ლეგიონის მიმოხილვა: არაბულმა გოლით განაახლა, ლორია კვლავ მშრალად [VIDEO]

ამ უქმეებზე ქართულ ლეგიონს უნგრეთში მოთამაშეები დაემატნენ, რომელთაგანაც ერთ-ერთმა - ბაჩანა არაბულმა გოლიც გაიტანა. ველოდით შვეიცარიელ ქართველებსაც, მაგრამ უამინდობამ იქ ტური ჩაშალა.

იტალია
სერია A. სატრანსფერო ფანჯარა დაიხურა და ლევან მჭედლიძე „ემპოლიში“ დარჩა, თუმცა მისი სათამაშო დრო ისევ მცირეა - „ემპოლი“ შინ „კიევოს“ დაუზავდა - 2:2. აუტსაიდერთა ჯახში ლევანმა მხოლოდ ბოლო 7 წუთი და კომპენსირებული დრო ითამაშა.

ესპანეთი
ლა ლიგა 2. სატრანსფერო ჭორები არც გიორგი აბურჯანიას შემთხვევაში გამართლდა, ის „ლუგოში“ დარჩა, თუმცა სტუმრად „ნუმანსიასთან“ პირწმინდად, 0:3 წაგებულ მატჩში ქართველი სათადარიგო იყო. ლადო მოხევიშვილიც სათადარიგო იყო „ალბასეტეს“ საგარეო გამარჯვებაში „კორდობასთან“ - 3:1.

გერმანია
II ბუნდესლიგა. ზედიზედ მეორედ შეინახა კარი მშრალად საქართველოს ნაკრების გოლკიპერმა გიორგი ლორიამ, მისმა „მაგდებურგმა“ კი სტუმრად უშუალო კონკურენტი „ინგოლშტადტი“ 1:0 დაამარცხა. ლორიამ სამი დარტყმა მოიგერია. „მაგდებურგი“ 17 ქულით მე-15 ადგილზეა. ლორიას მისვლამდე გუნდს 18 ტურში ერთადერთი მოგება ჰქონდა, ახლა კი ზედიზედ ორი მატჩი მოიგო და გასავარდნ ზონაშიც აღარ არის.
III ლიგა. ლუკას ჰუფნაგელის „უნტერჰახინგისა“ და კოტბუსის „ენერგის“ მატჩი გადაიდო.

საფრანგეთი
ლიგა 2. ჯაბა ჯიღაურის (სათადარიგო) „გრენობლი“ სტუმრად 2:2 დაუზავდა „შატორუს“. ეს „გრენობლის“ ზედიზედ მე-4 ფრე იყო.
ნასიონალი. ამირან სანაიას „როდეზმა“ სტუმრად 1:0 მოუგო „მარინანს“ და 38 ქულით მე-3 ადგილზეა. ქართველმა ფეხბურთელმა შეუცვლელად ითამაშა და საგოლე პასი მიითვალა.

პორტუგალია
პრიმეირა. „ნასიონალი“ „სეტუბალს“ 0:0 დაუზავდა. წესით, ამ შეხვედრაში სამ ქართველს უნდა ეთამაშა, მაგრამ არც ერთი არ ყოფილა - მასპინძელთა განაცხადში არ იყვნენ გიორგი არაბიძე და ავთო ებრალიძე, ხოლო სტუმრებში არ ყოფილა გიორგი მაკარიძე.

ბელგია
ჟუპილერლიგა. ქართველთა გარეშე ითამაშა „გენტმა“, რომელიც სტუმრად „ბრიუგეს“ დაუზავდა - 1:1. გიორგი ჩაკვეტაძე მცირე ტრავმის გამო განაცხადში არ ყოფილა, ხოლო გიორგი ქვილითაია სათადარიგო იყო.
პროქსიმუს ლიგა. ირაკლი ბუღრიძის „ბეერსხოტმა“ სტუმრად 3:1 აჯობა „ტუბიცეს“. ქართველი ნახევარმცველის დებიუტი არ შედგა. ის სათადარიგო იყო.

საბერძნეთი
სუპერ ლიგა. გიორგი რეხვიაშვილის (სათადარიგო) „ლევადიაკოსი“ შინ „პანათინაიკოსს“ დაუზავდა - 0:0. ლაშა შერგელაშვილის „იანინა“ სტუმრად „არისთან“ დამარცხდა - 0:1. ქართველმა მცველმა შეუცვლელად ითამაშა.

