ლეგიონის მიმოხილვა. მაკარიძის დაბრუნება და 6 ქართული გოლი [VIDEO]

ქართული გოლები საფრანგეთში, პოლონეთში (2), ავსტრიაში, კვიპროსსა და ირანში, თუმცა მთავარი მოვლენა პორტუგალიაში მოხდა - ნახევარწლიანი იძულებითი პაუზის შემდეგ ფეხბურთს ნაკრების მეკარე გიორგი მაკარიძე დაუბრუნდა.

იტალია
სერია A. ლევან მჭედლიძის (არ უთამაშია) “ემპოლიმ” სტუმრად “მილანთან” 0:3 წააგო.

ესპანეთი
ლა ლიგა 2. ტრავმირებული გიორგი პაპუნაშვილის “სარაგოსა” სტუმრად “ოსასუნასთან” 0:1 დამარცხდა. გიორგი აბურჯანიას “ლუგომ” 2:2 ითამაშა “ელჩესთან”. გიორგი მასპინძელთა რიგებში მე-80 წუთზე შევიდა.

გერმანია
II ბუნდესლიგა. აკაკი გოგიას “უნიონი” ბერლინში “არმინიას” დაუზავდა - 1:1. გოგია მოედანზე 74-ე წუთზე გამოჩნდა. “უნიონი” 41 ქულით მე-3 ადგილზეა. გიორგი ლორიას “მაგდებურგი” შინ 1:1 დაუზავდა “პადერბორნს”. ლორიას ანგარიშზე ორი “სეივია”.
III ლიგა. ლუკას ჰუფნაგელის (90 წუთი) “უნტერჰახინგი” სტუმრად “ბრაუნშვაიგთან” დამარცხდა - 0:1.

საფრანგეთი
ლიგა 2. ჯაბა ჯიღაურს არ უთამაშია, მისმა “გრენობლმა” კი სტუმრად 1:3 დათმო “ბრესტთან”.
ნასიონალი. ამირან სანაიას “როდეზიმ” შინ 4:1 დაამარცხა “დიუნკერკი”. ანგარიში მე-20 წუთზე სწორედ ქართველმა კაპიტანმა გახსნა. “როდეზი” 44 ქულით მე-2 ადგილზეა. სანაიამ ამ სეზონში პირველი გოლი გაიტანა.

პორტუგალია
პრიმეირა. 6-თვიანი იძულებითი პაუზის შემდეგ ფეხბურთს დაუბრუნდა გიორგი მაკარიძე, რომელმაც ახალ გუნდში “სეტუბალში” პირველად ითამაშა - “სეტუბალი” შინ 1:1 დაუზავდა “გიმარაეშს”. მას პირველი ტაიმის მიწურულს ახლო მანძილიდან გაუტანეს, თუმცა ჯამში 5 დარტყმული მოიგერია. ქართველთა “ნასიონალი” სტუმრად 0:2 დამარცხდა “სანტა კლარასთან” და გავარდნის ზონასთან ქულაღა აშორებს. მადეირელთა განაცხადში არც ახალწვეული ავთო ებრალიძე და არც გიორგი არაბიძე ყოფილა.

ბელგია
ჟუპილერლიგა. ქართველთა “გენტმა” 2:1 დაამარცხა “სტანდარდი”, მაგრამ ამაში ჩვენებურთა წვლილი არ ყოფილა, გიორგი ქვილითაია მწვრთნელმა არ ათამაშა (სათადარიგო), გიორგი ჩაკვეტაძემ კი ამ ტურისთვისაც ვერ მოახერხა გამოჯანმრთელება.
პროქსიმუს ლიგა. ირაკლი ბუღრაძის (სათადარიგო) “ბეერსხოტი” შინ “რუზელარეს” დაუზავდა - 1:1.

