ლეგიონერებს პლეი ოფის შანსი აქვთ

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე ორი ტური დარჩა.

ორმა გუნდმა, „ტულუზმა“ და „კლერმონმა“ უკვე გაინაღდა პლეი ოფში თამაშის უფლება. დარჩენილი ოთხი ადგილისთვის ექვსი გუნდი იბრძვის. მათ შორის სამი ქართველი მორაგბეებისაა. ესენია: „რასინგი“, „მონპელიე“ და „სტად ფრანსე“. 

დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონმა“ შინ მიიღო აუტსაიდერი „პერპინიანი“ და 35:13 დაამარცხდა. კატალონური კლუბი უკვე დიდი ხანია ელიტას გამოეთხოვა. კაკაბაძე თამაშში მე-60 წუთიდან ჩაერთო. 

მიხეილ ნარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის „მონპელიეს“ სტუმრად ქვეყნის ჩემპიონი „კასტრის“ დამარცხების შემდეგ 12:9, პლეი ოფში მოხვედრის შესანიშნავი შანსი გაუჩნდა. ჩილაჩავა 69-ე წუთზე შეცვალეს, მიქაუტაძე თამაშში 76-ე წუთიდან ჩაერთო. „მონპელიე“ მომდევნო ტურში უშუალო კონკურენტს, გიორგი მელიქიძის „სტად ფრანსეს“ მასპინძლობს და კარგი შანსი აქვს, სატურნირო ცხრილშო კიდევ უფრო დაწინაურდეს. 

„სტად ფრანსემ“, თავის მხრივ, პარიზულ დერბიში ვასილ კაკოვინისა და გურამ გოგიჩაშვილის „რასინგი“ დაამარცხა - 27:23. რასინგელები, ასევე პლეი ოფისთვის იბრძვიან და ამ მარცხმა მათ სატურნირო მომავალზე შესაძლოა, ცუდად იმოქმედოს. თუმცა, მომდევნო ტურში მათი მეტოქე სტუმრად დივიზიონიდან უკვე გავარდნილი „პერპინიანია“. 

მელიქიძე თამაშში 44-ე წუთიდნ ჩაერთო და 13 წუთში ლელო გაიტანა. გოგიჩაშვილი მოედანზე 54-ე წუთიდან გამოჩნდა. 

ბექა გორგაძისა და ლაშა ტაბიძის „ბორდომ“ სტუმრად წააგო გათამაშების ერთ-ერთ ფავორიტ „ლიონთან“ 10:34 და პლეი ოფში გასვლის მხოლოდ თეორიულ შანსს ინარჩუნებს. გორგაძემ სრულად ითამაშა, ტაბიძე თამაშში 62-ე წუთიდან ჩაერთო. 

პრინციპული მატჩი გაიმართა გრენობლიში, სადაც ბექა გიგაშვილისა და დავით ქუბრიაშვილის „ალპელთა“ გუნდმა გიორგი თეთრაშვილისა და თამაზ მჭედლიძის „აჟენს“ უმასპინძლა. „გრენობლმა“ უშუალო კონკურენტთან მატჩში მარცხი განიცადა 11:29 და ახლა მეორე დივიზიონის მეორე გუნდთან მოუწევს პლეი ოფის თამაში პირველ დივიზიონში დასარჩენად. 

ქუბრიაშვილი ძირითად შემადგენლობაში იყო და 51-ე წუთზე ის გიგაშვილმა შეცვალა, იმავდროულად, თამაშში ჩაერთო თეთრაშვილიც. 

მამუკა გორგოძის „ტულონმა“ სტუმრად წააგო მატჩი „ლა როშელთან“ - 30:21. გორგოძე მოედანზე 57-ე წუთიდან გამოჩნდა. ტულონელები სეზონს უმოტვაციოდ ამთავრებენ. 

I დივიზიონი

XXIV ტური 
ტულუზი-პო 83:6, კასტრი-მონპელიე 9:12, კლერმონი-პერპინიანი 35:13, გრენობლი-აჟენი 11:29, ლა როშელი-ტულონი 30:21, ლიონი-ბორდო 34:10, რასინგი-სტად ფრანსე 23:27

სატურნირო მდგომარეობა 
1. ტულუზი - 89 ქულა, 2. კლერმონი - 82, 3. ლიონი - 70, 4. ლა როშელი - 66, 5. კასტრი - 65, 6. რასინგი - 64, 7. მონპელიე - 61, 8. სტად ფრანსე - 60, 9. ბორდო - 57, 10. ტულონი - 48, 11. აჟენი - 38, 12. პო - 38, 13. გრენობლი - 28, 14. პერპინიანი - 12. 

დასრულდა რეგულარული გათამაშება მეორე დივიზიონში. აქ პირველი ორი ადგილი ქართველ მორაგბეთა გუნდებმა, შესაბამისად, „ბრივმა“ და „ოიონაქსმა“ დაიკავეს. ამიტომ ისინი პირდაპირ ნახევარფინალში გავიდნენ და მეტოქეს შინ მიიღებენ. 

პლეი ოფში კი ოთხი გუნდიდან სამი ასევე ქართველებისაა. ნიკა ნეფარიძის „ვანი“ თორნიკე მატარაძისა და გურამ პაპიძის „ნევერს“ დაუპირისპირდება. ამათში გამარჯვებულის მეტოქე კი, ვასილ ლობჟანიძის, კარლენ ასიეშვილის, სოსო ბეკოშვილისა და ოთარ გიორგაძის „ბრივი“ იქნება. 

ანტონ ფეიქრიშვილის „მონ დე მარსანს“ ძალების მოსინჯვა „ბაიონთან“ მოუწევს. გამარჯვების შემთხვევაში კი, ნახევარფინალში ირაკლი მირცხულავას „ოიონაქსს“ ესტუმრება. 

დივიზიონი ბოლო ადგილზე გასულმა ილია კაიკაციშვილის „მასიმ“ დატოვა. ვაჟა კაპანაძის „ბურგ ან ბრესს“ კი რომელიმე ფედერალდივიზიონელთან მოუწევს მეორე დივიზიონში დარჩენისთვის ბრძოლა. 

ყოველდღიური სპორტული გაზეთი "ლელო"
581
მკითხველის კომენტარები / 0 /
მსგავსი ამბები
რუბრიკის სხვა სიახლეები
;