ლეგიონის მიმოხილვა. ანანიძე კვლავ სკამზეა, კიტეიშვილმა პირველი შეაგდო, მჭედლიძე ნელ ნელა ბრუნდება [VIDEO]

ოთარ კიტეიშვილი დიდი ხანი არაა, რაც ლეგიონერი გახდა. თბილისის "დინამოს" ყოფილმა ლიდერმა ავსტრიის ბუნდესლიგაში თავისი პირველი გოლი გაიტანა.

იტალია
სერია A. ლევან მჭედლიძე "ემპოლის" რიგებში 73-ე წუთზე გამოჩნდა სპალ-თან საგარეო მატჩში. ეს შეხვედრა 2:2 დასრულდა, ქართველმა ფორვარდმა კი ბოლოსწინა წუთზე ყვითელი ბარათი მიიღო.

ესპანეთი
ლა ლიგა 2. გიორგი აბურჯანიას "ლუგო" სტუმრად "ოსასუნასთან" დამარცხდა - 0:1. ქართველი ფეხბურთელი გალისიელთა განაცხადშიც არ ყოფილა. ლადო მოხევიშვილის (არ უთამაშია) "ალბასეტემ" შინ ლიდერი "ალკორკონი" დაამარცხა - 2:1. ტრავმირებული გიორგი პაპუნაშვილის "სარაგოსა" შინ 0:1 დამარცხდა "კადისთან". არაგონელები გასავარდნ ზონაში არიან.

გერმანია
III ლიგა. ლუკას ჰუფნაგელის "უნტერჰახინგმა" კვლავ 5 გოლი გაიტანა, ამჯერად, 5:0 დაამარცხა "კაიზერსლაუტერნი". ლუკასმა შეუცვლელად ითამაშა.

საფრანგეთი
ლიგა 2. ჯაბა ჯიღაურის "გრენობლი" შინ ლიდერ "მეცს" დაუზავდა - 1:1. ქართველი ნახევარმცველი განაცხადში არ ყოფილა.
ნასიონალი. ამირან სანაიას "როდეზმა" შინ 2:1 მოუგო "ბურგ-ან-ბრესს". სანაიამ ტრადიციულად, შეუცვლელად ითამაშა.

პორტუგალია
პრიმეირა. ავთო ებრალიძის "შავეში" შინ "გიმარაეშთან" დამარცხდა - 0:1. ავთო მოედანზე 68-ე წუთზე გამოჩნდა. გიორგი არაბიძის "ნასიონალმა" სტუმრად "ავეშს" აჯობა - 3:2, თუმცა ქართველი მადეირელთა განაცხადში არ ყოფილა. გიორგი მაკარიძის (ტრავმა) "რიუ ავემ" 7:0 მოუგო "სილვეშს".

ბელგია
ჟუპილერლიგა. ქართველთა "გენტი" სტუმრად "ლოკერენს" დაუზავდა. გიორგი ქვილითაია ტრავმირებულია, ხოლო გიორგი ჩაკვეტაძემ შეუცვლელად ითამაშა. ერთხელ მსაჯს მის სასარგებლოდ პენალტის დანიშვნა შეეძლო.

რუსეთი
პრემიერ ლიგა. მოსკოვის დერბიში "სპარტაკმა" ჩემპიონ "ლოკომოტივს" 2:1 მოუგო. გამარჯვებულთა რიგებში ისევ ვერ დაუბრუნდა მოედანს ჯანო ანანიძე, ის სათადარიგო იყო, ხოლო წაგებულებში შეუცვლელად ითამაშა საბა კვირკველიამ, რომელმაც მატჩის მიწურულს ყვითელი ბარათი მიიღო. თორნიკე ოქრიაშვილის "კრასნოდარმა" გიორგი ჭანტურიას "ურალი" დაამარცხა - 2:0. თორნიკეც და გიორგიც სათადარიგოთა სკამზე დარჩნენ. ჯიმი ტაბიძის "უფა" სტუმრად "ანჟის" დაუზავდა - 0:0. ჯიმიმ შეუცვლელად ითამაშა, მეორე ტაიმში ქართველი მცველი გააფრთხილეს. გია გრიგალავას "არსენალი" ტულაში "ზენიტს" დღეს უმასპინძლებს.

