[ლეგიონის უქმეები, VIDEO] შენგელია, ვაჩიბერაძე... წლის პირველი გოლები

ქართველმა ლეგიონერებმა ოფიციალურ მატჩებში 2020 წლის ანგარიშიც გახსნეს - ეს თურქეთსა და ბელგიაში მოხდა….

გერმანია. ბუნდესლიგა. აკაკი გოგიას (ტრავმა) "უნიონი" სტუმრად ლიდერ "ლაიპციგთან" დამარცხდა - 1:3.

ესპანეთი. ლა ლიგა 2. გიორგი პაპუნაშვილის (75-ე წუთზე შეცვალეს) "რასინგმა" "ლას პალმასს" უმასპინძლა, ბოლო წამებამდე უგებდა, მაგრამ უპირატესობა ვერ შეინარჩუნა - 1:1.

პორტუგალია. პრიმეირა. გიორგი მაკარიძის (90 წუთი, გააფრთხილეს) "სეტუბალმა" სტუმრად 1:0 მოუგო "ბელენენსეშს". ქართველი გოლკიპერის ანგარიშზე მორიგი "მშრალი" თამაშია.

ჰოლანდია. ერედივიზიე. გიორგი აბურჯანიას (სათადარიგო) "ტვენტემ" "გრონინგენს" უმასპინძლა და 0:0 დაუზავდა.

ბელგია. ჟუპილერლიგა. 75-ე წუთზე გიორგი ქვილითაია გიორგი ჩაკვეტაძემ შეცვალა, შინ "მუსკრონთან" 3:1 მოგებულ შეხვედრაში თავის გამოჩენა ორივე ქართველ ლეგიონერს შეეძლო, თუმცა ქვილითაიამ საგოლე პასი მაინც მიითვალა, თანაც საკმაოდ ლამაზი. ლუკა ზარანდიას (67-ე წუთზე შევიდა) "ვარეგემმა" "გენკს" უმასპინძლა და 0:3 დამარცხდა.

ბელგია. პროქსიმუს ლიგა. ბექა ვაჩიბერაძის (77-ე წუთზე შეცვალეს) "ლომელმა" შინ 1:0 დაამარცხა გიორგი ბერიძის (90 წუთი) "ლოკერენი". ქართულ დუელში თავი ვაჩიბერაძემ გამოიჩინა, მან მე-6 წუთზე გამარჯვების გოლი გაიტანა. ეს 23 წლის შემტევი ნახევარმცველის პირველი გოლია სეზონში, მისი "ლომელი" 24 ქულით მე-6 ადგილზეა, ხოლო "ლოკერენი" 18 ქულით ბოლო, მე-8 ადგილზეა.

საბერძნეთი. სუპერ ლიგა. ბაჩანა არაბულის (90 წუთი) "პანიონისი" შინ ოფი-სთან დამარცხდა - 1:2.

თურქეთი. სუპერ ლიგი. ლევან შენგელიამ (87-ე წუთზე შევიდა) პირველი გოლი გაიტანა "კონიასპორში" და თან ეს გოლი გამარჯვებისა გამოდგა. ქართველი ლეგიონერის წარმატებას ისიც სძენს დატვირთვას, რომ ის მოედანზე ხუთი წუთის შესულიც არ იყო, გოლი კი მე-2 კომპენსირებულ წუთზე გაიტანა, რითაც თავის გუნდს სტუმრად "ანკარაგიუჯუსთან" 3 ქულა მოუტანა - 1:0.

თურქეთი. 1 ლიგი. გიორგი არაბიძის (ტრავმა) "ადანასპორი" შინ "ახიშარს" დაუზავდა - 0:0.

879
მკითხველის კომენტარები / 0 /
მსგავსი ამბები
რუბრიკის სხვა სიახლეები
;