უნგრეთი
OTP. უნგრეთის ლიგის განახლებას ინტერესით ველოდით, რადგან ქართველთა რიცხვმა იქ მნიშვნელოვნად მოიმატა. „ფერენცვაროშისა“ და „ჰონვედის“ ტურის ცენტრალურ მატჩში ლაშა დვალისა და ზაქარია ბეგლარიშვილის დუელს ველოდით, მაგრამ ვერ ვიხილეთ. დვალმა 90 წუთი ითამაშა და შესანიშნავი დებიუტიც გამოუვიდა, რადგან მისმა გუნდმა 1:0 მოიგო.

აი, ბეგლარიშვილი კი „ჰონვედის“ ბოლო სპარინგში სერიოზულად დაშავდა და სულ მცირე, 2 თვე უქმობა მოუწევს. „პუშკაშ აკადემიამ“ სტუმრად „მოლ ვიდი“ 3:0 დაამარცხა. სტუმართა ბოლო გოლი 88-ე წუთზე ბაჩანა არაბულმა გაიტანა, რომელიც მოედანზე 75-ე წუთზე შევიდა. ერთ-ერთი ლიდერის ასეთი განადგურება მოულოდნელია, ხოლო არაბულის ანგარიშზე ამ სეზონში უკვე 5 გოლია.

ბუბა დაუშვილის (90 წუთი) „ჰალადაში“ შინ „კიშვარდასთან“ დამარცხდა - 0:1. გიორგი ბერიძის (69-ე წუთზე გამოცვალეს) „უიპეშტი“ სტუმრად „დებრეცენს“ დაუზავდა - 0:0.



ხორვატია
HNL. გიორგი მჭედლიშვილის „გორიცამ“ სტუმრად უშუალო კონკურენტი „რიეკა“ დაამარცხა - 3:1. ქართველმა მცველმა კარგად ითამაშა, 90 წუთში მან ერთი საგოლე პასი მოასწრო, მეორე ტაიმში ის გააფრთხილეს.

კვიპროსი
I დივიზიონი. ქართველთა „ანორთოსისმა“ 1:0 მოუგო „აპოლონს“. ამ შეხვედრაში ბექა მიქელთაძე მოედანზე 64-ე წუთზე შევიდა, ხოლო ნიკა კაჭარავა სათადარიგოთა სკამზე ბოლომდე დარჩა. ირაკლი მაისურაძის (90 წუთი) „პარალიმნიმ“ სტუმრად 2:1 მოუგო „ალკის“.

ალბანეთი
სუპერ ლიგა. ირაკლი ძარიას „კუკესიმ“ სტუმრად 2:1 მოუგო „ფლამურტარის“ და 38 ქულით მე-2 ადგილზეა.

აზერბაიჯანი
პრემიერ ლიგა. თამაზ ცეცხლაძის (სათადარიგო) „საბაილმა“ სტუმრად „კეშლია“ 3:0 გაანადგურა. დავით ვოლკოვს „გაბალაში“ დებიუტი ჰქონდა - ქართველის გუნდმა „სუმგაითი“ 1:0 დაამარცხა. ვოლკოვი სასტარტო შემადგენლობაში იყო და 81-ე წუთზე გამოცვალეს (პირველ ტაიმში ყვითელი ბარათი მიიღო). „გაბალამ“ გამარჯვების გოლი ამის მერე გაიტანა.

საუდის არაბეთი
პროფესიული ლიგა. ზურაბ ცისკარიძის „ალ-ჰაზმმა“ სტუმრად 2:1 მოუგო „ალ-ფაისალის“. ქართველმა მცველმა შეუცვლელად ითამაშა.

დღეს ითამაშებენ
* გერმანიის მეორე ბუნდესლიგაში აკაკი გოგიას „უნიონი“ ჰამბურგში „ზანკტ პაულის“ ესტუმრება.
* ესპანეთის ლა ლიგა 2-ში გიორგი პაპუნაშვილის „სარაგოსა“ კანარის კუნძულებზე „ლას პალმასს“ ეთამაშება.

ყოველდღიური სპორტული გაზეთი "ლელო"
1158
მკითხველის კომენტარები / 0 /
მსგავსი ამბები
რუბრიკის სხვა სიახლეები
;