ლეგიონის უქმეები. გოლი, პასი,  ტიტული, ტრავმა  და დაბრუნება

ქართული გოლები რუსეთსა და ყაზახეთში გავიდა, რუსულ პრემიერლიგაში საგოლე პასი ჯანო ანანიძემ მიითვალა. ხანგრძლივი ტრავმის შემდეგ “სარაგოსას” გიორგი პაპუნაშვილი დაუბრუნდა, ხოლო ლაშა დვალი უნგრეთის ჩემპიონი გახდა...

იტალია. სერია A. ლევან მჭედლიძის “ემპოლის” გავარდნა ემუქრება - ტოსკანელებმა სტუმრად “ბოლონიასთან” 1:3 წააგეს. ქართველი ფორვარდი მოედანზე 86-ე წუთზე გამოჩნდა. 

ესპანეთი. ლა ლიგა 2. გიორგი აბურჯანიას (90 წუთი) “ლუგო” სტუმრად “ლას პალმასთან” დამარცხდა - 1:4. “სარაგოსას” დაუბრუნდა გიორგი პაპუნაშვილი, რომელიც “კორდობასთან” სტუმრად 81-ე წუთზე გამოჩნდა. “სარაგოსამ” 3:0 მოიგო.

გერმანია. III ლიგა. ლუკას ჰუფნაგელის (90 წუთი) “უნტერჰახინგი” შინ “კარლ ცაისთან” დამარცხდა - 0:1.

პორტუგალია. პრიმეირა ლიგა. გიორგი მაკარიძემ 4 “სეივი” მიითვალა და კარი მშრალად შეინახა, მისი “სეტუბალი” კი სტუმრად “სანტა კლარას” დაუზავდა - 0:0. “შავეშთან” სტუმრად “ნასიონალის” რიგებში 74-ე წუთზე გამოჩნდა ავთო ებრალიძე, რომელიც ათ წუთში გააფრთხილეს, მისი გუნდი კი 1:4 დამარცხდა.

ბელგია. ჟუპილერლიგა. ქართველთა “გენტმა” შინ “გენკთან” წააგო - 0:1. გიორგი ჩაკვეტაძის თავს უცნაური ამბები ხდება - ის განაცხადში იყო, მაგრამ ბოლო მომენტში იქ აღარ აღმოჩნდა. რაც შეეხება გიორგი ქვილითაიას, მან სასტარტო შემადგენლობაში დაიწყო თამაში და 56-ე წუთზე შეცვალეს.

შვეიცარია. სუპერ ლიგა. ოთარ კაკაბაძის (91-ე წუთზე შევიდა) “ლუცერნმა” “თუნს” შინ მოუგო - 3:1. ლევან ხარაბაძე “ციურიხის” სასტარტოში არ იყო, მაგრამ უკვე მე-6 წუთზე შევიდა ტრავმირებული თანაგუნდელის ნაცვლად. მისმა გუნდმა შინ “სიონს” 1:0 მოუგო. 

ავსტრია. ბუნდესლიგა. ოთარ კიტეიშვილი ლასკ-თან მატჩში უხერხულად დაეცა და მოედნიდან საკაცით გაიყვანეს. ეს 56-ე წუთზე მოხდა. “შტურმი” კი შინ 2:3 დამარცხდა.

დანია. სუპერლიგა. საბა ლობჟანიძის (90 წუთი) “რანდერსი” სტუმრად უგოლოდ დაუზავდა “ვენდსისელს” და ევროპალიგის საგზურისთვის პლეი ოფში ითამაშებს. ლაშა პარუნაშვილის (90 წუთი) “ესბიერგმა” გასვლაზე 1:0 მოუგო “ბრონდბიუს” და მე-3 ადგილზეა.

პოლონეთი. ექსტრაკლასა. ვატო არველაძის (90 წუთი) “კორონა” შინ “არკასთან” დამარცხდა - 0:2. 

