[ლეგენდების კვალდაკვალ] როგორ წაართვა საბჭოთა მთავრობამ გურამ მინაშვილს მსოფლიოს ჩემპიონის ოქროს მედალი

თებერვალთან ერთად სანაკრები მატჩების დროც დადგა. 23-ში ილიას ზუროსის გაწვრთნილი გუნდი ავსტრიას ეწვევა, ხოლო 25 თებერვალს - გერმანიას მიიღებს. ეს მსოფლიოს ჩემპიონატის შესარჩევი ეტაპია...

საკალათბურთო მუნდიალები 1950 წლიდან იმართება. პირველი ქართველი მსოფლიოს ჩემპიონი ზურაბ საკანდელიძეა (1967), თუმცა გურამ მინაშვილსა და გურამ აბაშიძესაც აქვთ მსოფლიოს ჩემპიონისთვის განკუთვნილი ოქროს მედლები, რომლებიც საბჭოთა მთავრობამ მათ 1959 წელს ჩილეს მუნდიალიდან დაბრუნების შემდეგ გადასცა.

რატომ საბჭოთა მთავრობამ? ლეგენდარული გურამ მინაშვილის მონათხრობიდან შეიტყობთ:

"ჩილეში მიმდინარე მსოფლიოს ჩემპიონატზე, ბრაზილიასთან რთული მატჩი მოვიგეთ (73:64), მახსოვს 6 ქულა ჩავაგდე. მაშინ გამთამაშებლისთვის 10 ქულა კარგ შედეგად ითვლებოდა. ოფლში გაწურული გასახდელის გავლით საშხაპეში შევედი, სადაც სამი კაბინა ერთმანეთისგან მხოლოდ ტიხრებით იყო გამოყოფილი. შევედი და რას ვხედავ: გურამ აბაშიძეს წიხლქვეშ ჰყავს გაგდებული ოლეგ კუტუზოვი...

წამიერად გავიაზრე რა შეიძლებოდა მოჰყოლოდა ამ სცენას: ქართველმა სცემა რუსი, თანაც კუტუზოვი! - ასეთი ამბის გაჟღერების შემთხვევაში კარგი დღე არ დაგვადგებოდა, საბჭოთა ნაკრებიდანაც მოგვკვეთდნენ და შეიძლებოდა გურამ აბაშიძის მიმართ სანქციებიც გაეტარებინათ. მივეჭერი და ჩვენი "აპოლონა" (გურამის მეტსახელი) კუტუზოვს გამოვაცილე.

მწვრთნელებმა მაინც გაიგეს. 1959 წლის მსოფლიოს პირველობაზე სსრ კავშირის ნაკრებს სტეპან სპანდარიანი წვრთნიდა, თანაშემწედ კი ალექსანდრე გომელსკი მუშაობდა. მათ ყველაფერი გამოიკითხეს, მაგრამ დიდი ანალიზის შედეგად გადაწყვიტეს, გუნდში მომხდარი უსიამოვნება გუნდშივე დარჩენილიყო.

რამდენიმე გარემოებამ გადაგვარჩინა: გურამ აბაშიძეს თბილი დამოკიდებულება ჰქონდა სპანდარიანთან. მართალია, სასტარტო ხუთეულში ვიყავი, მაგრამ სპანდარიანი "აპოლონას" ჩემზე უკეთ უგებდა. მთავარ მწვრთნელთან მე საქმიანი ურთიერთობა მქონდა. რატომღაც მგონია, იგივე რომ გამეკეთებინა, არ მაპატიებდა.

გადაგვარჩინეს რუსმა თანაგუნდელებმაც: სიტყვიერად დაგვეხმარა ვიქტორ ზუბკოვი, ხოლო მოსკოვის დინამოელმა ვლადიმირ ტორბანმა გურამ აბაშიძეს მხარი აუბა და კუტუზოვს მანაც გვარიანად უთავაზა.

რა მოხდა ბრაზილიასთან მატჩის შემდეგ დეტალურად გაგაცანით. გაგიჩნდებოდათ შეკითხვა: რატომ მოხდა? ისიც მოგეხსენებათ, რომ გურამ აბაშიძე ოლეგ კუტუზოვს უმიზეზოდ არ სცემდა. "აპოლონას" მიზეზი რომ ვკითხე მიპასუხა - შენ შეგაგინაო.

ყველაფერი კი მსოფლიოს ჩემპიონატის გახსნითი მატჩიდან დაიწყო. მექსიკასთან (102:72) მხოლოდ 2 ქულა ჩავაგდე და 5 ფოლი მივიღე. მოკლედ, ისე ვერ ვითამაშე, როგორც მსურდა. არადა, სტეპან სპანდარიანი თავის სტრატეგიას არასოდეს ღალატობდა - რამდენად ცუდადაც უნდა გეთამაშა წინა მატჩში, თუ სასტარტო ხუთეულის წევრი იყავი, მეორე დღეს მაინც სასტარტოში მოხვდებოდი.

ზოგიერთი მწვრთნელი ძირითად ხუთეულს მეტოქის მიხედვით არჩევს, 1959 წლის სსრ კავშირის ნაკრებში კი ასე არ იყო: ხუთეულში ვთამაშობდით მე, მაიგონის ვალდმანისი, იური კორნეევი, მიხაილ სემიონოვი და ვიქტორ ზუბკოვი. გამთამაშებლის პოზიციაზე მცვლიდნენ ოლეგ კუტუზოვი და იური ოზეროვი.

როგორც აღმოჩნდა, მექსიკასთან ჩემი თამაში მეორე დღესაც არ ჰქონდა დავიწყებული კუტუზოვს და ბრაზილიასთან შეხვედრისას სათადარიგოთა სკამზე მჯდომმა შემაგინა. მე მოედანზე ვიყავი და ცხადია, არ გამიგია. სწორედ ამიტომ, ვიდრე საშხაპეში სიტუაცია არ დაწყნარდა, ვერ მივხვდი, რა მოხდა. თურმე, გურამ აბაშიძეს კუტუზოვის სიტყვები დაუმახსოვრებია და პასუხი მატჩის შემდეგ მოსთხოვა.

გაგრძელება 2 თებერვალს

6468
მკითხველის კომენტარები / 0 /
მსგავსი ამბები
რუბრიკის სხვა სიახლეები