[ლეგიონის უქმეები] ნიღბიანი გრიგალავა, წაგებული მანჩინი...

ამ უქმეების ქართული მონაგარი მწირია - სულ 2 გოლი. სეზონში პირველი გოლი გაიტანა აკაკი გოგიამ, ხოლო დანიურ სუპერლიგაში საბა ლობჟანიძის გოლი სულაც პირველია ქართველი შემტევის ლეგიონერულ კარიერაში...

აღვნიშნავთ გია გრიგალავას დაბრუნებას, რომელმაც "ზენიტთან" სპეციალური დამცავი ნიღბით ითამაშა და გუნდელებთან ერთად, რობერტო მანჩინის პირველი რუსული მარცხი მიაყენა...

ესპანეთი. ლა ლიგა 1|2|3.

"სევილიას" დუბლები 4 ქულით უკანასკნელ ადგილზეა. ამ ტურში გუნდი სტუმრად "ალბასეტესთან" 1:2 დამარცხდა. გიორგი აბურჯანია თამაშში უკვე 35-ე წუთზე ჩაერთო და მატჩის მიწურულს მან ყვითელი ბარათი მიიღო.

ოთარ კაკაბაძემ შეუცვლელად ითამაშა, ხოლო მისმა "ჟიმნასტიკმა" სტუმრად 5:1 მოუგო "კორდობას".

გიორგი პაპუნაშვილმა 75-ე წუთამდე ითამაშა, მისი "სარაგოსა" კი შინ "ოსასუნას" დაუზავდა - 1:1.

გერმანია, II ბუნდესლიგა.

აკაკი გოგიას "უნიონმა" სტუმრად მოუგო "რეგენსბურგს", რაშიც გოგიამ ლომის წილი დაიდო - მან 57-ე წუთზე ახლო მანძილიდან გაიტანა, ხუთ წუთში ჩვენებური გამოცვალეს. პირველ ტაიმში გოგია გააფრთხილეს. ეს პირველი გოლია მისთვის ჩემპიონატში.

ლუკას ჰუფნაგელის "ნიურნბერგი" "დარმშტადტს" დღეს ესტუმრება.

იტალია, სერია B.

ირაკლი შეყილაძის (ჩემპიონატის განაცხადში არ შეუყვანიათ) "სპეცია" სტუმრად 2:4 დამარცხდა "ტერნანასთან".

ლევან მჭედლიძის "ემპოლი" დღეს "ენტელას" სტუმრობს.

იტალია, ლეგა პრო.

რომან ჭანტურიას (არ უთამაშია) "პრატო" შინ "მონცასთან" დამარცხდა - 2:3.

ჰოლანდია, ერედივიზიე.

გურამ კაშიას "ვიტესი" სტუმრად "ჰერაკლესს" დაუზავდა - 1:1. ქართველი კაპიტანი 86-ე წუთზე გამოცვალეს.

საფრანგეთი, ნასიონალი.

ამირან სანაიას (90 წ.) "როდეზი" შინ "ბულონს" დაუზავდა - 2:2. ქართველმა მცველმა 21-ე წუთზე პენალტი "აიკიდა".

პორტუგალია, თასი.

III ეტაპიდან გამოვარდა ავთო ებრალიძის (70-ე წუთზე შეცვალეს) "ვიზეუ", რომელიც "ფეირენშეს" 0:0 დაუზავდა, მაგრამ პენალტების სერიაში 3:4 დამარცხდა.

სამაგიეროდ, შემდეგ ეტაპზე გავიდა გიორგი მაკარიძის "მორეირენშე", რომელმაც 3:1 მოუგო "კანელასს". სამწუხაროდ, გიორგის ამ სეზონში ჯერ ერთხელაც არ უთამაშია კლუბში.

ბელგია, ჟუპილერლიგა.

"გენტის" განაცხადში არ ყოფილა გიორგი ჩაკვეტაძე, ქართველის გუნდმა 2:0 მოუგო "ბევერენს".

პოლონეთი, ექსტრაკლასა.

ნაკრების ფეხბურთელთა დუელი ვერ ვიხილეთ კელცეში - "კორონამ" პლოცკის "ვისლას" 2:0 მოუგო, მაგრამ მასპინძელთა ფორვარდი ნიკა კაჭარავა სათადარიგო იყო. წაგებულთა რიგებში შეუცვლელად ითამაშა გიორგი მერებაშვილმა.

ლუკა ზარანდიას არ უთამაშია, ხოლო მისმა "არკამ" სტუმრად "ტერმალიცასთან" ფრედ ითამაშა - 1:1.

მათე ცინცაძისა და ლაშა დვალის "პოგონი" დღეს ესტუმრება "კრაკოვიას".