I ლიგა. გუგა ფალავანდიშვილის (86-ე წუთზე შევიდა) “პოდბესკიძიე” შინ გკს-ს დაუზავდა - 2:2.

უნგრეთი. OTP ბანკ ლიგა. მართალია, სტუმრად “ჰონვედთან” 2:3 დამარცხდა, მაგრამ ლაშა დვალის “ფერენცვაროში” მაინც ვადაზე ადრე გახდა ჩემპიონი. ქართველმა მცველმა შეუცვლელად ითამაშა. ბუბა დაუშვილის (90 წუთი, გააფრთხილეს) “ჰალადაშმა” სტუმრად მოუგო “კიშვარდას” - 2:1. გიორგი ბერიძის (87-ე წუთზე შეცვალეს) “უიპეშტი” შინ “დებრეცენს” დაუზავდა - 1:1.

ფინეთი. იკონენი. გიორგი ოსიტაშვილის (90 წუთი, გააფრთხილეს) ტპვ პირველ ტურში სტუმრად “ჰაკასთან” დამარცხდა - 0:1.
ხორვატია. HNL. გიორგი მჭედლიშვილის (90 წუთი) “გორიცამ” შინ “ჰაიდუკი” გაანადგურა - 3:0. 

ალბანეთი. სუპერ ლიგა. ირაკლი ძარიას (90 წუთი, გააფრთხილეს) “კუკესი” საკუთარ მოედანზე “ტეუტას” დაუზავდა - 0:0. 

მალტა. პრემიერ ლიგა. გეგი კეკუას (90 წუთი) “პიეტა ჰოთსპურსი” სტუმრად “სლიემასთან” დამარცხდა - 1:2. 

რუსეთი. პრემიერლიგა. საბა კვირკველიამ შეუცვლელად ითამაშა, ხოლო მისმა “ლოკომოტივმა” მოსკოვში “ენისეი” დაამარცხა - 2:1. ქართველმა მცველმა championat.com-ისგან 7 ბალი მიიღო. ჯანო ანანიძემ მე-80 წუთამდე ითამაშა სტუმრად “ზენიტთან” წაგებულ (2:4) მატჩში, ჯანომ სეზონში მეორე საგოლე პასი მიითვალა. 

I დივიზიონი. ირაკლი კვეკვესკირის “სკა ხაბაროვსკი” გასვლაზე 2:2 ეთამაშა “ვოლგოგრადს”. სტუმართა მეორე გოლი ქართველმა ლეგიონერმა გაიტანა, რომელიც 70-ე წუთზე შეცვალეს.

უკრაინა. პრემიერ ლიგა. ქართველთა “ვორსკლამ” სტუმრად 2:1 მოუგო “ჩერნომორეცს”. ანდრო გიორგაძე თამაშში 86-ე წუთზე ჩაერთო. ნიკა სანდოხაძის (89-ე წუთზე შეცვალეს, გააფრთხილეს) “კარპატი” სტუმრად “ოლიმპიკთან” დამარცხდა - 2:3. დავით ხოჭოლავას (90 წუთი, გააფრთხილეს) “შახტარმა” სტუმრად “მარიუპოლს” მოუგო - 1:0. 

ბელარუსი. ვისშაია ლიგა. აკაკი ხუბუტიას (90 წუთი) “ვიტებსკი” შინ “სლუცკს” დაუზავდა - 2:2. გიორგი ქანთარიას (90 წუთი) “ნემანმა” სტუმრად მინსკის “დინამოს” მოუგო - 1:0.

ლიტვა. A ლიგა. ლევან მაჭარაშვილის (90 წუთი) “შტუმბრასი” სტუმრად “პანევეჟისს” დაუზავდა - 1:1. 

ლატვია. ვირშლიგა. თამაზ პერტიას “ვალმიერამ” სტუმრად მეტა-ს 4:1 მოუგო. გურამ ლუკავას (90 წუთი, გააფრთხილეს) “იელგავამ” შინ “დაუგავპილსს” მოუგო 1:0. 

