საქართველოში ძიუდოს ერთ-ერთი ფუძემდებელი 86 წლისაა

რამდენიმე წლის წინათ გორის ახალგახსნილ ძიუდოს დარბაზში გურამ პაპიტაშვილთან მორიგი ინტერვიუს ჩაწერის შემდეგ რესპოდენტს დავემშვიდობე და კიბეებზე დავეშვი. დარბაზის გასასვლელში სასპორტო სკოლის ერთ-ერთმა თანაშრომელმა თითით ზემოთ მიმითითა და მკითხა: "პაპა აქ არის?"

მივხვდი ბატონ გურამზე რომ მეკითხებოდა და დასტურად თავი დავუქნიე.

... გურამ პაპიტაშვილს მხოლოდ გორში კი არა საქართველოში უკვე მრავალი წელია რაც "ძიუდოს პაპას" უწოდებენ. უკვე 86 წლის ღვაწლმოსილი ეს ადამიანი, საქართველოში ძიუდოს ერთ-ერთი ფუძემდებელია და მადლობა ღმერთს, რომ ასაკის მიუხედავად ჯერაც ქართული ძიუდოს გვერდითაა.

დავით გობეჯიშვილი: სახლიდან დარბაზამდე 3 კილომეტრი მაინც უნდა გამევლო... წვიმა, თოვლი, შიშიც დამიძლევია [VIDEO]

სხვადასხვა შეჯიბრებების მიმდინარეობისას, მეტადრე გორის დარბაზში ბატონი გურამი ახლაც ხშირად ორგანიზატორის ფუნქციას ისევ დაუზარელად ითავსებს, შეჯიბრების დასაწყიში მიმართავს მონაწილეებს, მაყურებლებს, როცა საჭიროა შეაჩერებს შეჯიბრებას, ვისაც მისათითებელი აქვს რჩევას ან შენიშვნას მისცემს და ხშირად დაჯილდოების ცერემონიასაც ორგანიზებას თავად უკეთებს.

ის ასაკს არ უშინდება და კვლავ აქტიურია. ასეთ დროს ხშირად მახსენდება ხოლმე ძიუდოს დარბაზში გაგონილი მაშინდელი სიტყვები: "პაპა აქ არის?"

დიახ, პაპა აქ არის და ისევ ერთგულად ემსახურება საყვარელ საქმეს!

არადა, განა ბევრია 80 წელს გადაცილებული სპორტის ამაგდარი მუშაკი, რომელიც ისევ აქტიურად ცდილობს ახალგაზრდებს დაეხმაროს, გამოცდილება გაუზიაროს და საერთო წარმატებაში წვლილი შეიტანოს?

გურამ პაპიტაშვილი თავისი სამწვრთნელო მოღვაწეობის გარიჟრაჟზე გორის პედაგოგიური ინსტიტუტში სწავლის დამთავრების შემდეგ, ბამბეული ქსოვილების კომბინატის დარბაზში ავარჯიშებდა ახალგაზრდა სპორტსმენებს. ერთხელ, ქალაქის პირველობაზე მისმა გუნდმა ინსტიტუტის გუნდს აჯობა და გარდამავალი თასი, რომელიც წლების განმავლობაში ინსტიტუტელებს ჰქონდათ "ოკუპირებული" - პაპიტაშვილის შეგირდების კუთვნილება გახდა. მაშინ გორის ინსტიტუტის რექტორს, სპორტის დიდ მეცენატს გიორგი ხარაულს დაუძახია ახალგაზრდა სპეციალისტისთვის და თავის სასწავლებელში მუშაობა შეუთავაზებია. იქვე ხარაულმა, ახალგაზრდა მწვრთნელს საკუთარი შორსმიმავალი გეგმებიც გააცნო.

- ჩვენ ისე უნდა შემოვკრათ ზარს გურამ ჩვენი გამარჯვებებით, რომ მისი ხმა რაც შეიძლება შორს გავიდეს! – თქვა რექტორმა მასთან პირველი საქმინი შეხვედრისას.

ბატონ გურამს ხშირად უთქვამს, რომ გიორგი ხარაულის ეს სიტყვები უაღრესად შთამბეჭდავი იყო და აღარასოდეს დავიწყებია.

