ლეგიონერებზე. უკეთესები გვინდა, უკეთესები!

ყველა ვთანხმდებით ერთზე: თუ გვინდა, რომ საქართველოს ეროვნული ჩემპიონატი უფრო მაღალი დონის შეჯიბრება გახდეს, აუცილებლად გვჭირდება შესაბამისი დონის ლეგიონერები.

მათ გარეშე პრაქტიკულად შეუძლებელია, რომ ჩვენი პირველობა იმაზე საგრძნობლად უკეთესი გახდეს, ვიდრე დღეს არის. რა შთაბეჭდილება დატოვეს იმ უცხოელებმა, რომლებმაც გასული სეზონი ქართულ კლუბებში ჩაამთავრეს? სწორედ ამ საინტერესო თემას ეხება ეს წერილი...

ტორპედო

საქართველოს ჩემპიონის შემადგენლობაში ერთადერთმა ლეგიონერმა ითამაშა ეროვნული ლიგის დასკვნით ნაწილში. ვოლოდიმირ კორობკას კახა ჩხეტიანის გაწვრთნილ გუნდში უფრო ეპიზოდური როლი ჰქონდა, მაგრამ ახლა თამამად შეიძლება ითქვას, რომ ჩხეტიანმა ის იდეალურად გამოიყენა.

სწორედ მას ეკუთვნის საგოლე გადაცემა "დინამოსთან" საჩემპიონო შეხვედრაში. და მაინც, ჩემპიონთა ლიგისთვის ქუთაისურ კლუბს უკეთესი ლეგიონერები დასჭირდება.

დინამო თბ

ამ დროისთვის თბილისის "დინამო" თითქმის ყველა ლეგიონერმა დატოვა და ამით ყველაფერია ნათქვამი. გუნდის წევრები აღარ არიან მეკარე სერგეი ლიტოვჩენკო, მცველები - ბოგდან მიშჩენკო და მოჰამედ ალიუ.

ასევე დიდი კითხვის ნიშნის ქვეშაა გუნდში უკრაინელი ფორვარდის, მიკოლა კოვტალიუკის დარჩენის საკითხი. ასე რომ, მომავალში "დინამოს" მეტი დაკვირვება მართებს ლეგიონერების შერჩევისას. უცხოელებს ცოტა მეტად რომ გაემართლებინათ, თბილისური კლუბი, ალბათ, მოიგებდა ჩემპიონის ტიტულს.

სამტრედია

ჩვენი სუბიექტური აზრით, საქართველოს ჩემპიონატში მონაწილე კლუბთაგან ყველაზე უკეთესი ლეგიონერები სწორედ "სამტრედიას" ჰყავდა. სამწუხაროა, რომ მათგან ერთ-ერთმა, ბაკარი ბალდემ, უკვე დატოვა იმერული კლუბი. გვინეა-ბისაუს ნაკრების წევრი კარიერის გაგრძელებას პორტუგალიაში იმედოვნებს.

ლეგიონერთა მარაქაში შეგნებულად არ გავრევთ უკრაინის პასპორტის მფლობელს, გუნდის ერთ-ერთ ლიდერ გიული მანჯგალაძეს. აი, დანარჩენებმა კი მართლაც კარგად წარმოაჩინეს თავი.

კოტდივუარელმა ფორვარდმა ინტერს გიიმ 18 შეხვედრაში 7 გოლი შეაგდო, ხოლო ნიგერიელმა მაიკლ ოლაიტანმა 11 მატჩში 5-ჯერ აიღო მოწინააღმდეგის კარი. ჩვენი აზრით, ბოლომდე ჯერაც არ არის გამოყენებული ბოლომდე გაბონელი მცველის, ანრი ნდონგის შესაძლებლობები, ვინც თბილისის "დინამოსთან" საგარეო შეხვედრაში გამოიჩინა თავი.

