ლეგიონერები. 'მონპელიე' პირველია, - ქუბრიაშვილი და ნარიაშვილი სიმბოლურში

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშება ერთი ტურით ადრე ქართველ მორაგბეთა გუნდმა, მიხეილ ნარიაშვილის, კონსტანტინე მიქაუტაძის, დავით ქუბრიაშვილისა და გელა აფრასიძის "მონპელიემ" მოიგო.  მონპელიელები პირდაპირ ნახევარფინალში ითამაშებენ.

მეორე ადგილისთვის, რომელიც ასევე ნახევარფინალში იბევებს ადგილს სამი გუნდი, "ტულუზი", "მეტრო რასინგი" და "ტულონი" იბრძვის. პლეი ოფში თამაში სამივეს გარანტირებული აქვს. დარჩენილ ორ ადგილზე კი პრეტენზიას ერთბაშად ოთხი გუნდი აცხადებს.

"მონპელიემ" ბოლოსწინა ტურში შინ მიიღო პლეი ოფში მოხვედრისთვის მებრძოლი "პო" და 45:13 დაამარცხა. მასპინძლებმა მეტოქეს შვიდი ლელო გაუტანეს. მართალია, არც ერთი ქართველ მორაგბეებზე არ მოდის, მაგრამ ნარიაშვილიც და ქუბრიაშვილიც მატჩში საუკეთესოები იყვნენ.

ქუბრიაშვილი ყოველდღიურმა სარაგბო გაზეთმა "მიდი ოლიმპიკმა" დაასახელა ტურის სიმბოლურ ნაკრებში. ყოველდღიურმა სპორტულმა გაზეთმა "ეკიპმა" კი ტურის საუკეთესო პირველ ნომრად ნარიაშვილი აღიარა.

ქუბრიაშვილმა მოედანი 54-ე წუთზე დატოვა, ნარიაშვილმა კი მასზე 15 წუთით მეტი ითამაშა. საფრანგეთის ჩემპიონატში დებიუტი ჰქონდა საქართველოს ნაკრების ახალგაზრდა ცხრა ნომერს, გელა აფრასიძეს, რომელიც თამაშში 76-ე წუთიდან ჩაერთო, მიქაუტაძე ტრავმირებულია.

"მონპელიეს" ექვსი ქულით ჩამორჩება და მეორე ადგილზეა ვასილ კაკოვინის "მეტრო რასინგი". პარიზელებმა გასვლით მატჩში "ბორდოს" დამარცხება შეძლეს - 39:15. კაკოვინი თადარიგში იყო და მოედანზე 53-ე წუთიდან გამოჩნდა.

"მეტრო რასინგი" ჩემპიონობის ერთ-ერთი უმთავრესი კანდიდატია. თუმცა, სანამ საფრანგეთის ჩემპიონატის პლეი ოფში ჩაერთვება, 13 მაისს ჩემპიონთა თასისთვის ბრძოლა მოუწევს და შეეცდება წლეულს დუბლი გაახერხოს.

პარიზული გუნდის კონკურენტმა მამუკა გორგოძისა და ლევან ჩილაჩავას "ტულონმა" შინ იოლად სძლია კიდევ ერთ უშუალო კონკურენტ "კასტრს" - 59:13. ჩილაჩავა თამაშში 50-ე წუთიდან ჩაერთო, გორგოძე მოედანზე 9 წუთის შემდეგ გამოჩნდა.

პლეი ოფში მოხვედრსთვის იბრძვის ლექსო ყაულაშვილის "ლა როშელი", რომელიც სტუმრად დამარცხდა "ტულუზთან" - 14:19. ქართველი შერკინების ბურჯი ძირითად შემადგენლობაში იყო და 31-ე წუთზე შეცვალეს.

პირველ დივიზიონს გამოემშვიდობა კარლენ ასიეშვილის, სოსო ბეკოშვილისა და ვასილ ლობჟანიძის "ბრივი", რომელმაც სტუმრად წააგო უშუალო კონკურენტთან, ზურაბ ჟვანიასა და გიორგი მელიქიძის "სტად ფრანსესთან" - 22:30.

ასეიშვილი ძირითად შემადგენლობაში იყო და 53-ე წუთზე შეცვალეს, იმავდროულად თამაშში ბეკოშვილი ჩაერთო, ჟვანია მოედანზე 11 წუთის შემდეგ გამოჩნდა.

