ლეგიონის მიმოხილვა: ჰეთ თრიკი, საგოლე გადაცემები და ომი მოედანზე, - გიორგი ივანიშვილმა 'ზაგლემბიესთან' კონტრაქტი გააფორმა

ქართველებმა ომს სკამიდან უყურეს

ბელგიის თასის პირველ ნახევარფინალში ქართველების „გენტი“ საშინაო ასპარეზზე დაუზავდა „ოსტენდეს“ - 2:2.

გიორგი ჩაკვეტაძემ და გიორგი ქვილითაიამ სათადარიგოთა სკამიდან უყურეს თამაშს, რომელიც ომს უფრო ჰგავდა. არბიტრმა „გენტის“ ორი, ხოლო მეტოქის ერთი ფეხბურთელი გააძევა. შეგახსენებთ, რომ ორივე ჩვენებურმა ტრავმა ახლახან მოიშუშა.

გიორგი მერებაშვილის „პლოცკმა“ ამხანაგურ შეხვედრაში 12:0 ააწიოკა კვიპროსული „სოტირისი“. საქართველოს ნაკრების შემტევმა ჰეთ თრიკი მიითვალა.

ივანიშვილი და ზაგლემბიე: 0,5+1

გიორგი ივანიშვილმა სოსნოვეცის „ზაგლემბიესთან“ კონტრაქტი გააფორმა. ამ ინფორმაციას პოლონური კლუბის ოფიციალური საიტი ავრცელებს.

„ჩვენს გუნდში კიდევ ერთი ქართველი ფეხბურთელი ჩაირიცხა. გიორგი გაბედავას გიორგი ივანიშვილიც შეუერთდა.

მან კლუბთან კონტრაქტი ნახევარი წლით გააფორმა - კიდევ ერთი წლით გახანგრძლივების პერსპექტივით. 29 წლის გიორგი ივანიშვილმა 2018 წელს თბილისის „დინამოში“ 26 შეხვედრა ჩაატარა და 3 გოლი გაიტანა, ევროპის ლიგის კვალიფიკაციაში კი 2 მატჩი ითამაშა. „ზაგლემბიეს“ ახალწვეულს, საქართველოს გარდა, ნათამაშები აქვს შვეიცარიულ კლუბებში - „ბელინცონაში“, „შაფჰაუზენში“, „ვოლენსა“ და „ციურიხში“. საქართველოს გარდა, აქვს შვეიცარიის მოქალაქეობაც“, - წერს „ზაგლემბიეს“ ოფიციალური ვებგვერდი, სადაც ივანიშვილის კომენტარიც არის:

„ძალიან მიხარია, რომ „ზაგლემბიეში“ ჩემი ირწმუნეს და კონტრაქტი გავაფორმე. ვიმედოვნებ, გუნდს დავეხმარები და ლიგაში ადგილის შენარჩუნებას შევძლებთ“.

მჭედლიშვილის საგოლე ჰეთ-თრიქი

გიორგი მჭედლიშვილი სეზონისთვის „გორიცასთან“ ერთად ემზადება. ბოლო საკონტროლო მატჩში მან თავი უჩვეულოდ ბევრი საგოლე გადაცემით გამოიჩინა. ქართველის გუნდმა საკუთარ ბაზაზე უნგრული „ბუტაფოკი“ მიიღო და 4:2 დაამარცხა. საინტერესოა, რომ მჭედლიშვილმა სამი(!) საგოლე პასი გააკეთა.

„ეს მორიგი ამხანაგური თამაში იყო, რომელიც გორიცაში გავმართეთ და მართლაც სამი საგოლე გადაცემა გავაკეთე - პირველი, მესამე და მეოთხე გოლები პარტნიორებს მე გავატანინე. გუნდს უპრობლემოდ შევეწყვე, „ფიზიკაშიც“ თავს უკვე ძალიან კარგად ვგრძნობ და აქაური ტაქტიკა-თეორიაც ავითვისე. ეს თამაშზეც აისახა“, - ამბობს მჭედლიშვილი.

დავითაშვილი რუბინს მეორე შეკრებაზეც გაჰყვა

ზუკა დავითაშვილი ყაზანის „რუბინს“ მეორე უცხოურ შეკრებაზეც გაჰყვა. გუშინ რუსეთის პრემიერლიგის კლუბი თურქეთის ქალაქ ბელექში გაემგზავრა და საერთო სიაში ქართველის გვარიც იყო.

დავითაშვილმა „რუბინის“ ორივე საკონტროლო შეხვედრაში მიიღო მონაწილეობა. „დიოშდიორთან“ მოგებულ (2:0) სპარინგზე უკვე ვწერდით. რუმინულ „ვიტორულთან“ (რომელსაც გუშინ „საბურთალომ“ 2:1 მოუგო) ფრედ (2:2) დასრულებულ შეხვედრაში 17 წლის ქართველი ძირითად შემადგენლობაში იყო და მეორე ტაიმში შეცვალეს. მან პირველი საგოლე შეტევა განავითარა - კარის წინ მარტო დარჩა და მეკარემ ბურთი თითებით მოიგერია, დამატებაზე კი ყაზანელთა მცველმა გაიტანა.

სავარაუდოდ, დავითაშვილი კონტრაქტს მესამე შეკრებამდე გააფორმებს, რომელიც 18-23 თებერვალსაა დაგეგმილი. 15 თებერვალს შემტევი ნახევარმცველი 18 წლის გახდება და პროფესიული ხელშეკრულების გაფორმების უფლება ექნება.

ყოველდღიური სპორტული გაზეთი "ლელო"
1509
მკითხველის კომენტარები / 1 /
რაჭველი
0
ჩვენ კარგა ვიცით რომ მჭედლიშვილი აქაც უძლიერესი
იყო,თქვენ ვაისს გააგებიეთ თავისი ცხვირის იქით რომ
ვერავის ხედავს
მსგავსი ამბები
რუბრიკის სხვა სიახლეები
;