საბურთალო

გუნდში ორი ლეგიონერი იყო და აქედან, ამ დროისთვის კლუბში მხოლოდ ერთი რჩება. "საბურთალოს" ხელმძღვანელობამ ალბანელ შემტევ ნდუე მუიეცისთან თანამშრომლობის გაგრძელება საჭიროდ არ ჩათვალა. ის არ იყო ცუდი ფეხბურთელი, ბევრს იბრძოდა, მაგრამ თავდამსხმელს ალბათ უკეთესი შედეგიანობა მოეთხოვებდა. აი, ელვინ ტერამ კი მატჩების მეტი წილი სტაბილურად ჩაატარა. კენიელი ბოლო წლებში "საბურთალოს" ორგანულ ნაწილად იქცა.

ჩიხურა

იმერული გუნდის ერთადერთი ლეგიონერის, დინო ჰამზიჩის გარჯა მხოლოდ დადებითად შეიძლება შეფასდეს. მართალია, ის ვერ იყო ისეთი საიმედო, როგორიც წინა სეზონში, მაგრამ სამაგიეროდ დიდებულად ითამაშა საქართველოს თასის ფინალში და გადამწყვეტი როლი შეასრულა "ჩიხურას" მიერ ამ პრესტიჟული ჯილდოს მოგებაში, რამაც გუნდს ევროპალიგაზე ასპარეზობის უფლება მისცა.

დილა

ამ დროისთვის "დილა" ყველა ლეგიონერმა დატოვა - აჯეი ჰეიფორდმა, ალიუ აბუბაქარმა, ჟან დერეტიმ, პედრინიომ, გილერმე მორასმა, ნუბიო ფლავიომ და სალიუ ტარავალიემ. ისიც შევიტყვეთ, რომ გორში გაცილებით ძლიერი გუნდის "გაკეთებას" აპირებენ.

ასეთ პროექტს კი აშკარად სჭირდება უფრო ძლიერი უცხოელი ფეხბურთელები. სავარაუდოდ, ამაში კლუბის ხელმძღვანელობაც გვეთანხმება. გორელთა ლეგიონერებიდან ზოგი ცოტა უკეთესი იყო სხვაზე, მაგრამ გაბრწყინებით მხოლოდ ერთმა, ლეანდრო რიბეირომ გაიბრწყინა, რომელიც მეორე წრეში უკვე აღარ იყო კლუბში.

დინამო ბთ

აჭარული გუნდი უმაღლესი ლიგიდან გავარდა და ეს უკვე ბევრ კითხვას სცემს პასუხს. პლეი ოფში ძალიან სუსტად ითამაშა მეკარე ანატოლი ტიმოფეევმა. გუნდს ვერც მეორე უკრაინელის, იაროსლავ კვასოვის საგოლე უნარები გამოადგა. ბრაზილიელი ჯოვანი ფლამარიონი კი სისტემატური ტრავმების ფონზე თამაშობდა.

კოლხეთი

ცუდი პირობების მიუხედავად, ფოთელებმა უმაღლეს ლიგაში ადგილის შენარჩუნება მოახერხეს და ამაში საკუთარი წვლილი ლეგიონერებმაც შეიტანეს. კენიელებმა - ოტიენომ, ნონდიმ და მაჩარიამ სეზონი მეტნაკლებად ნორმალურად ჩაატარეს. უკეთესი იყო უკრაინული დუეტი დერებჩინსკისა და ბროვკოს შემადგენლობით.

შუქურა

ქობულეთური კლუბის შემადგენლობაში არაერთმა ლეგიონერმა ითამაშა, მაგრამ მათგან საუკეთესო შთაბეჭდილება ბრაზილიელებმა - ჟეფინიომ და მარსელინიომ დატოვეს. მათი კარგი თამაში არ აღმოჩნდა საკმარისი უძლიერესთა შორის ადგილი შენარჩუნებისთვის.

ყოველდღიური სპორტული გაზეთი "ლელო"
1937
მკითხველის კომენტარები / 0 /
მსგავსი ამბები
რუბრიკის სხვა სიახლეები
;