პოლონეთი, I დივიზიონი.

ლუკა ასათიანის (სათადარიგო) "სუვალკი" სტუმრად 3:3 დაუზავდა "გლოგოვს".

ავსტრია, ბუნდესლიგა.

გიორგი ქვილითაიას (79-ე წუთზე შევიდა) "რაპიდმა" 1:0 მოუგო "ზანკტ პოლტენს".

ავსტრია, ერსტე ლიგა.

ლევან ელოშვილის (სათადარიგო) "კაპფენბერგერმა" შინ 0:1 წააგო "ლუშტენაუსთან".

ავსტრია, რეგიონალლიგა.

ლუკა ძიძიგურის (70-ე წუთზე შევიდა) "გრიოდიგი" სტუმრად "ანიფს" დაუზავდა ლიდერთა ჯახში - 2:2.

დანია, სუპერლიგა.

საბა ლობჟანიძის "რანდერსი" სტუმრად "ნორდსიელანდთან" 2:3 დამარცხდა და კვლავ ბოლო ადგილზეა. ლიდერის კარში საბა ლობჟანიძემ გოლი 43-ე წუთზე გაიტანა. ქართველი 87-ე წუთზე შეცვალეს. 22 წლის ქართველმა პირველი გოლი გაიტანა "რანდერსის" რიგებში, ასევე პირველია ეს გოლი მის ლეგიონურ კარიერაშიც.

"ბრონდბიუსთან" სტუმრად 1:4 დამარცხდა "სილკებორგი", რომლის რიგებშიც დავით სხირტლაძე 70-ე წუთზე შეცვალა მათე ვაწაძემ.

დანია, I დივიზიონი.

ბუდუ ზივზივაძისა (არ უთამაშია) და ლაშა პარუნაშვილის (71-ე წუთიდან ითამაშა) "ესბიერგმა" სტუმრად დაჯაბნა "ვეილე" - 3:1.

შვედეთი, ოლსვენსკანი.

ზურაბ ცისკარიძის (არ უთამაშია) "ესკილსტუნა" სტუმრად "ჰაკენთან" განადგურდა - 0:3.

რუმინეთი, ლიგა 1.

აკაკი ხუბუტიას (სათადარიგო) "გაზ მეთანი" შინ 0:1 დამარცხდა "ვიტორულთან".

ნიკა ძალამიძის "იუვენტუსი" დღეს ითამაშებს დერბის ბუქარესტის "დინამოსთან".

უნგრეთი, OTP ბანკ ლიგა.

ქართველთა "ბალმაზივაროში" შინ 1:1 დაუზავდა "ვიდეოტონს". ბაჩანა არაბული 72-ე წუთზე ირაკლი მაისურაძემ შეცვალა. "ბალმაზივაროში" ბოლო ადგილზეა, "ვიდეოტონი" - პირველზე.

სლოვაკეთი, ფორტუნა ლიგა.

ჩემპიონატის ლიდერმა "ტრნავამ" სტუმრად 3:0 მოუგო "მიხალოვცეს". პირველი გოლი ვახტანგ ჭანტურიშვილის საგოლე პასის წყალობით გავიდა, ჩვენებური ბოლო წუთზე გამოცვალეს.

დიდი ანგარიშით მოიგო "ტრენჩინმაც", რომელმაც 4:1 დაამარცხა აუტსაიდერი "სენიცა". გამარჯვებულთა რიგებში 65-ე წუთამდე ითამაშა გიორგი ბერიძემ.

ფინეთი, იუკონენლიგა.

ირაკლი სირბილაძის (73-ე წუთზე შევიდა) კპვ სტუმრად "ჰაკას" დაუზავდა - 1:1.

მაკედონია, I ლიგა.

ჯაბა ჯიღაურის "ვარდარმა" "შკენდიას" 4:2 მოუგო, ჯაბამ მეორე ტაიმი ითამაშა.

რუსეთი, პრემიერლიგა.

მოსკოვის "სპარტაკმა" სტუმრად 2:1 მოუგო "ახმატს", ბუნებრივია, არ უთამაშია ახალნაოპერაციევ ჯანო ანანიძეს.

გიორგი ნავალოვსკის (90 წ.) "სკა-ხაბაროვსკი" მოსკოვში "დინამოსთან" 0:2 დამარცხდა.

გიორგი ჭანტურიას (53-ე წუთზე შეცვალეს) "ურალმა" ქართველთა "ანჟის" 2:1 მოუგო. სტუმართა კარში გიორგი ლორია იდგა, ხოლო ჯაბა ლიპარტია განაცხადში არ ყოფილა.