სახიფათო ზონას თავი დააღწია თამაზ მჭედლიძის, ვახტანგ ახობაძისა და გიორგი თეთრაშვილის "აჟენმა", რომელმაც შინ მოუგო დავით ზირაქაშვილის, ვიქტორ კოლელიშვილის, ოთარ გიორგაძისა და ბექა კაკაბაძის "კლერმონს" - 27:17. ქართველებიდან მხოლოდ ზირაქაშვილმა ითამაშა. ის მატჩში 53-ე წუთიდან ჩაერთო.

ჯერაც გავარდნის ერთ-ერთი კანდიდატია ირაკლი მირცხულავას "ოიონაქსი", რომელმაც შინ მოუგო "ლიონს" - 39:18. მირცხულავა ძირითად შემადგენლობაში იყო და 70-ე წუთზე შეცვალეს.

I დივიზიონი . XXV ტური

ტულონი-კასტრი 59:13
აჟენი-კლერმონი 27:17
მონპელიე-პო 45:13
ოიონაქსი-ლიონი 39:18
სტად ფრანსე-ბრივი 30:22
ბორდო-რასინგი 15:39
ტულუზი-ლა როშელი 19:14

თ მ ფ წ ბ ქ(პ)
1. მონპელიე 25 17 0 8 +201 81(13)
2. რასინგი 25 17 0 8 +115 75(7)
3. ტულუზი 25 16 1 8 +134 74(8)
4. ტულონი 25 14 0 11 +271 73(17)
5. ლიონი 25 14 0 11 +140 66(10)
6. კასტრი 25 14 0 11 -37 64(8)
7. ლა როშელი 25 13 1 11 +131 62(8)
8. პო 25 14 0 11 -6 62(6)
9. კლერმონი 25 10 1 14 -68 50(8)
10. ბორდო 25 10 1 14 -64 47(5)
11. აჟენი 25 10 0 15 -191 46(6)
12. სტად ფრანსე 25 9 0 16 -176 42(6)
13. ოიონაქსი 25 7 3 15 -207 39(5)
14. ბრივი 25 6 1 18 -243 32(6)

XXVI ტური

ბრივი-ბორდო, კასტრი-ოიონაქსი, ლა როშელი-სტად ფრანსე, ლიონი-მონპელიე, პო-ტულონი, კლერმონი-ტულუზი, რასინგი-აჟენი.

მეორე დივიზიონში პლეი ოფის მატჩები გაიმართა. კატალონიურმა "პერპინიანმა", რომელიც რეგულარული გათამაშების გამარჯვებულია, შინ დაამარცხა ბექა გორგაძის "მონ დე მარსანი" 28:8 და ფინალში ბექა გიგაშვილის "გრენობლს" დაუპირისპირდება, რომელმაც სტუმრად მოუგო "მონტობანს" - 22:15. ქართველ მორაგბეებს არ უთამაშიათ. ფინალში გამარჯვებული პირდაპირ დაიკავებს ადგილს პირველ დივიზიონში. დამარცხებული კი პლეი ოფში პირველი დივიზიონის ბოლოდან მეორე გუნდს შეხვდება.

ზე რაგბის გათამაშების მე-9 ტურში ჯაბა ბრეგვაძისა და ნიკოლოზ ხატიაშვილის იაპონურმა "სანვულვზმა" სტუმრად ითამაშა ველინგტონის "ჰარიკენზთან" და 15:43 დამარცხდა. ქართველი მორაგბეები თადარიგში იყვნენ და მოედანზე 57-ე წუთიდან გამოჩდნენ.

კელტთა ლიგაში 21-ე ტურის შეხვედრები გაიმართა. ანტონ ფეიქრიშვილის "კარდიფმა" შინ მიიღო გიორგი ნემსაძის "ოსფრიზი". თამაში ძალზედ დაძაბული გამოდგა და სტუმრებმა სამი ქულით 26:23 მოიგეს. ნემსაძე თამაშში 78-ე წუთიდან ჩაერთო, ფეიქრიშვილი განაცხადში არ იყო.

ყოველდღიური სპორტული გაზეთი "ლელო"
1114
მკითხველის კომენტარები / 0 /
მსგავსი ამბები
რუბრიკის სხვა სიახლეები
;