დაუჯერებელი გმირობის ამბავი: რატომ წამოუდგა ფეხზე ოთარ ქორქიას მთელი ამერიკის ნაკრები? [VIDEO]

ხარაულმა გორის უმაღლეს სასწავლებელში პაპიტაშვილის ხელმძღვანელობით შეკრიბა იმდროინდელ ქართულ საჭიდაო ასპარეზზე ყველაზე უფრო პერსპექტიული ფალავნების მთელი ჯგუფი და შეუდგა წარმატებების მოხვეჭას.
ზარის ხმა, რომელსაც რექტორი ითხოვდა გორიდან საქართველოში და ყოფილ საბჭოთა კავშირში კი არა მთელ მსოფლიოში გავრცელდა.

50 წელზე მეტია გორის ძიუდოს და შემდეგ თავისუფალი ჭიდაობის სკოლის შესახებ მსოფლიოს ყველა იმ ქვეყანაში ზედმიწევნით იციან, სადაც ეს სახეობები პოპულარულია.

მწვრთნელის პირველ დასაყრდენს არა მხოლოდ ადგილობრივი, არამედ საქართველოს სხვა რეგიონებიდან გადმოყვანილი ახალგაზრდები შეადგენდნენ. წარმატების ფორმულა ერთი შეხედვით მარტივი, მაგრამ ცხადია არცთუ იოლად შესასრულებელი იყო. ამა თუ იმ რანგის შეჯიბრებებზე იპოვიდა პერსპექტიულ მოჭიდავეს პაპიტაშვილი, ჩამოუყვანდა რექტორს, ეს უკანასკნელი ამ სპორტსმენს გამოუყოფდა ოთახს სასწავლებლის საერთო საცხოვრებელში, მიუჩენდა პროფესორ მასწავლებლებს, რომლებიც მოამზადებდნენ გამოცდებისთვის და ახალი სასწავლო წლიდან ნიჭიერი ფალავანი სტუდენტიც ხდებოდა, ინსტიტუტის გუნდში ეწერებოდა და როგორც ინდივიდუალური ისე საერთო წარმატებებისთვის ირჯებოდა.

ასე მოხვდა გორში, პაპიტაშვილის სკოლის პირველი თაობის წარმომადგენელი ახმეტელი ანზორ ქიბროწაშვილი, რომელიც მალევე გორში დამკვიდრდა და იქვე ვარჯიშობდა და აგროვებდა ტიტულებს შიდა და საერთაშორისო არენაზე. ვიდრე ძიუდო შემოვიდოდა ქიბროწაშვილი სამბოში ჭიდაობდა ჩინებულად, 1962 წელს კი პირველივე ევროპის ჩემპიონატზე ძიუდოში, რომელშიც ყოფილი სსრკ-ს ნაკრებმა მიიღო მონაწილეობა, ქიბროწაშვილი ოქროს მედლის მფლობელი გახდა.

ცოტა ხანში გორის ძიუდოს დარბაზი უკვე თითქმის სრულად ადგილობრივ სპორტსმენებს დაეყრდნო. პირველი ოლიმპიური ჩემპიონიც ყოფილი საბჭოთა კავშირიდან ძიუდოში გორის უკვე სახელოვანი სკოლის აღზრდილი შოთა ჩოჩიშვილი იყო (1972 წ. მიუნხენის ოლიმპიური თამაშები). ეს ლეგენდარული ფალავანი რთული ხასიათისაც გახლდათ, მაგრამ პაპიტაშვილი ურთიერთობის აწყობას მაინც ახერხებდა ყველა შეგირდთან, მიუხედავად მათი ხასიათისა. ამასწინათ მისმა ერთ-ერთმა შეგირდმა ნუგზარ სხირელმა გვითხრა კიდეც: "ბატონი გურამი ისეთი დიპლომატიური ნიჭითაა დაჯილდოვებული, ყველასთან შეუძლია ურთიერთობის დალაგება. მისი ყოველთვის თეთრი შურით მშურდა ამის გამო".