თორნიკე ოქრიაშვილის (ტრავმა) "კრასნოდარი" შინ 0:1 დამარცხდა ცსკა-სთან. 

ჯიმი ტაბიძის "უფამ" 1:0 დაამარცხა საბა კვირკველიას "ლოკომოტივი". ტაბიძეს არ უთამაშია, კვირკველია შეუცვლელად გაისარჯა. ის მეორე ტაიმში გააფრთხილეს.

სერიოზული ტრავმის შემდეგ ტულის "არსენალს" დაუბრუნდა გია გრიგალავა და მისმა გუნდმაც სიურპრიზი შემოგვთავაზა - სტუმრად "ზენიტი" 1:0 დაამარცხა. გრიგალავა სათამაშოდ 79-ე წუთზე შევიდა.

უკრაინა, პრემიერლიგა.

დონეცკის "შახტარმა" 3:2 დაამარცხა "ვორსკლა", მაგრამ ქართული დუელი არ შედგა - დონეცკელთა რიგებში სათადარიგო იყო დავით ხოჭოლავა, ხოლო სტუმართა განაცხადში არ ყოფილა სანდრო კობახიძე. ამ გუნდების დუბლების მატჩში (1:2) არ უთამაშია შახტარელ გიორგი არაბიძეს, სამაგიეროდ, სასტარტოში იყო სტუმარი ანდრო გიორგაძე.

ბელარუსი, ვისშაია ლიგა.

გიორგი ქანთარიას (სათადარიგო) "ნემანმა" "გოროდეიას" 2:1 მოუგო.

ვაკო გვილიას (სათადარიგო) ბატე-მ 3:1 მოუგო "ვიტებსკს".

აზერბაიჯანი, პრემიერლიგა.

ზაურ სვანაძის "ინტერი" შინ 0:2 დამარცხდა ჩემპიონ "ყარაბაღთან".

თამაზ ცეცხლაძის (90 წ.) "საბაილი" შინ განადგურდა "ნეფთჩისთან" - 0:4.

ლიტვა, A ლიგა.

ვასიკო ბაჩიაშვილისა და ლევან ჭაფოძის "კაუნო" შინ 1:5 განადგურდა "სუდოვასთან". ერთ-ერთ ლიდერთან მატჩში ორივე ქართველმა შეუცვლელად ითამაშა.

ლატვია, ვირშლიგა.

ლაშა შერგელაშვილის (90 წ.) "რიგასი" შინ 1:2 დამარცხდა გიორგი ერისთავის (შესვენებაზე შეცვალეს) "ლიეპაიასთან".

ესტონეთი, მეისტრილიგა.

ზაქარია ბეგლარიშვილის (90 წ.) "ფლორამ" "პარნუს" 3:0 აჯობა.

ირანი. სპარსეთის ყურის ლიგა.

საბა თავაძის (63-ე წუთზე შევიდა) "ხუზესტანი" შინ 1:3 დამარცხდა "პერსეპოლისთან".

გიორგი გველესიანის (არ უთამაშია) "ზობ აჰანი" სტუმრად 2:2 დაუზავდა "პადიდეს".

ყაზახეთი, თასი.

ტიტულს ვერ შეწვდა ქართველთა "ატირაუ", რომელიც თასის ფინალში "ქაირათთან" 0:1 დამარცხდა. უჩა ლობჟანიძე და ლადო დვალიშვილი "ატირაუს" სასტარტო შემადგენლობაში იყვნენ.

ყაზახეთი, პრემიერლიგა.

გოგიტა გოგუას (56-ე წუთზე შევიდა) "ოკჟეტპესმა" შინ 2:1 მოუგო "თარაზს".

უზბეკეთი, ოლიი ლიგა.

ჩემპიონატის ლიდერმა "ლოკომოტივმა" შინ 2:0 დაამარცხა "ნავბაჰორი". გამარჯვებულთა რიგებში სასტარტო შემადგენლობაში იყო კახა მახარაძე.

შოთა გრიგალაშვილის (არ უთამაშია) "ოლმალიქი" სტუმრად სამარყანდის "დინამოსთან" დათმო - 0:1.

შოთა არველაძის "ფახთაქორმა" 2:0 მოუგო "კოკანდს" და მესამე ადგილზეა.

სამხ. კორეა, ჩელენჯლიგა.

ლევან შენგელიას (56-ე წუთზე გამოცვალეს) "დაეჟეონ სიტიზენი" შინ 0:1 დამარცხდა "ბუჩეონთან".

ყოველდღიური სპორტული გაზეთი "ლელო"

2122
მკითხველის კომენტარები / 0 /
მსგავსი ამბები
რუბრიკის სხვა სიახლეები