პოლონეთი
ექსტრაკლასა. ლუკა ზარანდიას “არკა” შინ “პიასტთან” 1:2 დამარცხდა. ზარანდიამ შეუცვლელად ითამაშა. “კორონა” შინ “პოგონს” დაუზავდა - 1:1. გუნდი მარცხისგან ვატო არველაძემ გადაარჩინა, რომელიც მოედანზე 65-ე წუთზე შევიდა, 84-ეზე კი ლამის აუტის ხაზიდან შესრულებული საჯარიმოთი გაიტანა. ეს 20 წლის ქართველის პირველი გოლია პოლონეთის ჩემპიონატში. გიორგი მერებაშვილის (არ უთამაშია) “პლოცკი” სტუმრად 1:2 დამარცხდა “ლეგნიცასთან” და 20 ქულით ბოლოსწინა ადგილზეა. ვაკო გვილიამ “გურნიკის” რიგებში პირველი გოლი გაიტანა. მე-12 წუთზე მან ახლო მანძილიდან გახსნა ანგარიში აუტსაიდერი “ზაგლებნიეს” კარში - 2:1. გვილია 83-ე წუთზე გამოცვალეს. გიორგი ივანიშვილი წაგებულთა რიგებში სათადარიგო იყო, გიორგი განუგრავა - დისკვალიფიცირებული.

შვეიცარია
სუპერლიგა. პირველი ქართული დუელი არ შედგა, რადგან “ლუცერნის” ოთარ კაკაბაძე ტრავმირებულია და სტუმრად “ციურიხთან” 1:1 დასრულებულ მატჩში არ უთამაშია. ლევან ხარაბაძემ კი მასპინძელთა რიგებში შეუცვლელად ითამაშა.

ავსტრია
ბუნდესლიგა. 55-ე წუთზე ოთარ კიტეიშვილმა ლოვრიჩის პასით გაიტანა და “შტურმი” სტუმრად “მატერსბურგთან” მარცხს გადაურჩა - 1:1. ქართველმა ნახევარმცველმა შეუცვლელად ითამაშა. ეს მისი მეორე გოლია ბუნდესლიგაში.

2 ლიგა. ლევან ელოშვილის “კაპფენბერგმა” სეზონის განახლებისთანავე სტუმრად ვენის “აუსტრია” (მოყვარულები) დაამარცხა - 3:1. ელოშვილი შესვენების შემდეგ გამოჩნდა 0:1-ზე და მისმა გუნდმა თამაში შემოატრიალა. “კაპფენბერგი” 27 ქულით მე-4 ადგილზეა.

დანია
სუპერლიგა. ლაშა პარუნაშვილის (90 წუთი) “ესბიერგი” სტუმრად “ჰობროსთან” 0:2 დამარცხდა. “ბრონდბიუსთან” საგარეო მატჩში საბა ლობჟანიძე სასტარტო შემადგენლობაში იყო, ის 83-ე წუთზე გამოცვალეს, “რანდერსი” კი 1:2 დამარცხდა.

ჩეხეთი
1 ლიგა. ვახტანგ ჭანტურიშვილის “ზლინი” შინ 0:2 დამარცხდა “ბოჰემიანსთან”. ქართველმა ლეგიონერმა შეუცვლელად ითამაშა, პირველ ტაიმში ის გააფრთხილეს.

საბერძნეთი
სუპერლიგა. გიორგი რეხვიაშვილის “ლევადიაკოსი” “ქსანთის” ესტუმრა, ქართველი მცველი სასტარტო შემადგენლობაში იყო, 20 წუთის მერე ქარიშხალმა მატჩი შეწყვიტა.

უნგრეთი
OTP. ლაშა დვალის “ფერენცვაროშმა” “პუშკაშ აკადემიას” 4:0 მოუგო, ქართველმა მცველმა შეუცვლელად ითამაშა. ბაჩანა არაბული სტუმართა რიგებში არ ყოფილა. გიორგი ბერიძის “უიპეშტმა” 5:0 გაანადგურა “დიოშდიორი”. ბერიძე 70-ე წუთზე შევიდა. ტრავმირებული ზაქარია ბეგლარიშვილის “ჰონვედმა” შინ მტკ დაამარცხა - 2:1. ბუბა დაუშვილის “ჰალადაში” სტუმრად 0:1 დამარცხდა, დაუშვილი 83-ე წუთზე გამოცვალეს “მოლ ვიდისთან” მატჩში.

