ?

- ეს ჯერ განსახილველია. ლაპარაკია რომელიმე ქუჩისთვის სახელის მინიჭებაზე, კიდევ სხვა სახის ღონისძიებებზე...

- საერთაშორისო ტურნირის გამართვაც ხომ არ გაქვთ გეგმაში?

- ამის ორგანიზება ძალიან რთული იქნება, რადგან კალენდარი ძალიან მჭიდროდაა დალაგებული და თავისუფალი დრო, ფაქტობრივად, აღარავის რჩება. ხომ ხედავთ, უეფამ ამხანაგური მატჩები ერთა ლიგით ჩაანაცვლა.

- თავადაც გადატვირთული გრაფიკი გქონიათ, ფიფა ხან ყირგიზეთში გაგზავნით და ხან - კუვეიტსა და ავსტრალიაში...

- დიახ, ჩვენი კომიტეტი ეროვნულ ფედერაციებს კურირებს და სახელმწიფოს ჩარევის საკითხებს განიხილავს. მაგალითად, ზაფხულში ყირგიზებს ახალი წესდების მიღებაში რეკომენდაციებით დავეხმარეთ. სამწუხაროდ, საქართველოში ჩამოსვლა მეც იშვიათად მიწევს, მაქსიმუმ, ერთი თვე თუ ვახერხებ.

- პარალელურად, როგორც ვიცით, ფიფას დირექტორი ბრძანდებით...

- დიახ, ასეა.

- ამ როლში ფიფა 2018 წელს, რუსეთში გასამართავ მსოფლიოს ჩემპიონატზეც მიგავლენთ?

- ჩვენი განყოფილებების საქმეებით ისე ვარ დაკავებული, ჯერ ამის თქმა გამიჭირდება. მაგრამ საორგანიზაციო საკითხებში ჩართული ნამდვილად ვიქნები.

ყოველდღიური სპორტული გაზეთი "ლელო"
2054
მკითხველის კომენტარები / 1 /
aburjga
0
ჩემი აზრით კარგი, სწორი ამბავია! მაგრამ მე ვინ ვარ? მთავარია რას იტყვის ხუხაშვილი 360 გრადუსში ტუხიაშვილთან მორიგი სტუმრობისას!
მსგავსი ამბები
რუბრიკის სხვა სიახლეები
;