უკრაინა
პრემიერ ლიგა. დონეცკის დერბიში, რომელიც ხარკოვში გაიმართა, "შახტარი" 2:2 დაუზავდა "ოლიმპიკს". დავით ხოჭოლავა სასტარტოში იყო, მაგრამ მან ტრავმა მიიღო და 26-ე წუთზე შესაცვლელი გახდა. "დესნამ" "ზორიასთან" შინ 0:2 წააგო. ზაურ მახარაძე გამარჯვებულთა კარში გამოჩნდა. ლუკა კობერიძე კი მასპინძელთა რიგებში 86-ე წუთზე შევიდა. ქართველთა "ვორსკლა" დღეს კიევის "არსენალს" მასპინძლობს.

ავსტრია
ბუნდესლიგა. ოთარ კიტეიშვილის "შტურმმა" შინ 3:0 დაამარცხა "ვოლფსბერგერი". 88-ე წუთზე მასპინძელთა მესამე გოლი კიტეიშვილმა გაიტანა, რომელიც 91-ე წუთზე გამოცვალეს. ეს კიტეიშვილის პირველი გოლია ლეგიონერის რანგში.



დანია
სუპერლიგა. საბა ლობჟანიძის (90 წუთი) "რანდერსი" შინ "მიდტიულანდთან" 1:2 დამარცხდა. ლაშა პარუნაშვილის (არ უთამაშია) "ესბიერგი" შინ 1:4 შერცხვა "ოლბორგთან".

პოლონეთი
ექსტრაკლასა. ლუკა ზარანდიას "არკა" "იაგელონიას" ესტუმრა და 1:3 დამარცხდა. ლუკა 75-ე წუთზე გამოცვალეს, მანამდე კი გააფრთხილეს. წააგო ვატო არველაძის "კორონამაც", ეს გუნდი სტუმრად "ლეგიასთან" 0:3 დამარცხდა. არველაძე განაცხადში არ ყოფილა. შინ 0:4 განადგურდა გიორგი მერებაშვილის (56-ე წუთზე შეცვალეს) "პლოცკი", რომელსაც "გურნიკმა" მოუგო. ლაშა დვალის "პოგონმა" შინ 2:0 მოუგო "ლეგნიცას". ქართველი მცველი განაცხადში არ ყოფილა.

სლოვაკეთი
ფორტუნა ლიგა. ქართველთა "ტრნავა" სტუმრად "რუჟომბეროკთან" 1:3 დამარცხდა. დავით სხირტლაძე 61-ე წუთზე შევიდა, ხოლო ვახტანგ ჭანტურიშვილს არ უთამაშია.

შვეიცარია
სუპერ ლიგა. ქართველთა "ლუცერნი" სტუმრად "სიონთან" დამარცხდა - 0:2. ვაკო გვილია მოედანზე 75-ე წუთზე გამოჩნდა, ოთარ კაკაბაძეს ტრავმა აქვს.

ბულგარეთი
პერვა ლიგა. გაიოზ მაჩაიძის (90 წუთი) "ვერეიამ", როგორც იქნა, ქულა აიღო - შინ პლოვდივის "ლოკომოტივს" 2:2 ეთამაშა.

ხორვატია
HNL. გიორგი მჭედლიშვილის (სათადარიგო) "გორიცა" სტუმრად ზაგრების "დინამოსთან" დამარცხდა - 0:1.

კვიპროსი
I დივიზიონი. ირაკლი მაისურაძის (არ უთამაშია) "ენოსისი" სტუმრად "პაფოსთან" დამარცხდა - 0:1. ქართველთა "ანორთოსისმა" "ერმისს" სძლია - 2:1. ნიკა კაჭარავა 77-ე წუთზე გამოცვალეს, ბექა მიქელთაძე - 87-ეზე.

უნგრეთი
ოტპ. ბაჩანა არაბულის (46-ე წუთზე შევიდა) "პუშკაშის აკადემია" სტუმრად "ვარდასთან" დამარცხდა - 0:1. გიორგი ბერიძის (92-ე წუთზე შეცვალეს, გააფრთხილეს) "უიპეშტი" სტუმრად "მეჟოკოვეშდს" დაუზავდა - 0:0.

ყოველდღიური სპორტული გაზეთი "ლელო"
1030
მკითხველის კომენტარები / 0 /
მსგავსი ამბები
რუბრიკის სხვა სიახლეები
;