პაპიტაშვილს თავიდანვე გვერდით უდგა კიდევ ერთი ცნობილი ადგილობრივი სპეციალისტი გივი ზაუტაშვილი, რომელიც ბატონი გურამის საკავშირო ნაკრებში მოღვაწეობის პერიოდში, გორის ჭიდაობის დარბაზებში სავარჯიშო პროცესს უშუალოდ ხელმძღვანელობდა.

სწორედ პაპიტაშვილის და ზაუტაშვილის ერთობლივი მონდომებით ახალ სიმაღლეზე ავიდა გორის ჭიდობის დარბაზის წარმატებები 70-იანი წლებიდან. აი, 80-იანი წლების დასაწყიში, კერძოდ 1981 წელს კი, იქამდე ორი წლით ადრე პირველად მოპოვებული მსოფლიოს ჩემპიონობა თემურ ხუბულურმა ერთგვარ დუბლად აქცია და ზედიზედ ორჯერ მოპოვებული მსოფლიოს ჩემპიონობით პირველი ძიუდოისტი გახდა საბჭოთა კავშირში. ესეც პირველობის მოყვარული დარბაზის ტრადიციის გაგრძელება იყო. პირველი ევროპის ჩემპიონი - ქობროწაშვილი, პირველი ოლიმპიური ჩემპიონი – ჩოჩიშვილი, პირველი ორგზის მსოფლიოს ჩემპიონი - ხუბულური!

[VIDEO] თემურ ხუბულური: ვან დე ვალემ მითხრა - ვაჟკაცი ხარ, ნეკნმოტეხილი ბევრი საავადმყოფოში გაიქცეოდა, შენ კი ტატამიდან არ გახვედიო

არა მხოლოდ გურამ პაპიტაშვილის, საერთოდ გორის საჭიდაო სამყაროს ტკივილად იქცა 90-იან წლებში ქვეყნის საყოველთაო უკუსვლის პირობებში, გორის დარბაზის გაპარტახების და ნაყოფიერი სამუშაო პროცესის შეწყვეტის თემა. ფაქტობრივად შეწყდა გორის პედაგოგიური ინსტიტუტის ბაზაზე მოღვაწეობა. ვარჯიში.

გორში ძიუდოს და ე. წ. ჩოხიანი საჭიდაო სახეობების ხელახალი აღორძინება XXI საუკუნის გარიჟრაჟიდან დაიწყო. პროცესი პირდაპირ იყო დაკავშირებული ტიტულოვან ადგილობრივ ძიუდოისტთან გია თენაძესთან, რომელმაც 2002 წელს უშუალოდ დააარსა ძიუდოს სკოლა. მანვე ახალგაზრდა მწვრთნელებთან (ანზორ თენაძე, ნიკო ბიბილაშვილი) ერთად დარბაზში სათანამშრომლოდ პაპიტაშვილი და ზაუტაშვილიც მიიწვია. დღესდღეობით ეს სკოლა გურამ პაპიტაშვილის სახელობისაა და იქ აქტიური მუშაობა მიმდინარეობს, იმაზე არანაკლებ ნაყოფიერი, ვიდრე გორში ძიუდოს სათავეებთან იყო. ამ დარბაზში დაოსტატდა ოლიმპიური ჩემპიონი ლაშა შავდათუაშვილი, აქ ვარჯიშობენ ბექა ღვინიაშვილი, ვაჟა მარგველაშვილი და ეროვნული ნაკრების სხვა წევრები.

ნიშანდობლივია, რომ შარშანწინ, გორში ბატონი გურამის 80 წლის იუბილესადმი მიძღვნილი საღამოს დასაწყისში პაპიტაშვილი სცენაზე თავის შვილიშვილთან და გია თენაძესთან ერთად გამოვიდა. მაშინ მან აღნიშნა, რომ შვილიშვილი მისი მემკვიდრეა ოჯახში, ხოლო გია თენაძე მისი საქმის გამგრძელებელი გორის ძიუდოში...

დღესდღეობით ძიუდოს პაპა მადლობა ღმერთს, ასაკის მიუხედავად კვლავაც საყვარელ საქმიანობაშია ჩართული - პაპა აქ არის!

2287
მკითხველის კომენტარები / 1 /
ჯიჯი
0
პაპა დიდხანს იცოცხლე.
მსგავსი ამბები
რუბრიკის სხვა სიახლეები
;