აზერბაიჯანი. პრემიერ ლიგა. დავით ვოლკოვის (46-ე წუთზე შეცვალეს) “გაბალა” სტუმრად “საბაილთან” დამარცხდა - 1:2. 

ყაზახეთი. პრემიერ ლიგა. კახა ცხადაძის “ორდაბასი” შინ “ქაირათს” დაუზავდა - 0:0. ელგუჯა ლობჯანიძემ 92-ე წუთზე გამარჯვების გოლი გაიტანა და “თარაზს” სტუმრად “აკტობესთან” მოაგებინა - 3:2. მან და ლაშა კასრაძემ (გააფრთხილეს) შეუცვლელად ითამაშეს. ქართველთა “ტობოლი” ცენტრალურ მატჩში სტუმრად “ასტანასთან” დამარცხდა - 1:2. ჯაბა კანკავამ და ნიკა კვეკვესკირმა შეუცვლელად ითამაშეს.

უზბეკეთი. სუპერ ლიგა. ელგუჯა გრიგალაშვილის (90 წუთი) “ყიზილქუმი” სტუმრად “ლოკომოტივთან” დამარცხდა - 1:3. კახა მახარაძის (90 წუთი) “სოგდიანა” შინ შოთა არველაძის “ფახთაქორთან” დამარცხდა - 1:2. 

ირანი. სპარსეთის ყურის პროგა. ლუკა ნოზაძის (90 წუთი) “რაშთი” შინ 1:2 დამარცხდა “ფულადთან”. ქართველის გუნდი ელიაში დარჩენისთვის იბრძვის. 

აშშ. MLS. ვაკო ყაზაიშვილი მოედანზე 87-ე წუთზე გამოჩნდა, მისი “სან ხოსე” კი სტუმრად “დალასს” დაუზავდა - 0:0.

არ უთამაშიათ

გიორგი ლორია (“მაგდებურგი”, გერმანია)
აკაკი გოგია (“უნიონი”, გერმანია)
ჯაბა ჯიღაური (“გრენობლი”, საფრანგეთი)
გიორგი არაბიძე (“ნასიონალი”, პორტუგალია)
გიორგი ჩაკვეტაძე (“გენტი”, ბელგია)
ირაკლი ბუღრიძე (“ბეერსხოტი”, ბელგია)
ლევან ელოშვილი (“კაპფენბერგი”, ავსტრია)
გიორგი მერებაშვილი (“პლოცკი”, პოლონეთი)
ლუკა ზარანდია (“არკა”, პოლონეთი)
ზაქარია ბეგლარიშვილი (“ჰონვედი”, უნგრეთი)
ბაჩანა არაბული (“პუშკაშ აკადემია”, უნგრეთი)
ვახტან ჭანტურიშვილი (“ზლინი”, ჩეხეთი)
ლუკა ლოჩოშვილი (“ჟილინა”, სლოვაკეთი)
ლევან ყენია (“დუდელანჟი”, ლუქსემბურგი)
ლაზარე კუპატაძე (“ჟენეს ეში”, ლუქსემბურგი)
ჯიმი ტაბიძე (“უფა”, რუსეთი)
ხვიჩა კვარაცხელია (“ლოკომოტივი”, რუსეთი)
სანდრო კობახიძე (“ვორსკლა”, უკრაინა)
დავით სხირტლაძე (“რიგა”, ლატვია)
მათე ვაწაძე (“ლიეპაია”, ლატვია)
თამაზ ცერცვაძე (“საბაილი”, აზერბაიჯანი)
გურამ კაშია (“სან ხოსე”, აშშ)

ყოველდღიური სპორტული გაზეთი "ლელო"
797
მკითხველის კომენტარები / 0 /
მსგავსი ამბები
რუბრიკის სხვა სიახლეები
;