ლეგიონერები. ოთხი ქართული გუნდი საპლეიოფო ზონაში

საფრანგეთის სარაგბო ჩემპიონატში მე-12 ტურის შეხვედრები გაიმართა. წლეულს ფრანგული კლუბები კიდევ ერთხელ, 29 დეკემბერს დაუპირისპირდებიან ერთმანეთს. იქამდე კი გათამაშებას ქართველ მორაგბეთა გუნდი „კლერმონი“ ლიდერობს. მასთან ერთად საპლეიოფო ექვსეულში კიდევ სამი „ქართული გუნდია“. ესენია: „რასინგი“, „ბორდო“ და „სტად ფრანსე“.

ჩემპიონატის ლიდერმა, დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონმა“ შინ მიიღო უშუალო კონკურენტი, უახლოესი მდევარი „ტულზი“ და მხოლოდ ფრეს დასჯერდა - 20:20. მატჩმა დაგვანახა, რომ ფრანგული რაგბის ეს ორი გრანდი შესანიშნავ ფორმაშია და ჩემპიონობისთვის საბრძოლველად მზად არიან.

ქართველი მორაგბეებიდან მხოლოდ ზირაქაშვილმა ითამაშა, რომელიც ძირითად შემადგენლობაში იყო და 74-ე წუთზე შეცვალეს.

„კლერმონის“ შემდეგ ქართველ მორაგბეთა გუნდებიდან საუკეთესო პოზიცია ვასილ კაკოვინისა და გურამ გოგიჩაშვილის „რასინგს“ აქვს. პარიზელებმა შინ აუტსაიდერს, „პერპინიანს“ უმასპინძლეს და დიდი სხვაობით 64:28 დაამარცხეს. გოგიჩაშვილი ძირითად შემადგენლობაში იყო და 47-ე წუთზე კაკოვინმა შეცვალა.

„რასინგს“ კვალში უდგას ბექა გორგაძის, ლაშა ტაბიძისა და ლექსო ყაულაშვილის „ბორდო“, რომელმაც სტუმრად საფრანგეთის ჩემპიონ „კასტრს“ სძლია - 32:13. გორგაძე და ტაბიძე თადარიგში იყვნენ და თამაშში ერთდროულად მე-60 წუთიდან ჩაერთნენ.

წარუმატებელი სერია შეწყვიტა გიორგი მელიქიძის „სტად ფრანსემ“, რომელმაც ასევე სტუმრად შეძლო ერთ-ერთი აუტსაიდერის გიორგი თეთრაშვილის და თამაზ მჭედლიძის „აჟენის“ დამარცხება - 19:6.

თეთრაშვილი 34-ე წუთზე შეცვალეს, მელიქიძე მოედანზე 58-ე წუთიდან გამოჩნდა.

დამაჯერებელი გამარჯვება მოიპოვა შინ „ლიონთან“ მამუკა გორგოძისა და ბადრი ალხაზაშვილის „ტულონმა“ - 40:7. გორგოძემ ძირითად შემადგენლობაში ითამაშა და მე-60 წუთზე შეცვალეს. ამ გამარჯვების შედეგად ტულონელებმა სატურნირო მდგომარეობა ოდნავ გამოიკეთეს და პლეი ოფში მოხვედრისთვის ბრძოლის შანსიც გაუჩნდათ.

მიხეილ ნარიაშვილის, კონსტანტინე მიქაუტაძის, ლევან ჩილაჩავას, უჩა ჭეიშვილისა და გელა აფრასიძის „მონპელიემ“ სტუმრად, მინიმალური სხვაობით წააგო დავით ქუბრიშვილისა და ბექა გიგაშვილის „გრენობლთან“ - 16:17.

ქუბრიაშვილი ძირითად შემადგენლობაში იყო და 59-ე წუთზე გიგაშვილმა შეცვალა, ძირითადში იყო ნარიაშვილიც, რომელმაც მოედანი შვიდი წუთის შემდეგ დატოვა, ჩილაჩავა თამაშში 43-ე წუთიდან ჩაერთო, მიქაუტაძე კი მოედანე 65-ე წუთიდან გამოჩნდა.

XII ტური

აჟენი-სტად ფრანსე           6:19

ტულონი-ლიონი              40:7

გრენობლი-მონპელიე        17:16

პო-ლაროშელი                 23:28

რასინგი-პერპინიანი         64:28

კასტრი-ბორდო                13:32

კლერმონი-ტულუზი        20:20

სატურნირო მდგომარეობა

  1. კლერმონი - 43 ქულა, 2. ტულუზი - 40, 3. ლა როშელი - 37, 4. რასინგი - 36, 5. ბორდო - 34, 6. სტად ფრანსე - 32, 7. ლიონი - 31, 8. კასტრი - 29, 9. მონპელიე - 27, 10. ტულონი - 24, 11. გრენობლი - 19, 12. პო - 19, 13. აჟენი - 17, 14. პერპინიანი - 4
ყოველდღიური სპორტული გაზეთი "ლელო"
693
მკითხველის კომენტარები / 0 /
მსგავსი ამბები
რუბრიკის სხვა სიახლეები
;