ლეგიონერები. ჩაკვეტაძე წლის აღმოჩენებში, ლობჟანიძე საუკეთესო...

ბოლო უქმეებზე, რამდენიმე ქართველი ფეხბურთელი ევროპულ ლიგაში აღიარეს.

ზოგი საშუალო ევროპული დონის ლიგაში, ზოგიც - სუსტში, მაგრამ ამ ყველაფერს საერთო ის აქვს, რომ ნებისმიერ ქვეყანაში ჩვენებურების კარგი თამაში სასიხარულოა და ისევ საქართველოს იმიჯზე მოქმედებს, აღარაფერს ვამბობთ ეროვნულ ნაკრებზე...

ლობჟანიძე, ტურის
საუკეთესო

დანიის სუპერლიგის 31-ე ტურში საბა ლობჟანიძემ ჰეთ-თრიკით გამოიჩინა თავი და დიდი აღიარება დაიმსახურა. "რანდერსის" გამარჯვებაში შეტანილი ლომის წილი ქართველ შემტევ ნახევარმცველს დანიურმა ტიპპსბლადეტ.დკ-მ სიმბოლურ ნაკრებში შეყვანით დაუფასა.

ამას გარდა, ლობჟანიძე ტურის გამორჩეულ ფეხბურთელებს შორის დანიის სუპერლიგის ოფიციალურმა ვებგვერდმაც დაასახელა და თავისი შეფასებით, ფაქტობრივად, ტურის MVP-დაც გამოაცხადა. თანაც ისეთი ქულით, როგორსაც იშვიათად ნახავთ - 10 ქულა შეფასების 10-ქულიან სისტემაში!

"დიდი მადლობა ყველას მხარდაჭერისა და კეთილი სურვილებისთვის. თქვენ მე მაძლიერებთ!" - ასე გამოეხმაურა ლობჟანიძე სოციალურ ქსელში გულშემატკივრებს მისი წარმატების გაზიარებისთვის.

ჩაკვეტაძე წლის აღმოჩენებში

ბელგიურმა ინტერნეტგამოცემა ვოეტბალკრანტ.ცომ-მა ბელგიის ჩემპიონატის "აღმოჩენის" გამოვლენა გულშემატკივრებს მიანდო და გამოკითხვა დაიწყო. საიტმა 7 გამორჩეული 21-წლამდელი ახალგაზრდა შეარჩია და გულშემატკივრებს არჩევანის გაკეთება მათ შორის შესთავაზა.

ამ შვიდეულში ერთ-ერთი - "გენტის" ქართველი შემტევი ნახევარმცველი გიორგი ჩაკვეტაძეა, რომელიც თბილისის "დინამოდან" ამ კლუბში შარშან ზაფხულში გადავიდა.

"ჩვენ არ ვითვალისწინებთ იმ სათამაშო დროს, რასაც მათ თავიანთ კლუბებში უთმობენ. მთავარი კრიტერიუმია ის შთაბეჭდილება, რაც მათი თამაშიდან დაგრჩათ. ამ ყოველივეს გათვალისწინებით, შევადგინეთ 21-წლამდელი ფეხბურთელების სია", - წერს გამოცემა.

ჯერჯერობით, გამოკითხვაში ჩაკვეტაძე ლიდერობს. მას ხმების 30.32 პროცენტი აქვს და ორ უახლოეს მდევარს 10-10 პროცენტით უსწრებს.

ბეგლარიშვილის
ესტონური მიღწევები

ზაქარია ბეგლარიშვილი ესტონეთის პასპორტს ზაფხულში მიიღებს და, დიდი ალბათობით, ამ ქვეყნის ეროვნულ ნაკრებში ითამაშებს. ასეა თუ ისე, ქართველის ასეთი წარმატებული თამაში ძალიან სასიხარულოა.

კიდევ უფრო სასიხარულოა ის, რომ ტალინის "ფლორას" შემტევი ნახევარმცველი ესტონეთის ჩემპიონატის საუკეთესო ფეხბურთელია. ყაზახეთის მსგავსად, ესტონეთშიც საუკეთესო მოთამაშეს პროგრამა " ინსტატ ინდექსით" ავლენენ, რომელიც საქართველოს ეროვნულ ლიგაში შარშან გამოიყენებოდა, წელს კი "ვაისკაუტით" ჩაანაცვლეს.

"ინსტატ ინდექსით" ესტონეთში პირველი 9 ტურის სტატისტიკური მონაცემები სოცცერნეტ.ეე-მ გამოაქვეყნა. საუკეთესო ბომბარდირებში ბეგლარიშვილი 6 გოლით მე-4 ადგილზეა, საგოლე გადაცემებით კი - პირველზე. საინტერესოა, რომ ამ 9 შეხვედრაში "ფლორამ" 27 გოლი გაიტანა, საიდანაც 6 - ზაქარიას ანგარიშზეა, ხოლო თანაგუნდელებს 8 საგოლე გადაცემა გაუკეთა. ის ლიდერებს შორისაა გადაცემების სიზუსტის მიხედვითაც: 94-დან 48 ზუსტი პასით მეოთხე ადგილზეა.

რაც მთავარია, "ინსტატ ინდექსის" ყველა მონაცემის შეჯამების შედეგად გაირკვა, რომ საუკეთესო მაჩვენებლები სწორედ ქართველ ფეხბურთელს აქვს და უსწრებს ესტონეთის ნაკრების წევრს, ჩემპიონატის ლიდერ "ლევადიას" წამყვან მოთამაშეს, დმიტრი კრუგლოვს.

შეგახსენებთ, რომ ბეგლარიშვილმა ესტონეთის თასის მეოთხედფინალში ჩინებული მატჩი ჩაატარა - ტალინის "ფლორამ" სტუმრად 7:0 მოუგო "კურესაარეს", ქართველმა კი აქტივში გოლი და 3 საგოლე გადაცემა ჩაიწერა.

ამ სათასო მატჩამდე ბეგლარიშვილმა "ტულევიკთან" მატჩში დუბლი შეასრულა. სულ კი ესტონეთის ჩემპიონატში ჩატარებულ 9 ტურში 6 გოლი გაიტანა.

ყოველდღიური სპორტული გაზეთი "ლელო"
1196
მკითხველის კომენტარები / 0 /
მსგავსი ამბები
რუბრიკის სხვა სიახლეები
;