ლეგიონის უქმეები. გიორგი ჩაკვეტაძე დაბრუნდა და სადებიუტოც გაიტანა [VIDEO]

18 წლის გიორგი ჩაკვეტაძემ "გენტში" მეორედ ითამაშა და პირველი გოლი გაიტანა. ტრავმამოშუშებული ქართველი "ლოკერენთან" სათადარიგოთა სკამზე იჯდა, თუმცა მოედანზე დანიელი კრისტიანსენის ნაცვლად შესვლამ უკვე 42-ე წუთზე მოუწია. შევიდა და 86-ე წუთზე გოლიც გაიტანა.

ჰოლანდია

ერედივიზიე. "სპარტას" დამარცხების შემდეგ, არნემის "ვიტესი" შინ "ჰეერენვენს" დაუზავდა - 1:1. ამ თამაშში შეუცვლელად გაისარჯა გუნდის კაპიტანი გურამ კაშია.

სხვათა შორის, წინა კვირაში ჩვენებური ხელდერლანდის მხარის კვირის საუკეთესო ფეხბურთელად დაასახელეს. "ვიტესი" 28 ქულით მე-7 ადგილზეა. ეს ადგილი მნიშვნელოვანია, რადგან ევროპალიგის პლეი ოფის საგზურს იძლევა.

ესპანეთი

ლა ლიგა 2. გიორგი პაპუნაშვილმა უფრო შემტევი ფუნქცია შეითავსა "გრანადასთან" სტუმრად 1:2 წაგებულ მატჩში. ქართველი შეუცვლელად გაისარჯა მარჯვენა ვინგერად და მან მეორე ტაიმში ყვითელი ბარათი მიიღო.

გიორგი აბურჯანიას "სევილია ატლეტიკო" სტუმრად "ვალიადოლიდთან" 0:1 დამარცხდა. ქართველმა 62-ე წუთიდან ითამაშა. სევილიელები 16 ქულით ბოლო, 22-ე ადგილზე არიან და გადარჩენის ზონას 10 ქულით ჩამორჩებიან.

პორტუგალია

პრიმეირა ლიგა. "რიუ ავეში" გიორგი მაკარიძის დებიუტი არ შედგა - "ბოავიშტასთან" მატჩში ქართველი ახალწვეული სათადარიგო იყო, კარში კი ვიეირა იდგა. გუნდმა 2:0 მოიგო, ვიეირამ კარი მშრალად შეინახა.

სეგუნდა ლიგა. ავთო ებრალიძის (90 წ) "ვიზეუ" შინ 1:1 დაუზავდა ლისაბონის "სპორტინგის" სარეზერვო გუნდს. "ვიზეუ" 35 ქულით მესამე ადგილზეა, ელიტაში 1 კლუბი გადადის, თუმცა ლიდერს, "პორტუს" დუბლებს (40 ქულა), ამის უფლება არა აქვს. ერთი პერიოდი, ებრალიძის გუნდი ერთპიროვნული ლიდერი იყო, მაგრამ 10 დეკემბრის მერე არ მოუგია (4 ფრე, 1 წაგება).

ბელგია

ჟუპილერლიგა. გიორგი ჩაკვეტაძე "გენტის" სათადარიგოთა სკამზე გამოჩნდა "ლოკერენთან" მატჩში. ის 42-ე წუთზე შევიდა და პირველ გოლშიც ლომის წილი დაიდო (შემოსვლიდან სამ წუთში). 86-ე წუთზე ჩაკვეტაძემ ჩინებული სადებიუტო გოლი გაიტანა - 3:0.



იტალია

სერია B. ტრავმირებული ლევან მჭედლიძის "ემპოლიმ" შინ "ტერნანას" მოუგო და 37 ქულით მესამე ადგილზეა.

საფრანგეთი

ნასიონალი. ამირან სანაიას (90 წ) "როდეზმა" სტუმრად მოუგო "ლავალს" - 2:1. "როდეზი" 34 ქულით ლიდერია და ლიგა 2-ში გადასვლის უპირველესი კანდიდატი.

კვიპროსი

I დივიზიონი. გიორგი ჩიხრაძის აუტსაიდერი "ახნასი" (სულ 8 ქულა) ერთ-ერთ ლიდერ "ანორთოსისთან" სტუმრად 1:3 დამარცხდა. გიორგი ილურიძეს ამ მატჩში მონაწილეობა არ მიუღია.

ყოველდღიური სპორტული გაზეთი "ლელო"
1837
მკითხველის კომენტარები / 0 /
მსგავსი ამბები
რუბრიკის სხვა სიახლეები
;