ხორვატია
HNL. გიორგი მჭედლიშვილის (სათადარიგო) “გორიცა” სპლიტში “ჰაიდუკს” დაუზავდა - 0:0.

ბულგარეთი
პარვა ლიგა. გაიოზ მაჩაიძისა და შოთა გვაზავას “ვერეიამ” სტუმრად “ბოტევთან” 0:4 წააგო. ორივე ქართველმა შეუცვლელად ითამაშა.

კვიპროსი
პირველი დივიზიონი. 94-ე წუთზე ნიკა კაჭარავამ ჩემპიონატში მე-4 გოლი გაიტანა და “ანორთოსისს” სტუმრად “ერმისთან” მოაგებინა - 3:2. კაჭარავამ შეუცვლელად ითამაშა. ბექა მიქელთაძე კი არ გამოჩენილა. “ანორთოსისს” კვიპროსში 9 ქულა დააკლეს. ირაკლი მაისურაძის (90 წუთი) “პარალიმნი” სტუმრად აეკ-თან დამარცხდა - 0:3.

ალბანეთი
სუპერ ლიგა. ირაკლი ძარიას “კუკესიმ” შინ 3:2 მოუგო “კამზას” და 41 ქულით მე-2 ადგილზეა.

ლუქსემბურგი
ნასიონალი. ლევან ყენიას “დუდელანჟმა” სტუმრად 4:0 გაანადგურა “დიფერდანჟი”. ყენიამ 90 წუთი ითამაშა.

უკრაინა
პრემიერ ლიგა. განახლდა უკრაინის ჩემპიონატიც. ქართული დაპირისპირება შედგა პოლტავაში, სადაც ადგილობრივი “ვორსკლა” 0:4 განადგურდა “კარპატისთან”. სანდრო კობახიძე 55-ე წუთზე გამოცვალეს, ხოლო ანდრო გიორგაძე განაცხადში არ ყოფილა, გამარჯვებულთა რიგებში კი ნიკა სანდოხაძემ შეუცვლელად ითამაშა. ჯაბა ლიპარტიას (არ უთამაშია) “არსენალი” შინ “დესნასთან” 0:2 დამარცხდა.

აზერბაიჯანი
პრემიერ ლიგა. დავით ვოლკოვის (პირველი ტაიმი ითამაშა) “გაბალა” შინ 0:0 ეთამაშა “კეშლიას”. თამაზ ცერცვაძის (სათადარიგო) “საბაილმა” სტუმრად ლიდერი “ნეფთჩი” 2:1 დაამარცხა.

ირანი
სპარსეთის ყურის პრო ლიგა. ქართველთა “ნასაჯიმ” შინ, მაზანდარანში 2:0 მოუგო “ფოოლადს”. ლაშა თოთაძემ და გიორგი გველესიანმა შეუცვლელად ითამაშეს. 72-ე წუთზე გველესიანმა პენალტი გაიტანა. გველესიანს ამ სეზონში უკვე 5 გოლი აქვს გატანილი. კიდევ ერთი “ქართული” გუნდი “რაშთი” ხორასანში “პადიდესთან” დამარცხდა - 0:2. ლუკა ნოზაძემ და რომან ჩაჩუამ შეუცვლელად ითამაშეს.

დღეს ითამაშებენ
* საბერძნეთში ლაშა შერგელაშვილის “იანინა” “პანეთოლიკოსს” ესტუმრება.
* უკრაინაში დავით ხოჭოლავას “შახტარი” “ოლექსანდრიას” მასპინძლობს.
* გიორგი ხარაიშვილის “გიოტებორგი” შინ გაის-ს ხვდება შვედეთის თასზე.

ყოველდღიური სპორტული გაზეთი "ლელო"
1170
მკითხველის კომენტარები / 0 /
მსგავსი ამბები
რუბრიკის სხვა სიახლეები
;